Read anuak Tiet Ciik 23 Bible Online

Tiet Ciik 23 - anuak bible

Tiet Ciik 23

¹«'Ba kär dee ŋat mo odïnö wala ŋat mo oŋølø mo dunynya dï acooŋa mar Wuuö Jwøk.

²«Kär dee dhaanhø ma kwälle mo joot ka dïcwøø mør mo dunynya dï acooŋa mar Wuuö Jwøk; ni bäŋe nyïïkwaaye mo døny dï acooŋa mar Wuuö Jwøk këël mano këët ri beenhnhe apaar.

³«Kär dee ŋat Amön wala ŋat Möap mo dunynya dï acooŋa mar Wuuö Jwøk; ni bäŋe nyïïkwaacge mo døny dï acooŋa mar Wuuö Jwøk këël mano këët ri beenhnhe apaar,

⁴kiper ge kär ö kuna jølge uuni ni ge käädö ki pïï ki caammi kanya enu øtjöö nou ö wøk ka Ijep. 'Ba geni Beelam o Beeyör na käl yi Patura na en Mecöpatemia aŋeewge ki gwel kiper nou ciene.

⁵'Ba Wuuö Jwøk na näk Jwøu kär jïëy ki man leŋ gïr Beelam. Wuuö Jwøk na näk Jwøu acïëni mana di u cienø ki gø atïïe na gwïëth kiperu, kiper eni mëër ki uuni.

⁶'Ba ki yïth nïr kwøw mou bëët, käru cädu kiper jøøgø ki man jïtge ki bëëtö mo beer ki bëët kwär.

⁷«'Ba käru männö ki ŋat Ëdöm, kiper ena tuuŋu, ni ba männu ki ŋat Ijep, kiper uuna bëëdö ni uuna wëëlle yi ŋööm poge.

⁸Nyïïkwaacge moo nywøl ri dää beenhnhe moge dï ŋöömmu, løny jïge ki man dønyge dï acooŋa mar Wuuö Jwøk.

⁹«'Ba kanyo wäru cou wøk baŋ leny baŋ nyïïmännu, rou dou gwøø ki gïï mo reyø bëët.

¹⁰Ni näk da dhaanhø dïïu mo dëëre ba waany kiper gïna näk ee tïïö ki dï wäär, eni doo cøøa wøk ŋää twïër, ni ba laar duu yi twïër.

¹¹'Ba kanyo tïm pinynyi na abøøya, eni dëëre dee lwøø ki pïï. Køøre kanyo päth cäŋŋi, eni doo cäŋa duu yi twïër.

¹²«Jïïu doo da töök wïth mäc deŋ twïër, na kwör mou cøøa wøk yïthge.

¹³Ni røk jap tïïc mou doo da cääle, ni kany wø näk dhaanhø cøøa wøk töök wï maac, eni doo kunyö ki buur ki caala, ni cäŋ ŋöömö dwøk bäät gïïa reyø, ni buuŋa gø.

¹⁴Kiper Wuuö Jwøk na näk Jwøu cäädhö dï twïër maru, nou kønye ceŋ nyïïmännu, ni bööt geni nyïmmu. Kiper manøgø nø, dï twïër maru doo bëëdö ni tøŋ, ni bäŋ gïn mo raac mo joode dïïu, kiper nee ree ba paanye buutu.

¹⁵«'Ba no dee laŋŋø mo päära wøk buut kwääye ö rïŋ baŋ dhaanhø, kär dwøk baŋ kwääye.

¹⁶Eni doo bëëdö ki ŋatøgø ni ena dïïu kanyo met yie ki gø noo jiere jaak røk päänye mou. 'Ba kär dee gïn mo raac mo tïïyu dëëre.

¹⁷«Kär dee dhaagø dëët nyïïakuk Icriel wala dïcwøø dëët wäät Icriel mo tïïö ki tïï käp yïth kwör lam mo juu møøk.

¹⁸Kär dee gwel mo joot dhaage ki køør käp, wala mo joot cwøwi ki køør man wø døøge dëëtge keerge mo kälu øt Wuuö Jwøk na näk Jwøu na muuce mo doo cïbö ki køør kööŋ maru, kiper tïïe moøgø karge riet Wuuö Jwøk na näk Jwøu yie raac ki geni.

¹⁹«Kär japu wëëgu mac ni bäätge da mëëdi jï jø pou, teeŋ ka gwel ki caammi wala gïn mør jaak mo løny ki man maai ni duue ni bääte da mëëdi.

²⁰Løny jïïu ki man wëëgu japu mac jï juurre, ni duuge gø ni bäätge da mëëdi. 'Ba ki jø pou käru cwötö ki mëëdi bäätge, kiper nee Wuuö Jwøk na näk Jwøu nou gwïëdhe ki jammi bëët moo tïïyu yi ŋöömmo ni kare cään ki man pïïyu yie enø nou lwørru na maru.

²¹«Kanyo wäru kööŋŋu ki gïn mo cïpu cïbö jï Wuuö Jwøk na näk Jwøu, kär gïnöca ruu ni ba laaru cïp, kiper Wuuö Jwøk na näk Jwøu u pëënynye pëënynyö ki gø; kiper ni näk mo käru cïbö, tïmö na raay bäätu.

²²'Ba ni näk mou ba kööŋ ki gïn mo cïpu cïbö, ba tïmö na raay bäätu.

²³'Ba rou dou gwøø ki man tïïyu gïno ö wøk ki dhøgu, ni beeye gïno kööŋŋu ki gø ki køør met ec maru jï Wuuö Jwøk na näk Jwøu ni cïpu cïbö.

²⁴«'Ba ni näk mo dhaanhø cøøa yi pwöth omøki mar watge, løny jïre ki man cäme ki nyïïomøki këël mano jäŋe døc. 'Ba kär dee gø mo kääre.

²⁵'Ba ni näk mo dhaanhø cøøa yi pwöth beel mar watge, løny jïre ki man ture røk wïth beel ki cere. 'Ba beel mo watge kär kaa piny.