Read anuak Tiet Ciik 13 Bible Online

Tiet Ciik 13 - anuak bible

Tiet Ciik 13

¹«'Ba ni näk mo da nyikuŋ Jwøk wala ŋat mo lägö mo ree ee thïïŋö dïïu, ni caan gø jïïu ni da ŋïï wala gïn mo rëëma ec mo tägö,

²ni kööe, ni ‹Ö aa kuna caadhø køør juu møøk, ni tïnynyø geni,› ni teeŋ ŋatøgø cäänö kaper juu mo kuyu, këël na bëëde ni ŋïï wala gïn mo rëëma ec mana cääne kipere othur kare na adïëri,

³kär nou leŋa gïr nyikuŋ Jwøk manøgø wala gïr ŋat lääk manøgø; kiper Wuuö Jwøk na näk Jwøu päänynya uuni nou joode ki man näk mou mëër ki eni ki cwïnynyu bäre ki jwïëyu bäre.

⁴'Ba caathu køør Wuuö Jwøk na näk Jwøu, ni lwäärru eni; gwøgu ciik moe ni leŋŋu dwøre; tïnynyu eni ni göögu ree.

⁵'Ba teeŋ nyikuŋ Jwøk manøgø wala ŋat lääk manøgø wär eni 'näk, kiper eni pwönynya uuni ki man gëëmu ki Wuuö Jwøk na näk Jwøu, na käl uuni wøk ki yi ŋööm Ijep, na pät uuni yi bëët laŋ. Ni teeŋ ŋatøgø manynya man käl uuni wøk yi øtjöö mana ö Wuuö Jwøki na näk Jwøu na kööm uuni ki gø ni cäädhu ki gø. 'Ba teeŋ ŋatøgø wär 'nägu, nou raanynya gïna raac na en dïïu.

⁶«'Ba ni näk mo coku wala wäädï wala nyaarï wala cïïï na mëërï ki gø, wala nyawadu na ŋäyu cwïnynyu ki gø, wïïï di maaŋŋø ki piny, ni kööe, ni ‹Ö aa cøø kuna tïnynyø juu møøk,› ni cäänö kaper juu mo kuyu wala moa kuc kwäyu,

⁷ni beege juu mo jøøa en buutu na karge cään ki uuni, wala moa karge bäyö ki uuni, ki mano täge ki buut piny man nø këël buut piny maya,

⁸teeŋ ŋat mo caana gïnögø nø, kärï jïëy ki mare, ni ba leŋï dwøre. Kär cwïnyï pädhö ki gïre, ni ba weyï eni, ni ba kanï eni.

⁹'Ba eni wär put 'näk kiree. Cerï wär kwøŋ møør maal ki man 'nägï gø, køøre ceŋ jøw møga wär läwge cään.

¹⁰Eni wär këëru ki kïte nee thøøe, kiper eni manynya man tïïc uuni ni karu bäär ki Wuuö Jwøk na näk Jwøu, na käl uuni wøk ki yi ŋööm Ijep na näk po laŋ.

¹¹Køøre jø Icriel bëët gïnögø owïnyge ni lwäcge, ni ba tïïge këët dïïu ki teeŋ gïnö ni raac enøgø.

¹²«'Ba kanyo bëëdu yïth päänye mou moo cïp Wuuö Jwøki na näk Jwøu jïïu, ni näk mo da gïn mo you wïnynyö,

¹³ni køp ni da jiy mo wïthge reyø mo dëëtge ege thïïŋö dïïu ni maaŋge wïth jø pääny marge, ni köge, ni ‹Beerra man cøøø ni tïnynyø juu møøk,› ni ge cäänö kaper juu mo kuyu,

¹⁴uuni, tier gïnögø wär manynyu, ni neennu gø ni pëënynyu gø døøc. 'Ba ni näk mo gïnögø otïmö na adïëri, ni gïna näk Jwøk yie raac ki gø ojoodø møn no otïïö yïthakiyu,

¹⁵ka adïëri møn, jøøa näk bëëdö yi päänyeca wär putu 'näk kiree; ni putu päänyögø raanynyø na bäre bäre, ki gïïa en yie bëët, këël lääc paac moa en yie bëët.

¹⁶Køøre gïïo twierru yie bëët wär cooŋu kanya ciel kar acooŋa mar päänyögø, ni waaŋŋu pääny ki gïïa twierru bëët, ni tïmge ni ge caala olämi man wø waaŋ bäre jï Wuuö Jwøk na näk Jwøu; ni tïm wï päänyöca no oränynyö na bäre bäre, ni ba cäŋ geerø këët.

¹⁷'Ba kär dee gïn mo raac mo ocienø mo gutu ki ceŋŋu, kiper nee Wuuö Jwøk nee wëër mare na leth nee ba ö bäätu, ni nyooth mëëye jïïu, ni päth cwïnye ki gïru, ni tïïc kwäännu ni thööth, kaawat mana kööŋe jï kwäyu.

¹⁸Gïnögø tïïc Wuuö Jwøki tïïö ni näk mo dwør Wuuö Jwøk na näk Jwøu leŋŋu leŋø, ni gwøgu ciik moe bëët mo köömma uuni ki geni dïcäŋi en, nou tïïya gïn mo tiir nyïm Wuuö Jwøk na näk Jwøu.