Read anuak Tiet Ciik 3 Bible Online

Tiet Ciik 3 - anuak bible

Tiet Ciik 3

¹«Køøre øøna tïŋŋö ni cørø jöör wø ci Baacan, ni ö Ög nyeny Baacan ki jiye bëët ni öge wøk baŋ leny ki øøni, ni røømmø ki geni buut päänya cwøl ni Edaray.

²'Ba Wuuö Jwøk aköö jïra, ni ‹Kärï lwäyö ki eni, kiper eni yaa nø cïp cerï ki jiye ki ŋöömö mare bäre. Ni ö teeŋ gïna tïïyï dëër Cëëwön nyeny jø Amör, na bëëdö Ëcbön, ni tïïyï gø dëëre.›

³«Køøre Wuuö Jwøk na näk Jwøø, Ög nyeny Baacan ki jiye bëët acïp ceŋŋø thuwø, ni nääø geni këël mana tïme ni bäŋ dhaanhø aciel mo obøth.

⁴'Ba kar kaace päänye moe bëët aputø mac, ni beege päänye ma pïërabïciel moa en kanya cwøl ni Argöp bäre, ni bäŋe pääny mo odööŋ mo kärø lwørø ceŋge, ni beeye ŋöömma en cer Ög nyeny Baacan.

⁵'Ba päänye moøgø bëët beege päänye mo kiiri moge ogeerø ni teek ni bäyö, ni dhøkge ocïëgö ko odhuule, no odëëdö ki dïdëëte. Ni maaø mïëri mo thööth thuwø mo kär geerø ki kiiri.

⁶Ni raanynyø päänye moøgø na bäre bäre, ni nääø cwøw ki mään ko obwöre bëët moa en yïth päänye moøgø, kaawat mana tïïø dëër Cëëwön nyeny Ëcbön.

⁷'Ba lääc paac moge bëët, ki japa twierø yïth päänye, akälø ni tïmge na moø.

⁸«'Ba kar kaace ŋøøm alwørø ceŋ nyeye mo jø Amör moøgø na ariiø yøø, na en løø Naam Jördan løøi, ki mana täge ki Naam Arnön, këël mana këët Kïn Armön.

⁹'Ba ki baŋ jø Caydan, Kïn Armön wø cwølge ni Ciriyön, ni ö jø Amör ni cwølge gø ni Canër.

¹⁰Køøre päänye bëët moa en pwöla, ki ŋööm Gelät bäre, ki ŋööm Baacan bäre alwørø, këël mana këët Caleka ki Edaray, ni beege päänye moa bëën nyenynya cwøl ni Ög na en Baacan.

¹¹'Ba Ög nyeny Baacan, kanya poode ni eni kär thøw, beeye eni keere na no odööŋ ri juna cwøl ni Rapayim. Pëëm mare beeye pëëm nywïënyö, ni poot di joodø po nyïïkwaac Amön, päänya cwøl ni Raaba. Bäc pëëm manøgø beeye rumme abïŋween, ni dööŋ yie beeye rumme aŋween, mo røm ka cenø.

¹²«'Ba kar kaace ŋöömö alwørø, ni cïpa ki ŋøøm jï jø tuuŋ Ruben ki jø tuuŋ Gaat. Ni ŋöömmögø tägi ka Aröör, paana en bäät Naam Arnön, na aŋuunne beeye thääŋ ŋööm Gelät, na en mïëya en bäät kïte, ki päänye moe.

¹³Ni ö thääŋ ŋööm Gelät mana dööŋ, ki Baacan bäre na en cer nyeya ma Ög, ni cïba gø jï thääŋ jø tuuŋ Maneeca, ni beeye Argöp bäre na näk ŋööm Baacan, ni wø cwøl ni ŋööm juna cwøl ni Rapayim.

¹⁴Køøre Jayer nyikwaar Maneeca ŋööm Argöp bäre akäle, këël mana këët waŋ keew mar jø Gëcur ki mar jø Maika, ni cwøl nyeŋ gø ni Mïëc Jayer ki køør nyeŋŋe, ni këël kawaane ennø Baacan poot cwøl ni Mïëc Jayer.

¹⁵'Ba thääŋ ŋööm Gelät mana cïba jï jø tuuŋ Maneeca, cïba jï nyïïkwaac Makir.

¹⁶Ni cïba thääŋ ŋööm Gelät maya jï jø tuuŋ Ruben ki jø tuuŋ Gaat, ni beeye ki mana täge ki kaagø, këël mana këët Naam Arnön, ni keew ena dï naam. Ni keew maya mana en jï løø kur tuul-cäŋ, ena tier Naam Jabök, ni beeye keew mar nyïïkwaac Amön.

¹⁷Ni keew mana en jï løø kur pänh-cäŋ beeye Naam Jördan na en dï gool mana cwøl na Araaba, ni tägi ka Puur Kinërët, këël mana këët Naam Araaba, ni beeye Naam Acäbö, na en tier Kïn Pedhega.

¹⁸«Køøre jøøgø aköömma kar kaace, ni kööa, ni ‹Wuuö Jwøk na näk Jwøu, ŋøøpøgø acïbe jïïu nee bëëde na mou. Ennø, u na cwøw leny bëët, beerra man ŋutu løø Naam Jördan løøga ni rou you jiiŋŋø kiper leny, ni bwøthu maal nyïm nyïïmëëgu ma jø Icriel.

¹⁹'Ba määru ko obwöre mou ki lääc paac mou, kiper ŋääa ni jïïu da lääc paac mo thööth, geni bëët ge doo dööŋ yïth päänye mou moa cïba jïïu.

²⁰'Ba jø pou okønynyu ki leny këël mano ö Wuuö Jwøki noo mooc geni ki jwöm ni tïm lenynyi ni bäŋgø, kaawat mana mooc uuni ki jwöm. 'Ba beeye këël mano kälge ŋöömö mana en løø Naam Jördan løøga noo cïp Wuuö Jwøki na näk Jwøu jïge. Køøre nø, uuno døø yi ŋöömö mana cïba jïïu, ni ö ŋati man nø ni døø kare.›

²¹«'Ba kar kaaca, Jøcua aköömma ni kööa, ni ‹Gïïa tïïc Wuuö Jwøki bëët na näk Jwøu røk nyeye moøgø na ariiø yøø, ni beege Cëëwön ki Ag, ajootï ki waŋï. 'Ba Wuuö Jwøk teeŋ gïnögø otïïe dëët mïëc nyeye bëët moo cou yïthge.

²²Kär nou lwäyö ki geni, kiper Wuuö Jwøk na näk Jwøu beeye eni kiree ni wø këëdi kiperu.›

²³«'Ba aani thuwø, Wuuö Jwøk akwaaa døc kar kaaca, ni kööa,

²⁴‹Wui Kwäärö Wuuö Jwøk, ïïna tägö ki man nyoothï dööŋö marï ki teek badï jïra, a na laŋŋï, kiper bäŋ teeŋ jwøk mør mo ena maal wala mo ena bäät piny mo løny jïre ki man tïïc teeŋ tïïe moøgø na døøŋŋø yøø na tïïyï ki køør teegï.

²⁵A kwaaya ïïni, wëëk a ŋut løø Naam Jördan løøga, nee ŋöömma beer na en løø Naam Jördan kaace jooda, ni beege mïëya en bäät kïte na beyø, ki kanya cwøl ni Libaanø.›

²⁶«'Ba Wuuö Jwøk awëër ki aani kiperu, ni käre mara wïnynyö. Ni kö Wuuö Jwøki jïra, ‹Man rømø nø. Kärï cäŋ cäänö ki aani këët kiper luummögø.

²⁷Ö maal ni ciï wï Kïn Pedhega, ni tïŋï wïïï maal ni neenï jï løø kur pänh-cäŋ, ki jï løø wï-piny ki jï løø tier-piny, ki jï løø kur tuul-cäŋ, ni neenï gø ki waŋï, kiper ï ba ŋut løø Naam Jördan løøga këët.

²⁸'Ba kööm Jøcua, ni cømï cwïnye nee bëëde ni teek, kiper beeye eni noo ŋut løøga noo cäädhi nyïm jøøi na bwödhi, kiper nee ŋöömö mano neenï enø nee ci jïge na marge.›

²⁹Køøre øøna dööŋ yi gool mana dïët ki päänya cwøl ni Bëëth-Pëëgör.»