Read anuak Tiet Ciik 21 Bible Online

Tiet Ciik 21 - anuak bible

Tiet Ciik 21

¹«'Ba ni näk mo da dhaanhø mo ojoodø no onääö, no oleeŋ piny dï paap jaak yi ŋöömmo cïp Wuuö Jwøki na näk Jwøu jïïu noo lwørru na maru, ni ŋata 'näk gø kuc,

²jø døøŋŋø mou ki dïŋut luup mou, ge doo cøøa wøk kanya en ŋatøgø yie, ni rømge yïthakic kanya thøw dhaanhe yie ki päänye moa en lage bëët.

³'Ba pääny mano kare cään ki kanya thøw dhaanhe yie, jø døøŋŋø mo päänyögø doo lwötö ki dhieŋ ma nyirøøa mo tïïc poot käre päärö, ni jaath puur man wø rïï ŋut poot käre gudö.

⁴Køøre jø døøk pääny maneca nyirøøa manøgø dege kïth gool mo yie da pïï mo kwödö, mo poot kär puurö wala poot kär piidhø, ni meenge ŋut nyirøøa manøgø yi gool kaace.

⁵'Ba dïlämme, ni beege jø tuuŋ Libay, ge doo ööa nyïm kaace, kiper geno jier Wuuö Jwøki na näk Jwøu nee eni tïnyge nee ge gwëëthge ki nyeŋ Wuuö Jwøk. Ni luup pïëm bëët ki luup lenye mo wø tägi yïthakic jiy wø thööra geni.

⁶Køøre jø døøŋŋø bëët moa en yi päänya kare cään ki kanya thøw dhaanhe yie, ceŋge lwøkge lwøø bäät nyirøøa mana ŋute meen enø yi gool.

⁷Ni caange marge, ni köge, ni ‹Rem ŋati kärwa køny piny ki ceŋwa, wala ewa maar joot ki nyeŋwa kanya nääi.

⁸Wui Awuuö Jwøk, wëën jiyï ma jø Icriel na wïïlï wøk. Kwör rem ŋati ni bäŋ gïn mo ee baaø en kär kïth bäätwa, wa na jø Icriel.› Køøre nø, geno wëënni ki kwör rem ŋatøgø.

⁹'Ba kwör rem ŋata näk bäŋ gïn mo ee baaø okälu wøk bäätu kanyo tïïyu gïnögø na kare nyïm Wuuö Jwøk.

¹⁰«'Ba kany wäru cou wøk baŋ leny baŋ nyïïmännu, no ö Wuuö Jwøki na näk Jwøu noo cïp geni ceŋŋu, ni magu jiy ki tøŋ,

¹¹ni näk mo da ŋat mo jïtö ki dhaagø mo mïërö dïge, ni päth cwïnye kipere, ni manynya gø nee käle nee tïme na dhaagø jïre,

¹²eni dhaaŋŋøgø dee kïtha paare. Køøre dhaaŋŋøgø wïïe dee lielø ni ŋat kwök lweete.

¹³Køøre thuwø abïïe moa en dëëre kanya maai ri leny dee göönya wøk dëëre, ni bëëde po ŋatøgø, ni bëëde ni kïmmö ki dwääy aciel bäre kiper wänni ki menni. Køøre nø, ŋatøgø oci baŋ dhaaŋŋøgø, ni tïm dhaaŋŋøgø na cïïe, ni tïm ŋatøgø na cwøre.

¹⁴'Ba ni näk mo ŋatøgø tïmö ni cwïnye ba many dhaaŋŋøgø, eni dee wiiø ni aae ni ci kanya manynye jaak. 'Ba eni ba dee ŋeeø ki gwel, ni ba tïïc gø kaamar laŋŋø, kiper dëër gø ee nø joot.

¹⁵«'Ba ni näk dïcwøø jïre da mään ariiø, ni mëëre ka aciel røkge, ni ba mëëre ki maya, ni mana mëërö ki gø ki mana ba mëërö ki gø ojïtö ko obwöre ma cwøw karge riet, ni näk nyilaal mana näk kaa dïkwøŋ nywøla dhaagø mana ba mëëre ki gø,

¹⁶kanyo tïme ni eni manynya man pääŋ jape jï wääte, eni wääde mana nywøle ki dhaagø mana mëëre ki gø ba dee tïïö na lwiidhø, ni wääde mana nywøle na kaa dïkwøŋ ki dhaagø mana ba mëëre ki gø nutö.

¹⁷Eni wääde mana nywøle ki dhaagø mana ba mëëre ki gø dee nyoodhø kiree ni beeye kaa mana dïkwøŋ, ni mooc gø ki kure røk jape bëët ki kwöre ariiø ni kaala wääte møga, kiper beeye eni na kwøŋ nywøl na nyooth gø ni eni nyöödö, ni gïïa doo joot lwiidhe dee joodø.

¹⁸«'Ba ni näk mo dhaanhø jïre da wääde mo wïnni mo wïïe teek, ni luum wänni wala luum menni ba leŋe, ni kany wø köömge gø, luumge ba wïnynye,

¹⁹geni wäätge dege maaø ni kälge gø wøk dhi kiir kar acooŋa baŋ jø døøŋŋø mo pääny manø ni bëëde yie enø.

²⁰Køøre ge doo köö jï jø døøŋŋø mo pääny manø ni bëëde yie enø, ni ‹Wäätwa man wïnni ni wïïe teek, ni luup mowa ba leŋe. Ena dhaanhø mo owär na ŋat meeye.›

²¹Køøre eni doo këër jø päänynyi mana bëëde yi gø ki kïte këël mano thøøe, nou raanynya gïna raac na en dïïu. Køøre gïnögø owïny jø Icrielli bëët ni lwäcge.

²²«'Ba ni näk mo dhaanhø otïïö ki raay mo rømi ka thøø, ni nääi, ni lïëri ri jaath,

²³rïŋ dëëre kär këët wäär ni poot no olïërö ri jaath, kiper ŋat mo olïërö ri jaath beeye ŋat mo ocien Jwøki. Eni wär put koony dïcäŋöca, kiper nee ŋöömmo cïp Wuuö Jwøki na näk Jwøu jïïu enø, nee ba raanynyu.