Read anuak Tiet Ciik 22 Bible Online

Tiet Ciik 22 - anuak bible

Tiet Ciik 22

¹«'Ba ni näk da dhaanhø mo dhieŋ wala røømmø mar watge ee joodø no orwäänyö ni cäädhö jaak, kär wiie. Wär dwøk baŋ watge.

²'Ba ni näk kar watge bäär, wala wää lääy manøgø kuue, läänögø wär käl paare, ni bëëde buute këël mano ö wänni ni manynya gø; køøre wär cïbe jïgø.

³Ni tïïc teeŋ gïn mo caala manøgønø dëër arëën wala abïï mar watge, wala gïn mo orwäänyö baŋ watge jaak, mo ee joodø; kär nee weya gø jaak ni pöödhe ki buut gø.

⁴«'Ba ni näk dhaanhø arëën wala dhieŋ mar watge ee joodø no opädhö øtjöö, kär wiie jaak. Wär kunynye ki man tïŋ gø maal.

⁵«Kär dee dhaagø mo ruyi ka abïï dïcwøø, wala dïcwøø mo kïtha dëëre ka abïï dhaagø, kiper ŋat wø tïïc teeŋ gïn mo caala man nø, Wuuö Jwøk yie raac ki gø.

⁶«Ni näk mo dhaanhø ocwöp ri øt wenyø thääŋ jöö, mo ena bäät jaath wala mo ena piny, ni øt wenynyøgø yie da nyïëdi wala tøŋ, ni menni ena bäät nyïïe wala bäät tøge, kär menni käle ki nyïïe.

⁷Løny jïre ki man käl nyïïe kiper dëëre; 'ba menni wär wiie nee aae, kiper teeŋ ŋatøgø nee jïte ki bëëtö mo beer, ni tïm nïr kwøw moe ni thööth.

⁸«Kany wø näk mo dhaanhø gëëdö ki øtø mo nyään, eni doo tïïö ki gïn ma gëëŋi wï øtø mare maal, nee ba käne bääte ki kwör, ni näk mo da ŋat moo pänhnhö ki bääte maal.

⁹«Kär dee dhaanhø mo pïïdhö ki teeŋ wïth köödhi ariiø ni ee jääbö yi pwöth omøki mare. Ni näk mo gïnögø tïïc dhaanhø tïïö, köödhi ki nyïïjenni moe ränynyö.

¹⁰«Kär dee dhaanhø mo purö ki rwaath ka arëën ni gïr puur ee twöö ŋutge na aciel.

¹¹«Kär dee dhaanhø mo ruyö ka abïï mo ocwääö ki waac lïïna ki waac cuup na aciel.

¹²«Dhaanhø doo tïïö ko okuri mo tïïc ka waare ni twöö geni ceŋ aleeŋŋa mare karge ŋweeri.

¹³«'Ba ni näk da ŋat mo nyöömmö ki dhaagø, ni ci baŋ dhaaŋŋøgø na cïïe, ni ö eni ni cäŋ männö ki gø,

¹⁴ni raany nyeŋ dhaaŋŋøgø baŋ jiy, ni lööe ki eni ki gïn mo wïc laay ki gø, ni kööe, ni ‹Dhaagø man anywøma, 'ba na cøøa baŋe na dhaagø, kära joodø na dhaagø mo dëër dïcwøø poot kuue,›

¹⁵køøre wää dhaaŋŋøgø ki menni, gïno nyooth thenhø mar nyige, man näk mo dëër dïcwøø poot kuue kanya nywømge rege, wär kälge wøk ni nyoothge ge jï jø døøk pääny dhi kiir kar acooŋa.

¹⁶Køøre wää nyaanøgø wär kööe na enø nø jï jø døøŋŋø, ni ‹Aani, aana jïëy ki man ö ŋati ni nywøm nyaara, 'ba ena cäŋ männö ki gø.

¹⁷'Ba ennø, ena löö ki nyaara ki gïn mo wïc laay ki gø, ni kööe ni nyaara käre joodø na dhaagø mo dëër dïcwøø poot kuue. 'Ba abïï man beeye mana nyooth thenhø mar nyaara, ki man näk mo dëër dïcwøø poot kuue kanya nywøm gø.› Køøre abïïnögø dege peerø nyïm jø døøk pääny.

¹⁸Køøre jø døøk pääny manøgø, ŋatøgø dege kälö ni pwötge gø,

¹⁹ni cwötge bääte ki gwet-bïrö ma cekelli ma dïpa, ni mëëkge gø wää dhaaŋŋøgø, kiper eni nyeŋ dhaagø mo dëër dïcwøø poot kuue araanynye dï jø Icriel. Ni ö dhaaŋŋøgø ni put bëëtö na cïïe. 'Ba kär eni pää ki dhaaŋŋøgø këël yïth nïr kwøw moe bëët.

²⁰«'Ba ni näk gïna caan dïcwøø beeye adïëri, ni dhaagø manøgø ojoodø ni paa dhaagø mo dëër dïcwøø poot kuue kanya nywømge rege,

²¹dhaaŋŋøgø wär kälge wøk dhi øt wänni, ni ö cwøwi mo päänyögø ni këërge gø ki kïte ni thøøe, kiper ena tïïö ki gïn mo raac dï Icriel, ni eni tïïya käp øt wänni. Gïnögø otïïyu nou raanynya gïna raac na en dïïu.

²²«'Ba ni näk da ŋat mo omaa ki dhaaŋ paac, dïcwøønnøgø ki dhaagø manøgø karge riet wär 'nägu; nou raanynya gïna raac dï Icriel.

²³«'Ba ni näk da nyakøø mo dëër dïcwøø poot kuue, mo onø miek, ö jooti ŋat mørri dï pääny ni bute ki gø,

²⁴geni karge riet wär kälu wøk dhi kiir kar acooŋa mar pääny manøgø, ni këëru ge ki kïte nee thøwge. Nyakøø manøgø doo nääö kiper na käre köök dï pääny kanya magi ya nyenøgø, ni ö dïcwøø manøgø ni nääi kiper mana gøø cï watge piny. Gïnögø otïïyu nou raanynya gïna raac na en dïïu.

²⁵'Ba ni näk dïcwøø nyakøø mana näk omiiø ee joodø dï pwödhö, ni ö dïcwøø ni mak gø ki teek ni bute ki gø, dïcwøø manøgø keere wär 'näk.

²⁶'Ba kär dee gïn tïïyu dëër nyakøø, kiper bäŋ gïn mo ee tïïö mo rømø ki thøø. Kiper gïna tïïc dïcwøønnøgø dëëre caala man wø ö dhaanhe maal jaak, ni 'näk watge.

²⁷Kiper kanya joot nyakøønnøgø na näk omiiø enø yi pwödhö, nyakøønnøgø aköök, 'ba bäŋ ŋat mo ö kuna køny gø.

²⁸«'Ba ni näk dïcwøø jïtö ki nyakøø mo dëër dïcwøø poot kuue, mo kär miiø, ni mak gø ki teek ni bute ki gø, noo joot geni,

²⁹ŋatøgø wär cïpe jï wää nyakøønnøgø ki gwet-bïrö ma cekelli ma pïërabïïc, ni ö nyakøønnøgø ni put tïmö na dhaagø mare, kiper mana mak gø ki teek. 'Ba kär eni pää ki nyaanøgø ki yïth nïr kwøw moe bëët.

³⁰«Kär dee ŋat lwør cï wänni nee tïme na cïïe, nee wänni ba pääde ni døøc gø mo jööt.