Read anuak Tiet Ciik 15 Bible Online

Tiet Ciik 15 - anuak bible

Tiet Ciik 15

¹«'Ba kanyo tïme na aŋuun bïriet cwiiri cooth, pïït dou wiiø.

²Ni mano tïïc kiper wec pïït beeye en, ŋata mäyö baŋe, gïna näk omac ŋat atut mare baŋe wär wiie. Ŋata mäyö baŋe kär pïïdö ki watge wala ŋat atut mare, kiper beeye kanya caan Wuuö Jwøki ni pïït wec.

³'Ba gïna näk omac jurri, løny jï dhaanhø ki man piir gø, 'ba jammi mo ena bäät wat wär wec jïre.

⁴'Ba ni näk mo gïnögø you tïïö, otïmö ni bäŋ ŋat pou mo can dïïu, kiper Wuuö Jwøk na näk Jwøu uuno gwïëdhe yi ŋöömmo lwørru noo cïbe noo dööŋ jïïu na maru.

⁵Wuuö Jwøk na näk Jwøu uuno gwïëdhe møn ni näk mo luupe leŋŋu leŋø ni kïthu ge bäät tïïc, ni gwøgu ciik moi bëët mo köömma uuni ki ge dïcäŋi en.

⁶Kiper Wuuö Jwøk na näk Jwøu uuno gwïëdhe kaawat mana caan gø jïïu. Ki køør kwär maru, japu owëëgu mac jï wïth juurre mo thööth, 'ba u ba mäyi; ni ki køør teek maru, wïth juurre mo thööth otïmö ni bëënna uuni, ni ba tïmu nou bëënna geni.

⁷«'Ba ni näk mo da ŋat mo wat mo can mo bëëdö buut dhaanhø yïth päänye moa näk mou, yi ŋöömmo cïp Wuuö Jwøki na näk Jwøu jïïu, kär cwïny tëënnö ki gø, ni ba tëën cenø ki man cïpö jïre.

⁸'Ba cenø wär jap jïre, ni mooc eni ni ec tar ki gïna näk orømø na manynye, ni jïte ki gïna cane.

⁹'Ba røk wär gwøk, kiper nee bäŋe acaara mo raac mo ö cwïny, ki man köö dhaanhe, ni ‹Bïriet cwiiri kare acäännö, cwiino wec pïït yie,› ni tïm eci ni raac ki wat mana can, ni bäŋe gïn mëëk eni. Kanymør ŋatøce jwöŋö ki nyeŋ dhaanhø baŋ Wuuö Jwøk, ni tïme na raay bäät ŋata jwöŋe ki nyeŋ gø.

¹⁰Gïna manynye wär cïp jïre ki met ec, ni ba cäŋ cwïnynyi lämmö kiper gïna mëëk eni. Kiper ki køør gïno tïïc dhaanhe, Wuuö Jwøk na näk Jwøu dhaanhø gwïëdhe gwïëdhö ki ri tïïe bëët moo tïïc ki cenø.

¹¹Kiper jøøa can ba thum bäät ŋøøm, ni beeye tiere gø ni köömma uuni en, ni kööa, ni ‹Cenø jap jï wat mo can man wø many køny yi ŋöömö maru.›

¹²«'Ba ni näk tuuŋu ma ŋat Ibaru[5] ma dïcwøø wala dhaagø ree ee bielø na ŋat tïïc jï dhaanhø, eni ŋatøgø dee tïnynyö ki cwiiri abïciel. 'Ba noo tïme na bïriet cwiiri wär eni wec nee aae.

¹³'Ba kanyo wii nee aae, kär wëëk wääth nee aae ki ceŋŋe jaak.

¹⁴'Ba wär mooc ki met ec ri dïëk ki ri beel ki ri kwøk nyïïomøki, kaawat mana ö Wuuö Jwøki na gwïëth uuni.

¹⁵'Ba wïthu wär caarru ki mana bëëdu ni uuna laaŋe yi ŋööm Ijep, na ö Wuuö Jwøki na näk Jwøu na wïïl uuni wøk. Man beeye tiere gø ni köömma uuni ki gïn dïcäŋi en.

¹⁶«'Ba ni näk mo ŋata biel ree enø köö ni eni ba aay buut ŋata biel ree baŋ gø, kiper mana mëëre ki ŋatøgø ki jø paare, kiper na tïm bëëtö mare ni beer kanya bëëde ki ŋatøgø,

¹⁷ŋata biel ree baŋ gø wär lwöte ki muda, ni dii ïth gø ro odhuulu mar dhi øtø, ni thuth gø; ni put ŋatøgø bëëtö na ŋat tïïc jïre na bäre bäre. 'Ba teeŋ gïnögø doo tïïö thuwø dëër dhaagø mo ree ee bielø jï dhaanhø.

¹⁸'Ba ŋat mo ree ee bielø jï dhaanhø mo manynya man aae, kär ec teek ki man wii, kiper tïïc mana tïïe jï dhaanhø ki cwiiri moø na abïciel yøø, kaala tïïc mana doo tïïc ŋat mo mägö ki gwel. 'Ba Wuuö Jwøk na näk Jwøu dhaanhø ogwïëdhe ki gïïo tïïe bëët.

¹⁹«'Ba kaai mo dhäk mou ki kaai mo dïëk mou moa näk thwönhi wär cïbu kur keerge jï Wuuö Jwøk na näk Jwøu. Käru purö ki kaai mo dhäk mou, ni ba nyaarru jïëc kaai mo dïëk mou.

²⁰Uuni ki jøøa en mïëyu, kaai moøgø wär cammu ki yi cwiir cooth nyïm Wuuö Jwøk na näk Jwøu kanyo näk ee jierø.

²¹'Ba ni näk mo kaa manøgø da kare kany mo ogwäyö dëëre, kaamar ŋöödö wala cöörö wala gïn mo ogwäyö dëëre, kär cïp no olämi jï Wuuö Jwøk na näk Jwøu.

²²'Ba beerra man cami paac. Ni ŋat mo waany ki ŋat mo ba waany bëët løny jïge ki man camge gø, kaawat man wø cam rïŋ aŋer ki rïŋ purra jaak.

²³'Ba kär remme cam. Wär køny piny kaamar pïï.