Read anuak Tiet Ciik 16 Bible Online

Tiet Ciik 16 - anuak bible

Tiet Ciik 16

¹«'Ba cäŋ Cäŋa Pööth Thøøe Yie wär wøørru jï Wuuö Jwøk na näk Jwøu yi dwääy mana cwøl na Abip, ni gwøgu dwäänögø, kiper Wuuö Jwøk na näk Jwøu uuna käl wøk ki Ijep ki dï wäär yi dwäänögø.

²'Ba kanyo wøørru cäŋ Cäŋa Pööth Thøøe Yie, wäru lwötu røk dïëk mou ki dhäk mou, ni cou ni ŋaru ge no olämme jï Wuuö Jwøk na näk Jwøu kanyo jiere noo caa ri nyeŋŋe.

³'Ba kanyo tïme na ra ajwöma manøgø, käru cämö ki dääpe[6] mo ocoodø ki thømmø. 'Ba ki nïne abïriiø wäru cämö ki møø mo ree bäŋ thømmø, ni beeye møga näk nyootha gïna leth kanya ööu wøk ki Ijep nou läädö. Ni cammu kaper nee dïcäŋ mana ööu wøk yie ki Ijep nee bëëde ni wïthu paayu paayø ki gø ki yïth nïr kwøw mou bëët.

⁴Ki yïth nïne moø na abïriiø yøø, kär dee thømmø mo joot dï ŋöömmu bäre. Kär dee rïŋö mo buti mo këët amöölla ri rïŋ lääy moo cïpu no olämi ka abøøya yi cäŋ mana dïkwøŋ.

⁵«Uuno mänö ki man ŋaru olämme mo cäŋ Cäŋa Pööth Thøøe Yie yi pääny mana manynyu jaak røk päänye mou moo cïp Wuuö Jwøki na näk Jwøu jïïu;

⁶'ba wäru ŋädu kanyo jier Wuuö Jwøki na näk Jwøu noo caa ri nyeŋŋe. Olämme mo cäŋ Cäŋa Pööth Thøøe Yie wär ŋaru ka abøøya ni cäŋ pätha piny, ka teeŋ mana tïïyu kanya ööu wøk ki Ijep.

⁷Ni bullu gø ni cammu gø kanyo jier Wuuö Jwøki na näk Jwøu. 'Ba no tïme na amöölla, u døøa yïth oduŋkaare mou.

⁸Nïne abïciel moøgø, u doo cämö ki møø mo ree bäŋ thømmø, 'ba noo tïme na bïriet nïne, wär tïme na kar acooŋa mo ena kur keere jï Wuuö Jwøk na näk Jwøu. 'Ba dïcäŋögø kär dee tïïc mo tïïyu.

⁹«'Ba wäru kwäänu ki nïne ma kar juu abïriiø. Nïne moøgø na kar juu abïriiø yøø wär kwaannu nou tägi ka dïcäŋo tägu ki kac beel.

¹⁰Køøre Ajwöma Man Wø Wøør Køør Juu Abïriiø wär wøørru jï Wuuö Jwøk na näk Jwøu, ni ö ŋati man nø ni cïp gïna en cere ki køør met ec mare, ni cïpu ka køør gwïëth mana ö Wuuö Jwøki na näk Jwøu na gwïëth uuni ki gø.

¹¹Ni mïn yïthu nyïm Wuuö Jwøk na näk Jwøu, yi kanyo jier Wuuö Jwøki na näk Jwøu noo caa ri nyeŋŋe, ni beeye uuni ki wäätu ki nyïïu, ki jø tïïc mou moa näk cwøw ki moa näk mään, ki jø tuuŋ Libay, ki wëëlle moa path, ki kïïe, ki määr thuunhnhi mo bëëdö ka uuni.

¹²'Ba wïthu wär caarru ki bëët laŋ mana beetu Ijep, ni gwøgu rou ki man koorru ciik moi ii.

¹³«'Ba kanyo lønynyu ki dïn caammi mou ki nywøp kwøk nyïïomøki mou, Ajwöma Man Wø Wøør Ni Jø Bëëdö Yïth Abïle dou wøørø ki nïne abïriiø.

¹⁴Ni mïn yïthu ka ajwömmögø, ni beege uuni ki wäätu, ki nyïïu, ki jø tïïc mou moa näk cwøw ki moa näk mään, ki jø tuuŋ Libay, ki wëëlle moa path, ki kïïe, ki määr thuunhnhi mo wø bëëdö ka uuni.

¹⁵Ajwöma manøgø dou tïïö ki nïne abïriiø jï Wuuö Jwøk na näk Jwøu kanyo näk ee jierø. Kiper uuno gwïëth Wuuö Jwøki na näk Jwøu ki caammi mo wø ciek jïïu bëët, ki tïïe mou bëët mo wø tïïyu ki ceŋŋu. Køøre u jïtö ki met ec møn.

¹⁶«'Ba kwöre adäk ki yi cwiir, cwøw bëët doo ööa nyïm Wuuö Jwøk na näk Jwøu kanyo näk ee jierø, ni beeye kany wø tïme na kar Ajwöm Møga Näk Ree Bäŋ Thømmø, ki kany wø tïme na kar Ajwöm Caammi Moo Kwøŋ Ciek, ki kany wø tïme na kar Ajwöma Man Wø Wøør Ni Jø Bëëdö Yïth Abïle. 'Ba ge ba doo ööa nyïm Wuuö Jwøk ki ceŋge jaak.

¹⁷Ŋati man nø doo cïpö ki gïna näk løny jïre, ki køør gwïëth mana cïp Wuuö Jwøki na näk Jwøu jïïu.

¹⁸«'Ba wäru röönyu ki kwääri ki jø wø ŋøl luup yïth päänye mou bëët moo cïp Wuuö Jwøki na näk Jwøu jïïu, ni røønynyu ki køør wïth tuŋi mou; ni ŋøørge luup jiy na karge.

¹⁹'Ba geni, luup moa näk karge kär daaŋge; kärge jëënyö; kärge kädö ki jammi mo wø cïp ki piny, kiper jammi mo wø cïp ki piny waŋ ŋata wïïe leer di cøørø, ni daaŋ luup mo jøøa marge thïïŋ.

²⁰'Ba wär tïmge ni ge caatha køør ŋøl ma kare keere keere, kiper nee ge bëëtge ni ge kwøw, ni ö ŋöömma cïp Wuuö Jwøki na näk Jwøu jïïu nee put bëëtö na maru.

²¹«Käru cööth piny ki jaadha näk otieŋø na näk ocaa ri jwøa cwøl na Acara kiper dëëtu buut gïn wø cïp olämme bääte mano tïïyu jï Wuuö Jwøk na näk Jwøu,

²²ni ba cööthu piny ki kïdi kiper dëëtu nee lammu, kiper beeye gïn mo Wuuö Jwøk na näk Jwøu yie raac ki gø.