Read anuak Tiet Ciik 20 Bible Online

Tiet Ciik 20 - anuak bible

Tiet Ciik 20

¹«'Ba kanyo aau wøk baŋ leny baŋ nyïïmännu, noo jootu okwëënyi ki jïëth leny mo wø tut okwëënyi, ni jiy thööth ni ge kaala uuni, käru lwäyö ki geni, kiper Wuuö Jwøk na näk Jwøu, na käl uuni wøk ki yi ŋööm Ijep, nut buutu.

²Ni kanyo tïm kar lenynyi ni cään, dïlämi wär nyänh buutu, ni cään jiy,

³ni kööe jïge, ni ‹Wui, u na jø Icriel, wïnynyu gïn. Dïcäŋi u cøøa baŋ leny baŋ nyïïmännu. Kär cwïnynyu bwøk, ni ba lwäyu; kär cwïnynyu pädhö, ni ba kwany dëëtu ki lwär nyïmge,

⁴kiper beeye Wuuö Jwøk na näk Jwøu noo cäädhi ki uuni na aciel, noo këëdi ki nyïïmännu kiperu, noo køny uuni.›

⁵«Køøre cuumme wär cäänge ki jiy, ni köge, na ‹?Aŋa no ogëëdö ki øtø mo nyään mo poot kär bëëdö yi gø? Ŋatøgø aae ni døø paare, kiper kanymør eni thøw kar leny, ni ö dhaanhe mørri ni bëëde yi gø.›

⁶Ni cäŋge köö, na ‹?Aŋa no opïïdhö ki pwöth omøki mo poot bäŋ nyïëdi mo ee camø ri gø? Ŋatøgø aae ni døø paare, kiper kanymør eni thøw kar leny, ni ö dhaanhe mørri ni täge ki man cam nyïëdi moe.›

⁷Ni cäŋge köö, na ‹?Aŋa no omëëgö ki dhaagø mo poot käre nywømø? Ŋatøgø aae ni døø paac, kiper kanymør eni thøw kar leny, ni ö dhaanhe mørri ni nywøm dhaaŋŋøgø.›

⁸Køøre ni cäŋ cuumme cäänö ki jiy, ni köge, na ‹?Aŋa ni lwäär, ni cwïnye obwøk? Ŋatøgø aae ni døø paare, kiper nee eni cwïny nyïïmenni ba wëëk böök kaawat mare.›

⁹'Ba kanyo ö cuumme noo lønyge ki cäänö ki jiy, wär kwänyge ki kwääc lwaae mo jø leny na wïth jiy.

¹⁰«'Ba kanyo tïmu nou pïï buut pääny mano këëdu ki gø, u doo jäägö ki dwør mëër dïkwøŋ.

¹¹'Ba ni näk mo ge duunnö ki dwør mëër jïïu, ni japge dhi kiir jïïu, jiy bëët moa en yi päänyögø wär magu ni tïmge na jø tïïc jïïu, ni putge u tïnynyö.

¹²'Ba ni näk mo ge ba duunni ki dwør mëër baŋu, ni täkge leny ki uuni, pääny marge wär rumu dïër.

¹³'Ba kanyo ö Wuuö Jwøki na näk Jwøu noo cïp päänyögø ceŋŋu, cwøw bëët wär putu näk.

¹⁴'Ba mään keerge ko obwöre ki lääc paac, ki gïïa en yi pääny bëët na twierru, wär källu kiper dëëtu, ni kønynyu rou ki jap nyïïmännu moo cïp Wuuö Jwøki na näk Jwøu jïïu.

¹⁵Teeŋ gïïögø wär tïïyu røk päänye bëët moa karge bäyö ki uuni, na näk ba en røk päänye mo wïth juurre moa kwörge cärö.

¹⁶«'Ba yïth päänye mo juurre moa kwörge cärö, moo cïp Wuuö Jwøki na näk Jwøu jïïu noo dööŋ na maru, gïn mo ree da jwïëy jaak, kär weyu ni kwøw.

¹⁷'Ba putu ge thöör na bäre bäre, ni beege jø Këth ki jø Amör ki jø Keenan ki jø Përec ki jø Ëwi ki jø Jeebuc, kaawat mana ö Wuuö Jwøki na näk Jwøu na kööm uuni,

¹⁸kiper nee u ba pwönyge ki man tïïyu gïï mo Wuuö Jwøk yie raac ki ge, ni wø tïïcge jï juu moge, kiper nou ba bääyu dëër Wuuö Jwøk na näk Jwøu.

¹⁹«'Ba kany wø näk da pääny mo rumu dïër ki kany mo bäär, mou këëdö ki gø kiper nee mayu, kär jenni moe moa näk nyïïge di camø ŋøtu ni raanynyu geni, kiper løny ki man cämu ri nyïïge. Kär jenni ŋødu piny jaak, kiper jaath paa dhaanhø, na rumu dïër.

²⁰'Ba jenni moa ŋäyu ni nyïïge ba cam, løny ki man ŋødu geni piny, ni tïïu ki geni ki gïï mo løny jïïu ki man dønynyu yi pääny mano këëdi ki uuni, këël mano böötu gø.