Read anuak Tiet Ciik 18 Bible Online

Tiet Ciik 18 - anuak bible

Tiet Ciik 18

¹«'Ba jø tuuŋ Libay bëët, këël moa näk dïlämme, doo bäŋ ŋöömö mo dööŋ jïge na kurge yïthakic jø Icriel. 'Ba geno tïmö ni ge cama olämme mo wø waaŋ ki maac ni wø cïp jï Wuuö Jwøk, ki gïï møøk mo wø cïp jï Wuuö Jwøk na kure.

²Ni ge ba doo jïtö ki ŋöömö moo dööŋ jïge dï jø poge. 'Ba beeye Wuuö Jwøk noo dööŋ jïge ni caala ŋöömma doo dööŋ na kurge, kaawat mana caan gø jïge.

³«'Ba gïïo joot dïlämme baŋ jø wø cïpi ko olämme mo dhäk ki mo dïëk beege bat ki lëëmme karge riet ki pwöth ec.

⁴Gïïo kwøŋ ciek røk beel mou ki røk nyïïjenni mou ki røk mädhi mou, ki jïër moo kwøŋ nyäär wøk røk dïëk mou wär cïpu jï dïlämme.

⁵Kiper beege geni ki nyïïkwaacge na jier Wuuö Jwøki na näk Jwøu dëët wïth tuŋi mou bëët, kiper nee cuŋge ni tïïge ki nyeŋ Wuuö Jwøk na bäre bäre.

⁶«'Ba ni näk mo da ŋat tuuŋ Libay mo öö ni käla yi pääny mana bëëde yie røk päänye mou dï Icriel, ni ööi ka met ec mare ni ci kanyo näk ojier Wuuö Jwøki,

⁷løny ki man tïïe ki nyeŋ Wuuö Jwøk na näk Jwøe kaace, ni caala tuuŋge ma jø tuuŋ Libay mo wø cuŋŋi nyïm Wuuö Jwøk.

⁸'Ba mano came na kure otïmö ni röömi ki mano cam ŋati man nø røk jø tuuŋ Libay moøgø. 'Ba ni näk mo da gïï mo ee joodø baŋ wëëkge ki køør gïï møøk mo odwøk pwödhö, gïïögø ba doo kwaana røk japøgø.

⁹«'Ba kanyo pïïyu yi ŋöömmo cïp Wuuö Jwøki na näk Jwøu jïïu, u ba doo kwänynyö ki ŋwaal gïï mo Jwøk yie raac ki geni baŋ juurre moo en kaace.

¹⁰Kär dee dhaanhø mo joot dïïu mo waaŋa wääde wala nyaare ki maac no olämi, wala ŋat adïëda, wala ŋat mo tïïö ki wäälli, wala ŋat mo thöödhö ki war, wala ŋat ma ajwøa jaak,

¹¹wala ŋat thïëth, wala ŋat mo waŋe riek ki jap ajuuk, wala ŋat mo ree da juu mo cøøra jwïëc jiy moa näk othøw.

¹²Kiper ŋat mo tïïya teeŋ gïïögø, Wuuö Jwøk yie raac ki gø. Ni beeye kiper teeŋ gïïögø ni reyø yøø noo ö Wuuö Jwøki noo riem juurre wøk nyïmmu.

¹³'Ba uuni, u doo bëëdö ni bäŋ gïn mo jøøŋŋi ri bëëtö maru nyïm Wuuö Jwøk na näk Jwøu.

¹⁴«Kiper juurre moo ŋøøpge lwørru wø leŋa gïr jø wø thöödhö ki war ki gïr jø adïëda. 'Ba uuni, Wuuö Jwøk na näk Jwøu uuna mäne ki man tïïyu teeŋ gïïögø.

¹⁵Wuuö Jwøk na näk Jwøu otïŋ maal jïïu ki nyikuŋ Jwøk mo caala aani røk jø pou. 'Ba nyikuŋ Jwøk manece mare dou leŋø.

¹⁶Gïnögø otïïc Wuuö Jwøki na näk Jwøu ki køør kwac mana kwayu eni ki gø dïcäŋa cooŋŋu rou kanya ciel tier Kïn Körëp, na kööu, ni ‹Beerra man ba wïnywa dwør Wuuö Jwøk na näk Jwøø këët, ni ba cäŋwa teeŋ maac man ni dwøŋ en neennø, kiper nee wa ba thøwa.›

¹⁷«Køøre Wuuö Jwøk aköö ki aani, ni ‹Gïna caange beeye gïn mo beer.

¹⁸Aano tïŋ maal ki nyikuŋ Jwøk dï jø poge mo caala ïïni, ni cïba luup 'moa dhee, ni ö eni ni caan luupo köömma eni ki ge bëët jïge.

¹⁹'Ba ŋat wø ba leŋ luupa moo caan nyikuŋ Jwøki manøgø ki nyeŋŋa, aani ki dëëra ŋatøgø pëënynya pëënynyö.

²⁰'Ba nyikuŋ Jwøk mo caana luup ki nyeŋŋa jaak ki wïïe keere, ni eni kära köömmö ki man caan ge, wala mo cäänö ki nyeŋ juu møøk, nyikuŋ Jwøk manøca doo nääö.›

²¹«'Ba kanymør u köö ki cwïnynyu, ni ‹?Luubö mo ba caana Wuuö Jwøki oŋäcwa gø nidïï?›

²²Gïno ŋäyu gø ki gø beeye en; kany wø näk mo nyikuŋ Jwøk cäänö ki nyeŋ Wuuö Jwøk, ni näk mo gïna cääne kipere ba thur kare wala ba tïmö na adïëri, gïneca beeye gïna näk kär caan Wuuö Jwøki. 'Ba beeye gïn mo caana nyikuŋ Jwøki manøgø ki wïïe keere jaak. Käru lwäyu ki gïno caane.