Read anuak Tiet Ciik 31 Bible Online

Tiet Ciik 31 - anuak bible

Tiet Ciik 31

¹Køøre Modhe luup moi acäŋ caannø jï jø Icriel bëët;

²ni kööe jïge, ni «Aani, cwiiri moa beeda aløny ni dïpa ki pïërariiø ennø, ni wääth ki tïïc ba løny jïra këët. Wuuö Jwøk acäänö ki aani thuwø ni kööe, ni ‹Ï ba ŋut løø Naam Jördan løøga këët.›

³'Ba Wuuö Jwøk na näk Jwøu beeye noo ŋut løøga nyïmmu, ni thöör wïth juurre nyïmmu, kiper nee ŋøøm moge lwørru na maru kaawat mana nø caani ya Wuuö Jwøki. Jøcua beeye noo ŋut løøga nyïmmu.

⁴Teeŋ gïna tïïc Wuuö Jwøki dëër Cëëwön ki Ög, nyec jø Amör, kanya thöör geni ni raany ŋøøm moge, gïnögø tïïe tïïö dëët wïth juurre moøgø thuwø.

⁵Geno cïp Wuuö Jwøki ceŋŋu, ni putu gïna tïïyu tïïc dëëtge ki køør luup bëët moa köömma uuni ki ge.

⁶Magu rou ni bëëdu nou teek, ni ba lwäyu, ni ba bwøk cwïnynyu ki geni, kiper Wuuö Jwøk beeye noo cäädhi nyïmmu. U ba leeŋ piny, ni ba wec uuni.»

⁷Køøre Modhe Jøcua acwøle ni cääne ki gø nyïm jø Icriel bëët ni kööe, «Mak riï ni bëëdï niï teek, kiper ïïni, ï aay ki jøøi ii ni ciï yi ŋöömma kööŋ Wuuö Jwøki kipere ni cïbe cïbö jï kwäcge, ni pääŋŋï gø jïge, nee dööŋe na marge.

⁸'Ba Wuuö Jwøk beeye noo bwøth maal nyïmï, ni eni bëëdö buutï. Ï ba leeŋ piny, ni ba wec ïïni. Kärï lwäyö, ni ba bwøk cwïnyï.»

⁹Køøre Modhe ciik moøgø agöör piny ni mëëk gø dïlämme, ni beege nyïïkwaac Libay, jøøa käär acanduk man wø nyooth luumma tuut Wuuö Jwøki ki jiy. Ni cïbe kaperge bëët ki jø døøk Icriel.

¹⁰Køøre Modhe jøøgø aköömme ni kööe, ni «Kany wø tïme na bïriet cwiiri cooth, ni beeye cwiin wø wec pïït yie, ciik moi dou kwaanø nyïm jø Icriel bëët ni wïnyö jïge, ni kwaanna kanyo näk kar Ajwöma Man Wø Wøør Ni Jø Bëëdö Yïth Abïle,

¹¹ni beeye kany wø ö jø Icrielli bëët wø öge nyïm Wuuö Jwøk na näk Jwøu yi kanya näk ee jierø.

¹²'Ba jiy wär cooŋŋu kanya ciel ge bëët, ni beege cwøw ki mään ko obwöre ki juurre moo bëëdö dïïu, kiper nee ciik moi wïnyge, nee kwänyge ki man lwäärge Wuuö Jwøk na näk Jwøu, ni koorge wïthge ki man gwøkge luup ciik moi bëët.

¹³Køøre nyïïkwaacge moo kuc ciik, ciik moøgø wïnyge wïnyö, ni kwänyge ki man lwäärge Wuuö Jwøk na näk Jwøu ki yïth nïne bëët moo beetu yi ŋöömmo ŋutu yie løø Naam Jördan løøga nou lwørru na maru.»

¹⁴Køøre Wuuö Jwøk aköö jï Modhe, ni «Neenï, kar thøø marï aløny ni cään. Cwøl Jøcua ni cou ni cuŋŋu dho oduŋkaany røømmø[8] kiper nee eni cuuma.» Køøre Modhe ki Jøcua acøø ni cuŋge dho oduŋkaany røømmø.

¹⁵Kanyøgø Wuuö Jwøk ree anyoodhe yo oduŋkaany røømmø, ni ena yi pöölö mo ree ee wenyø, ni ö pööllögø ni cuŋŋe dho oduŋkaany røømmø.

¹⁶Ni kö Wuuö Jwøki jï Modhe, ni «Neenï, ï thøw ni läpï køør kwäyu. 'Ba jøøi ii, kanyo pïïcge yi ŋöömö mano cige yie enø, ge gëëmö ki aani ni tïm cwïnyge no onieŋ køør juu møøk, kaawat man wø tïïc dhaaŋ paaci mo rïïŋö køør käp; ni wecge aani, ni kwierge luubö mana tuuda ki geni.

¹⁷'Ba wëër mara puta liel dëëtge kaamar maac dïcäŋöca. Aani, ge wiia wiiø ni kana täärnyïma ki geni; ni pïïc gïï mo lethi ki gïï mo reyø bäätge, ni putge thumö ki thøø. 'Ba kar kaaca geno köö, na ‹Aŋø, paa per Wuuö Jwøk na tøøre dïïø ni pïïc gïï ni leth bäätø en?›

¹⁸'Ba ka adïëri møn, täärnyïma kana kanø ki ge dïcäŋöca ki køør gïïo reyø bëët noo tïïcge, kiper ge tïmö ni ge caatha køør juu møøk.

¹⁹«'Ba ennø, ïïni ki Jøcua, gööru duut man piny, ni pwönynyu jø Icriel ki gø nee kwanyge, kiper nee tïme na duut mo nyootha luumma en yïthakicwa ki jø Icriel kanyo jääla geni.

²⁰Kiper kanyo kïtha geni yi ŋöömma näk caak ki maar kïc päl yie, ni beeye ŋöömma kööŋa kipere jï kwäcge, kanyo camge ni jäŋge ni tïmge ni geno kwär ki jammi, kar kaaca ge tïmö ni ge caatha køør juu møøk, ni tïnyge geni, ni wecge aani, ni kwierge luumma tuuda ki geni.

²¹'Ba kanyo tïme ni gïï mo leth ki gïï mo reyø pïï bäätge, duut man otïmö na gïn mo nyootha bääyö marge jïge; ni bëëde na duut mo nut dhøk nyïïkwaacge ni ge wära gø cooth, ni wïthge ba wïl ki gø. Kiper acaara mano caarge ki cwïnyge dïcäŋi enø, ŋääa cøøn këël na bëëde ni ge poot kära kïth yi ŋöömma kööŋa kipere jï kwäcge.»

²²Kanyøgøøni Modhe duut manøgø aput göör piny dïcäŋögø, ni put jø Icriel pwönynyö ki gø.

²³Køøre Wuuö Jwøk Jøcua o Nun acuume ni kööe, «Mak riï ni bëëdï niï teek, kiper beeye ïïni noo kïth jø Icriel yi ŋöömma kööŋa kipere jïge. 'Ba aani, a bëëdö naa ena buutï.»

²⁴'Ba kanya ö Modhe na thöör luup ciik bëët ki göör piny yi wëëlö, ni bäŋgø moo dööŋ,

²⁵eni na Modhe enø jø tuuŋ Libay mo wø käär acanduk man wø nyooth luumma tuut Wuuö Jwøki ki jiy aköömme ni kööe,

²⁶ni «Lwørru wëël ciik man ni cïbu gø buut acanduk man wø nyooth luumma tuut Wuuö Jwøki ki jiy, kiper nee bëëde kaace na gïn mo nyootha bääyö maru.

²⁷Kiper aani ageem maru ki teek cwïny maru ŋääa. Neennu, uuna nø gëëmö ki Wuuö Jwøk naa poot nut naa kwøw. ?A no thøøa nø, naa tøør dïïu, a teeŋ ageem mo nyïëdi noo tïïyu?

²⁸'Ba cooŋŋu jø døøŋŋø mo wïth tuŋi mou bëët ki cuumme mou kanya ciel buuta, kiper nee luup moi caana ni wïnyö jïge; ni tïm maalli ki piny na gïïo ŋäc luummi en yïthakicwa ki geni kiper bääyö marge.

²⁹Kiper ŋääa ni kanyo tïme na køør thøø mara, u tïïö ki gïï mo reyø, ni weyu luupa köömma uuni ki geni. 'Ba yi nyïme gïï mo reyø opäth bäätu, kiper gïïo tïïu beege gïï mo reyø nyïm Wuuö Jwøk. Wuuö Jwøk yie cwaatu cwaadø këël mano wëëre ki køør gïïo reyø noo tïïyu ki ceŋŋu.»

³⁰Køøre Modhe luup moa en yi duut acaane jï jø Icriel bëët moa näk dëëtge ege cooŋ kanya ciel, këël mana thum luupi bëët.