Read anuak Tiet Ciik 28 Bible Online

Tiet Ciik 28 - anuak bible

Tiet Ciik 28

¹«'Ba ni näk mo dwør Wuuö Jwøk na näk Jwøu leŋŋu leŋø, ni gwøgu ciik moe mo köömma uuni ki ge dïcäŋi en, ni kïthu ge bäät tïïc, Wuuö Jwøk na näk Jwøu u tïïe tïïö nou ena maal wïth juurre bëët mo bäät piny.

²Kiper ni näk mo dwør Wuuö Jwøk na näk Jwøu leŋŋu leŋø, gwïëth moi bëët ööa bäätu, ni bëëtge ni ena dëëtu:

³«U di gwïëdhö yïth päänye mou, ni gwïëth uuni yïth pwöth mou.

⁴«Obwöre mou moo nywøllu ogwïëth, ni gwïëth caammi moo ciek yïth ŋøøm mou, ki lääc paac mou ni beege dhäk mou ki dïëk mou, nee thöönhge.

⁵«Arööt mou ki dääk thaal mou mo wø tïïu ki geni ogwïëth.

⁶«Uuno gwïëth ki yïth tïïe mou bëët, kany wø cou wøk ki yïth mïëyu ki kany wø duu mïëyu.

⁷«Wuuö Jwøk nyïïmännu owëëk böötö nyïmmu kanyo öge maal kuna këëtge ki uuni. Ge ööa wøk baŋu ni ge caatha øtjöö aciel; 'ba ge bwøk nyïmmu ni reŋge ki uutjïëthe abïriiø.

⁸«Wuuö Jwøk na näk Jwøu gwïëth jääŋŋe jääŋŋö bäätu ki bäät caammi mou moa en yïth odïï mou ki bäät gïïo tïïyu bëët ki ceŋŋu, ni gwïëth uuni yi ŋöömmo cïbe jïïu.

⁹«'Ba Wuuö Jwøk na näk Jwøu ni näk mo ciik moe gwøgu gwøø, ni caathu køøre, u tïïe tïïö ni uuna jiy mo ena kur keerge kiper dëëre, kaawat mana kööŋe ki gø jïïu.

¹⁰Kanyøgønø, ojoot jø bäät pinyi bëët ni uuna jiy mo cwøla ri nyeŋ Wuuö Jwøk. Køøre ge puta lwäyö ki uuni.

¹¹Ni ö Wuuö Jwøki ni meet jap kwär mou ni thööth, ki mano täge ko obwöre mou moo nywøllu, këël lääc paac mou, ki caammi moo ciek yi ŋöömmu, ni beeye ŋöömma kööŋ Wuuö Jwøki kipere jï kwäyu ni cïbe cïbö jïïu.

¹²«Wuuö Jwøk kar kän mare na näk maal di jabø jïïu kiper nee cïpe ki køth ki kanya näk kare kiper ŋöömö maru, nee gïï wø tïïyu ki ceŋŋu nee gwïëdhe. Ni tïme ni løny jïïu ki man wëëgu japu mac jï wïth juurre mo thööth; 'ba uuni, u ba mäyi.

¹³Ni ö Wuuö Jwøki ni tïïc karu ni dwøŋ, ni ba tïmu nou ena piny. Ni tïmu ni karu ena maal, ni ba tïmu nou ena tiet jiy. Gïïögø tïïc Wuuö Jwøki tïïö jïïu ni näk mo ciik moe mo köömma uuni ki ge dïcäŋi en leŋŋu leŋø ni gwøgu ge na karge.

¹⁴'Ba käru gaa wøk bäät caam wala bäät cwïïc røk luup moi mo köömma uuni ki ge dïcäŋi en, ki man caathu køør juu møøk ni tïnynyu geni.

¹⁵«'Ba ni näk mo dwør Wuuö Jwøk na näk Jwøu ba leŋŋu, ni ba gwøgu ciik moe mo köömma uuni ki ge dïcäŋi en, ni ba kïthu ge bäät tïïc, acëënne moi bëët ööa bäätu, ni bëëtge ni ena dëëtu:

¹⁶«Acïëni oen bäätu yïth päänye mou, na acïëni oen bäätu yïth pwöth mou.

¹⁷«Arööt mou ki dääk thaal mou mo wø tïïu ki geni ocien.

¹⁸«Obwöre mou moo nywøllu ocien, ni cien caammi moa doo ciek yïth ŋøøm mou, ki dhäk mou, ki dïëk mou nee ba thöönhge.

¹⁹«Acïëni oen bäätu ki tïïe mou bëët, kany wø cou wøk ki yïth mïëyu ki kany wø duu mïëyu.

²⁰«Wuuö Jwøk acïëni, ki kier wïc mo päl, ka ajäla, jääŋŋe jääŋŋö bäätu ki bäät tïïe bëët mo wø tïïyu, këël mano ränynyu ni laaru thumö ki køør gïïa reyø noo tïïyu kanyo weyu eni.

²¹Wuuö Jwøk täwe mo leth owëëk nieŋ dëëtu, këël mano thöör uuni yïth ŋøøpo cou yie noo lwørru na maru.

²²Wuuö Jwøk u di raanynyø, ni dwaat uuni, ni mooc dëëtu ka adïrïgi mo dwøŋ, ni jääŋ cäŋ mo kwaar bäätu, ni tïïc piny ni lïëth, ni taal piny, ni raany pwöth mou ki køør döök ka akwøk. Ni ö gïïögø ni tïmge ni caatha køøru cooth, këël mano thummu.

²³Ni ö maalli ni en bäätu enø ni tïme ni lïëth ni paŋŋi kaamar jwïël, ni ö pinynyi ni en tietu enø ni tale ni tïme ni teek kaamar nywïënyö.

²⁴Wuuö Jwøk køth mana doo päth bäät ŋöömmu di tïïö na tør, ni pänhnhe ki maal ni ö piny bäätu, këël mano thöör uuni.

²⁵«Wuuö Jwøk u wëëge böötö nyïm nyïïmännu. U aa wøk baŋ leny baŋge nou caatha jöö aciel; 'ba u bwøk nyïmge ni reŋu ki uutjïëthe abïriiø, ni ö wïth juurre mo bäät piny ni bwøk cwïnyge ki gïïa tägö dëëtu.

²⁶Ni ö rïk dëëtu ni tïmge na cam jï wec maal ki jï lääc paap mo bäät piny. Ni tïme ni bäŋ dhaanhø mo riem geni bäätu.

²⁷Wuuö Jwøk u di jäälö ni mooc dëëtu ka atwøt mo caala moa tïïe dëët jø Ijep, ki børi ka ajøra ki tïla, ni beege ŋwiili mo ba løny ki man caŋge dëëtu.

²⁸Wuuö Jwøk u di jäälö, ni mooc uuni ki bøølø ki cöörö ki lwär mo päl.

²⁹Uuno tïmö nou thäämmö ki dïcäŋ jaak, ni caala man wø thääm cwørri yi muudhö. Ni bäŋ gïn mo beer mo jootu ri jammi mo wø tïïyu bëët. 'Ba gïno jootu keere beeye caannø ki twier jammi mou cooth, ni tïme ni bäŋ ŋat køny uuni.

³⁰«Dhaanhø mëëgö ki nyakøø nee nywøme, 'ba dïcwøø mør oci baŋ gø na dhaagø. Dhaanhø gëëdö ki øtø, 'ba eni ba bëëdö yie. Dhaanhø pïïdhö ki nyïïjenni, 'ba nyïïge ba came.

³¹Dhieŋ mar dhaanhø di ŋaalø nyïme ni nëënö jïre ki waŋe, 'ba rïŋ gø ba came. Arëën mar dhaanhø di kälö ki teek, ni ba duui jïre. Dïëk mo dhaanhø ocïp jï nyïïmänne, ni dööŋe jaak ni bäŋ ŋat køny eni.

³²'Ba uuni, wäätu ki nyïïu ocïp jï jø møøk, ni ö nyeŋŋu ni talge køørge, ni jwöŋu kiperge cooth; 'ba bäŋ gïn mo løny jïïu ki tïïc.

³³Caammi mou moo ciek yi ŋöömmu, ki gïïa jootu ki køør öölö maru, ocam jiyi møøk mo dëëtge kuyu; 'ba mano jootu keere beeye thiel piny ki caannø cooth.

³⁴Ni tïmu ni uuna bøøre ki køør gïïo neennu ki nyeŋŋu.

³⁵Wuuö Jwøk wïth cøŋŋu ki tietu di mooø ka atwøt mo ba maar køny, na atwøt moøgø tägi ka thäc tietu këël mano këët wïthu.

³⁶«Wuuö Jwøk uuni ki ŋato røønynyu na nyeya maru, u kïthe baŋ wï jur mo kuyu mo kuc kwäyu thuwø, ni tïnynyu juu møøk kaace, ni beege jenni ki kïte mo otieŋø.

³⁷Køøre u tïmö ni uuna jiy mo cwïny bwøk ki geni kiper gïïa tägö dëëtu, ni tïmu ni uuna jø wø ŋäät dëëtge, ni bëëdu ni uuna gïr waac dï juurre bëët kwöro ö Wuuö Jwøki noo keeth uuni yïthge.

³⁸«Uuno pïïdhö ki köödhi mo thööth yïth pwöth mou; 'ba mo nøk keerge beege noo kayu, kiper ge cam bäänyö camø.

³⁹Uuno pïïdhö ko omøki, ni jiiŋŋu geni ni beyø, 'ba bäŋ køøŋ pï nyïïge mo maathu rege, wala nyïïge mo pønnu pønø, kiper ge raany twöŋi raanynyø.

⁴⁰Ni ö ŋöömmu bäre ni tïme ni da nyïïjenni mo di welø na mädhi; 'ba dëëtu ba wïïrru ki mäthge, kiper nyïïge när ni päthge piny jaak.

⁴¹Uuno nyöödö ko obwöre ma cwøw ki ma mään, 'ba ge ba bëëdö na mou, kiper ge di maaø ki tøŋ, ni käl ge.

⁴²Bäänyö öö bäät jenni mou ki caammi bëët moa en yi ŋöömmu, ni thöör geni.

⁴³«Juurre mo wø bëëdö dïïu ööa maal bäätu, ni tïm bëëtö marge ni cäätha maal, 'ba bëëtö maru odøø piny ni tïme ni cäätha piny.

⁴⁴U tïmö nou määö baŋ juurre moøgø, 'ba ge ba mäyi baŋu. Geno tïmö ni kwörge døøŋŋø, 'ba uuno tïmö nou ena piny.

⁴⁵«'Ba acëënne moi ööa bäätu ni cääthge køøru, ni tïmge ni ena dëëtu, këël mano dïïr wïthu bëët, kiper mana käru dwør Wuuö Jwøk na näk Jwøu leŋø, ki man gwøgu ciik moe moa kööm uuni ki ge.

⁴⁶'Ba acëënne moøgø tïmö na nyuuthe ki gïï mo rëëma ec bäätu ki nyïïkwaayu na bäre bäre.

⁴⁷'Ba ni näk Wuuö Jwøk na näk Jwøu ba tïnynyu ki met ec ki cwïny mo leer ki køør jammi moa thööth jïïu,

⁴⁸nyïïmännu moo jääŋ Wuuö Jwøki baŋu otïnynyu nou can ki jammi bëët, ni dëëtu da käc ki riew ki wääth røk; ni ö Wuuö Jwøki ni kïth ajäla mo teek bäätu, këël mano thöör uuni na bäre.

⁴⁹«Wuuö Jwøk känna bäätu ki wï jur mo käla kany mo bäär ya aŋuun piny, ni läänge baŋu ka man wø lään coorri piny, ni beeye wï jur mo dhøkge ba wïnynyu,

⁵⁰na wï jur mo täärnyïmge di lwäärö, mo jø døøŋŋø ba wøørge, ni bäŋ mëër mo nyoothge jï obwöre.

⁵¹Ni camge lääc paac mou, ki gïïa näk ociek yi ŋöömö maru, këël mano raanyge uuni, ni bäŋe cam mo wecge jïïu, wala pï omøki, wala mädhi, wala dhäk mou, wala dïëk mou, këël mano thöörge uuni.

⁵²Ni rumge päänye mou bëët dïër, këël mano ö kiiri moa bäyö na näk ogeerø ni teek ni wø ŋääthu ni nyaage ge piny dï pou bäre, ni putge uuni rum dïër yïth päänye mou bëët, yi ŋöömma cïp Wuuö Jwøki na näk Jwøu jïïu.

⁵³«Køøre kanyo ö nyïïmännu noo rumge uuni dïër, ni caange uuni, kar kaace u døøa dëëtu ni cammu obwöre mou moa näk cwøw ki moa näk mään, na cïp Wuuö Jwøki na näk Jwøu jïïu.

⁵⁴Këël dïcwøø mo ena dïïu mo jwøny mo cïïre tar, tïmö ni män ki coki, ki cïïe na mëëre ki gø, këël nyïïe moa dööŋ,

⁵⁵ni bäŋe dhaanhø aciel mo mooe røkge kanyo cam obwöre moe, kiper mana bäŋe gïn mør moo dööŋ jïre mo came, kanyo ö nyïïmännu noo rumge uuni dïër, ni caange uuni yïth päänye mou bëët.

⁵⁶Këël dhaagø thuwø mo ena dïïu mo jwøny mo cïïre tar, mo ba cäädhi dï paac, tïmö ni män ki cwøre na mëëre ki gø, këël wääde ki nyaare,

⁵⁷ni tïm cwïnye ni päl ki man cam obwöre moo nywøle ki bïërö mano ö wøk ki dëëre, ni put geni cam ni ee kanø, kiper mana bäŋe gïn mør moo dööŋ jïre mo came, kanyo ö nyïïmännu noo rumge uuni dïër, ni caange uuni yïth päänye mou.

⁵⁸«'Ba ni näk røgu ba gwøgu møn ki man kïthu ciik moi bëët bäät tïïc no ogöörö yi wëëlö man en, nou ba lwäär ki nyeŋ Wuuö Jwøk na näk Jwøu, ni beeye nyeŋ ajiem mo di wøørø,

⁵⁹Wuuö Jwøk känna bäätu ki bäät nyïïkwaayu ki gïï mo leth døc mo døøŋŋø mo nieŋ dëëtu, ki täwe mo reyø mo ba caŋŋi.

⁶⁰Eni täwe bëët moa en Ijep na lwäärru ki geni okäl bäätu, ni nieŋge dëëtu.

⁶¹Këël wïth täwe bëët, ki gïï mo leth døc mo kär göörö yi wëël ciik man, okäl Wuuö Jwøki bäätu, këël mano thummu.

⁶²Këël na bëët kwäännu ni thööth kaamar ceer mo maal, kwäännu tïmö ni nøk, kiper dwør Wuuö Jwøk käru leŋø.

⁶³'Ba kaawat man bëët Wuuö Jwøki ni yie met ki uuni en, ni bëëtö maru ee tïïö ni beer, nou ee tïïö nou thööth, Wuuö Jwøk yie otïmö ni met ki man raany uuni thuwø, ni dïïr wïthu. U cööde wøk ki yi ŋöömmo cou yie enø nou lwørru na maru.

⁶⁴«Wuuö Jwøk u di keethø dï wïth juurre moa en bäät piny bäre; ni tïmu nou lama juu møøk mo kuyu mo kuc kwäyu thuwø, ni beege jenni ki kïte mo otieŋø.

⁶⁵'Ba u ba jïti ki jwöm dï wïth juurre moøgø, ni ba jïtu ki kany këët tietu piny yie kaace. Ni kanyo enu kaace, Wuuö Jwøk uuno tïïe ni cwïnynyu böö, ni tïïc nyeŋŋu ni can, ni tïïc u nou jägö døc.

⁶⁶Køøre uuno bëëdö ni cwïnynyu böö jaak, ni bëëdu nou lwäär ki wäär ki dïcäŋ, ni kwøw maru ba ŋääthu.

⁶⁷'Ba ki køør lwär man wø en cwïnynyu, ki gïï wø neennu ki nyeŋŋu, kany wø tïme na amöölla, u wø köö, na ‹?Aŋø, wäär laar öö wäne nø?› Ni kany wø tïme na wäär thuwø, u köö, na ‹?Aŋø, øw laar ruue wäne nø?›

⁶⁸'Ba kaa mana wäŋŋa nou ba døø Ijep këët, Wuuö Jwøk uuno dwøk Ijep ki yïth baabuure. 'Ba kanyo pïïyu kaace, uuno ci baŋ nyïïmännu nee u ŋeewge, nou tïmu ni uuna laaŋe jïge, ni beege u na cwøw ki mään bëët; 'ba otïmö ni bäŋ ŋat ŋeew uuni.»