Read anuak Tiet Ciik 25 Bible Online

Tiet Ciik 25 - anuak bible

Tiet Ciik 25

¹«'Ba ni näk mo da pïëm mo otägö yïthakic jiy keerge, ni cige baŋ løøk, dïŋut luup luubö marge dege ŋølø, ni ö ŋata mare beer ni ŋunni, ni ö ŋata mare raac ni jääli.

²'Ba ni näk mo ŋata mare raac rømi ka pöödö, dïŋut luup ŋatøgø dee wëëk pïël piny ni pwödi nyïme ki yïth alaŋŋe mo orømø ki gïna baae.

³Løny jï dïŋut luup ki man wëëk ŋatøgø pwöt ki kwöre ma pïëraŋween. 'Ba kär näk mo kaala moøgø, kiper ni näk mo eni di pwödö ka alaŋŋe mo kaala moøgø, cöögu manøgø tïmö ni can ki waŋ.

⁴«Kär dee ŋat mo twöc dhi rwaath kany wø dïne ki beel.

⁵«Kany wø näk mo da nyïïmëëe mo bëëdö kanya ciel, ni thøw dhaanhe acielli dëëtge ni jïre bäŋ nyilaal ma dïcwøø, cï ŋata thøw ba doo nywøm dhaanhe mørri. 'Ba cöök cwøre doo cøøa baŋ dhaagø manøgø ni dööŋe ki gø, ni caatha køør kööŋŋö man wø dööŋ dhaanhe ki cï mädhö.

⁶Køøre nyilaal mano nywøl dhaaŋŋøgø dïkwøŋ, nyeŋ gø doo gööra ri nyeŋ wänni mana thøw, kiper nee nyeŋ wänni ba rwäänye dï Icriel.

⁷'Ba ni näk mo ŋatøgø ba many man dööŋe ki cï coki, cï coki doo cøøa dhi kiir kar acooŋa baŋ jø døøŋŋø, ni kööe, ni ‹Cöök cwøra akweer ki man tïïc nyeŋ coki nee bëëde ni di cwølø dï Icriel. Ena kweer ki aani, ki man caath køør kööŋŋö man wø dööŋ dhaanhe ki cï mädhö.›

⁸Køøre jø døøŋŋø mo päänya bëëde yie, ŋatøgø dege cwølø ni cäänge ki gø. 'Ba ni näk mo gïr kweer poot nutö cwïnye, ni kööe, na ‹A ba many dhaaŋŋøgø naa dööŋa ki gø,›

⁹cï coki doo ööa baŋ gø nyïm jø døøŋŋø, ni käl warø wøk tier jwöre, ni ŋuut täärnyïm gø ki laaw. Køøre dhaaŋŋøgø mare dee caanø, ni kööe, ni ‹Man beeye teeŋ gïno tïïc dëër ŋat mo wï po coki ba geere.›

¹⁰Køøre dhi øt poge nyeŋŋe doo cwølø dï Icriel bäre, ni ‹Dhi øt ŋata näk waye ogööny wøk.›

¹¹«Ni näk mo jiy ariiø ge këëdö, ni beeye dhaanhø ki watge, køøre ni ö cï dhaanhø aciel dëëtge ni cwak cwøre ki ŋata këëtge ki gø, ni jïïr jak dhaanhø maya,

¹²cer dhaaŋŋøgø wär ŋul wøk. Kär cwïnynyu pädhö ki gïre.

¹³«Kär dee nywïëc røm mo mëëjaan ma teeŋi yïth opïri mou, ni mør dwøŋ ni maya thiinh, na mo møt.

¹⁴Kär dee gïï røm ma teeŋi yïth uudi mou, ni mør dwøŋ ni maya thiinh.

¹⁵'Ba wär tïme ni jïïu da nywïëc røm mo mëëjaan ma karge mo ba mudö, ki gïï røm ma karge mo ba mudö, kiper nee nïr kwøw mou tïmge ni thööth yi ŋöömmo cïp Wuuö Jwøki na näk Jwøu jïïu enø.

¹⁶Kiper ŋat mo tïïya teeŋ tïïögø na tïï møt enø, Wuuö Jwøk na näk Jwøu yie raac ki gø.

¹⁷«'Ba parru wïthu ki gïna tïïc jø Amalëk dëëtu øtjöö kanya ööu wøk ki Ijep,

¹⁸kanya öge baŋu øtjöö ni 'näkge jiy bëët moa näk oööl dëëtu na näk odööŋ cään, kanya bëëde ni uuno ööl ni dëëtu oøøc piny, ni geni ki dëëtge ge kär lwäyö ki Wuuö Jwøk.

¹⁹'Ba kanyo tïme ni Wuuö Jwøk na näk Jwøu u di mooø ki jwöm ceŋ nyïïmännu bëët moa en lagu yi ŋöömmo cïbe jïïu nee dööŋe na maru, kar kaaca nyeŋ jø Amalëk dou raanynyø ni tïme ni kuc bäät piny. Kär wïthu wïl!