Read anuak Tiet Ciik 24 Bible Online

Tiet Ciik 24 - anuak bible

Tiet Ciik 24

¹«'Ba ni näk mo dhaanhø nyöömmö ki dhaagø ni kïth gø paare, ni tïm yie ni ba met ki gø, kiper mana jïte ki gïn mo raac ri bëëtö mare, ni ö eni ni gööde ki wëël apääk, ni cïp gø cere, ni riem gø wøk paare,

²ni ö dhaagø manøgø ni wec paare, ni aae, ni tïme na cï ŋat mør,

³ni näk mo cwøre manøgø thuwø ocäŋ männö ki dhaaŋŋøgø, ni gööde ki wëël apääk, ni cïp gø cere, ni riem gø wøk paare, wala dïcwøø mana nywøm gø cään thøw,

⁴kär cwøre mana dïkwøŋ na riem gø cäŋ døø baŋ gø na cïïe, kiper dhaagø manøgø dëëre ba waany këët, ni teeŋ nywöm manøgø beeye gïn mo raac nyïm Wuuö Jwøk na näk Jwøu. Kär raay mo caala teeŋ gïnögø kïthu yi ŋöömmo cïp Wuuö Jwøki na näk Jwøu noo dööŋ jïïu.

⁵«'Ba ni näk mo da ŋat mo cïïe ee tïŋö kany mo cään, kär ci baŋ leny ki jø leny na aciel; këël tïïc mo kïtha bääte, kär dee gø. 'Ba eni doo bëëdö paare jaak ki cwiir aciel bäre, nee yi cïïe mana näk ee nywømø døøc mo met.

⁶«Kär dee ŋat lwør kïn guur man wø gudö ki gø na dïgïti, kiper manøgø caala lwør jwïëc dhaanhø.

⁷«'Ba ni näk mo da dhaanhø mo ŋat poge ee kwalø røk jø Icriel, ni tïïc gø kaamar laŋŋø wala ŋeewa gø ki dhaanhø mør, kuu manøgø noo maai, wär eni 'näk, nou raanynya gïna raac na en dïïu.

⁸«Kany wø näk da ŋat mo dëëre da dhøøbø,[7] rou wär gwøgu døc ki man kïthu luup bëët bäät tïïc mo wø caan dïlämme jïïu, ni beege jø tuuŋ Libay. 'Ba rou dou gwøø møn ki man kïthu luup bëët bäät tïïc moa caana jïge kiper teeŋ täw manøgø.

⁹Parru wïthu ki gïna tïïc Wuuö Jwøki na näk Jwøu dëër Mariyam øtjöö, kanya ööu wøk ki Ijep.

¹⁰«'Ba kany wø näk da dhaanhø mo wëëga gïre mac jï watge, kär døny yi øt watge kiper nee gïna dee cïbö na dïgïti lwøre.

¹¹Wär cuŋŋe wøk, ni ö ŋata mac jape ni käl dïgïti wøk baŋe.

¹²'Ba ni näk mo ŋata mäyö can, kär gïna cïbe na dïgïti but buut ŋata jape mac.

¹³'Ba kanyo päth cäŋŋi, ni näk dïgïti mana cïbe beeye aleeŋŋa, wär dwøge jïre, nee rëëbe ka aleeŋŋa mare, nee ŋata jape maae gwïëdhe; køøre otïmö ni bëënynyö jï ŋata jape mac nyïm Wuuö Jwøk na näk Jwøu.

¹⁴«Ŋat mo can mo tïïö ka gwel, nee ŋat pou wala jur mo bëëdö pou dï pääny maru, kär caanni.

¹⁵Gwete wär cool jïre ki yi cäŋ cooth, kanyo poot cäŋŋi ni poot kär pädhö, kiper eni can, ni cwïnye lääŋŋa gwete. Gwete wär cïp jïre, nee ba dwaalle ki nyeŋ dhaanhø nyïm Wuuö Jwøk, kiper nee ba tïme na raay bäät dhaanhø.

¹⁶«Wëëe ba doo nääö kiper gïïa tïïc obwöre moge, no obwöre ba doo nääö kiper gïïa tïïc wëëkge. 'Ba ŋati man nø doo thøw ni thuunhnha raaye keere.

¹⁷«Luum jur mo bëëdö dïïu wala luum kïïc kär daaŋŋi kar løøk, ni ba käl abïï cï thøø na dïgïti.

¹⁸'Ba wïthu dou caarø ki kanya bëëdu ni uuna laaŋe Ijep, na ö Wuuö Jwøki na näk Jwøu na wïïl uuni wøk kaace, ni beeye tiere ni köömma uuni ki gïï ii nee tïïyu.

¹⁹«'Ba kany wäru kayu caammi mou yïth pwöth mou, ni näk dhaanhø wïïe wïl ki ŋaaŋa yi pwödhö mare, kär eni døø baŋ gø. 'Ba wär wiie kiper ŋat ma jur mo bëëdö dïïu, ki dhaanhø ma kïïc, ki dhaagø ma cï thøø, nee Wuuö Jwøk na näk Jwøu nou gwïëdhe ki køør tïïe bëët mo wø tïïyu ki ceŋŋu.

²⁰Kany wäru diemmu nyïïjaadha näk nyïïe di welø na maaw, kär nyïïe lemmu këët. 'Ba wär weyu kiper ŋat ma jur mo bëëdö dïïu, ki ŋat ma kïïc, ki dhaagø ma cï thøø.

²¹Kany wäru pønnu nyïïomøki yïth pwöth omøki mou, kär nyïïe lemmu këët. Wär weyu kiper ŋat ma jur mo bëëdö dïïu, ki ŋat ma kïïc, ki dhaagø ma cï thøø.

²²'Ba wïthu dou caarø ki kanya bëëdu ni uuna laaŋe yi ŋööm Ijep, ni beeye tiere ni köömma uuni ki gïï ii nee tïïyu.