Read anuak Tiet Ciik 33 Bible Online

Tiet Ciik 33 - anuak bible

Tiet Ciik 33

¹'Ba man beeye gwïëth mana ö Modhe dhaanh Wuuö Jwøk na gwïëth jø Icriel ki gø kanya poode ni eni poot kär thøw, ni kööe,

²ni «Wuuö Jwøk aöö ki yi Caynay, ni ööe ki yi Cëër kaamar cäŋ mo tuulö, ni rienye ki bäät Kïn Paran; ni ööi ki dï nyïïatwiet maal ma kume apaar; ni cere mana en bäät cwïïe da ciik mo liel kaamar maac kiper jø Icriel.

³Ka adïëri møn, Wuuö Jwøk mëër ki jiy; nyïïatwieli moe bëët na en kur keerge bëëdö ni ena cere. Dëëtge ege cooŋ buute, ni ge wïnynya pwöc moe.

⁴Modhe øøna köömme ki ciik, ni beeye gïno dööŋ jïïø na marø, ø na nyïïkwaac Jeekap en.

⁵Ni kanya ö dïbwöthe mo wïth tuŋi moø, ø na jø Icriel, na bëëtge ni geno dwätö na aciel, Wuuö Jwøk bëëdö na nyeya marø, ø na jiere nøø bëëdö ki bëëtö mo tiir.»

⁶Køøre Modhe jø tuuŋ Ruben agwïëdhe ni kööe, ni «Jø tuuŋ Ruben bëëdö ni kwøw, ni wïthge ba dïdi, këël na bëëde ni kwään jø tuuŋge nøk.»

⁷Mana caan Modhe kiper jø tuuŋ Juuda beeye en, ena köö, «Awuuö Jwøk, wïny kwac mar jø tuuŋ Juuda, ni duuï geni baŋ jø tuuŋge ki jööt dëël. Geni rege amakge ki man këëtge ki nyïïmän. Beerra man kønyï geni kany wø këëtge ki nyïïmän moge.»

⁸Mana caan Modhe kiper jø tuuŋ Libay beeye en, ena köö, «Awuuö Jwøk, gïïa cwøl ni Thumim ki Urim na näk moï, ni wø nyooth man wø manynyï, ï na Jwøk, beerra man bëëtge ni ena cer dhaanhnhï man wø jierï røk jø tuuŋögø; ni da ŋata päänynyï kanya cwøl ni Maca, na pïëmï ki gø ri luum pï Meriba.

⁹Jø tuuŋ Libay beege na taak wëëkge ki mëëkge kiper tïïc marï, na kwier nyïïmëëkge, na wec obwöre moge. Kiper geni luummï akïthge cwïnyge ni kïthge gø bäät tïïc, ni gwøkge luummï na tuutï.

¹⁰Jø tuuŋ Libay nyïïkwaac Jeekap opwönyge ki luup ŋøl moï, ï na Wuuö Jwøk, ni pwönyge ge na jø Icriel ki ciik moï. Ge wø cïpö ki gïn wø jïye ŋwääi ni met jïrï, ï na Wuuö Jwøk, ni cïpge ko olämme jïrï mo wø waaŋ bäre bäät gïn wø cïp olämme bääte.

¹¹Wui Wuuö Jwøk, gwïëth jap jø tuuŋ Libay bëët, ni mïn yiï ki tïïe bëët mo wø tïïcge ki ceŋge. Beerra man raanynyï teek mar jø wø many leny ki geni, këël jø wø män ki geni, kiper nee ba lønye jïge ki man cäŋge ö maal baŋ leny këët.»

¹²Mana caan Modhe kiper jø tuuŋ Benjamen beeye en, ena köö, ni «Jø tuuŋ Benjamen na mëër Wuuö Jwøki ki ge, ge bëëdö ni geno gwøk Wuuö Jwøki, ni wø koor geni ki yïth nïne bëët; ni bëëtge ni ge ena cere.»

¹³Mana caan Modhe kiper jø tuuŋ Jocep beeye en, ena köö, ni «Ŋøøm moge ogwïëth Jwøki, ni jïtge ki køth ki thööy mo orømø, ki näm mo kwödö yïth ŋøøm moge.

¹⁴Ni ö cäŋŋi ni wëëk caammi mo beyø ciek na karge yïth ŋøøm moge; ni ö caammi moge ni ciekge ki dwäde moa näk karge.

¹⁵Ni tuc gïï mo beyø bäät kïte moge moa nut cøøn; ni tïme ni nuta gïïa beyø na tuy bäät thuuri moge ni wø bëëdö cooth.

¹⁶Ni jït ŋøømmi ki gïï mo beyø ni røm ŋöömö bäre; ni ö met yi Wuuö Jwøk na nyooth ree ki dï abuŋŋö ni tïme ni nutö kiperge. Beerra man thur gïïögø bëët karge jï jø tuuŋ Jocep, ge na kwarge ma Jocep bëëdö ni dwøŋŋa kare dï uutwänni.

¹⁷Ge jïtö ki teek ni tïmge kaamar thwønh dhieŋ ma kaa, ni tïmge ni teek kaamar jööbi ni wø cööp jiy ki tuge; ni ö geni ni riemge jiy këël mano këët cuŋ piny. Ni jøw rëëmö røk jø tuuŋ Ipariem o Jocep beege jiy mo thööth mo kaala kume apaar, ki jø tuuŋ Maneeca o Jocep mo kaala kuma.»

¹⁸Mana caan Modhe kiper jø tuuŋ Dhebulan ki jø tuuŋ Icakar beeye en, ena köö, ni «Beerra man mïn yïth jø tuuŋ Dhebulan ki jø tuuŋ Icakar, kiper geno bëëdö ni yïthge met ki tïïe moge, ni mïn yïthge kanyo bëëtge ni dëëtge ege jwömö mïëri moge.

¹⁹Geni, jø møøk cwølge cwølø ni öge bäät kïnno jier Wuuö Jwøki, ni cïpge ko olämme ma karge kaace ni jøøgø nutö. Geni, geno kän wøk ki gïï mo thööth ki yi naam, ki gïï mo perge leth mo kuc ya akwöö dïkwøŋ.»

²⁰Mana caan Modhe kiper jø tuuŋ Gaat beeye en, ena köö, ni «Gwïëth oen jï ŋato nyaac ŋøøp jø tuuŋ Gaat. Jø tuuŋ Gaat møøra piny kaamar ŋuu, ni wø cööt ceŋ dhaanhø wøk ki wï gø bëët.

²¹Jø tuuŋ Gaat, ŋøøm moa beyø ajierge kiper dëëtge; ni ö ŋöömö mana näk mar dïbwödhi ni dööŋe jïge. Ni pööthge maal nyïm jiy, ni tïïcge gïna beer na many Wuuö Jwøki; këël luup ŋøl moa cem Wuuö Jwøki otïïcge na aciel ki jø Icriel.»

²²Mana caan Modhe kiper jø tuuŋ Daan, beeye en, ena köö, ni «Jø tuuŋ Daan caala nyi ŋuu mo päny wøk ka yi lur Baacan.»

²³Mana caan Modhe kiper jø tuuŋ Naptali beeye en, ena köö, ni «Jø tuuŋ Naptali onø gwïëth Wuuö Jwøki døc ki køør met yie. Ŋøøm moa en buut Puul Galili cøøa jïge.»

²⁴Mana caan Modhe kiper jø tuuŋ Acer beeye en, ena köö, ni «Jø tuuŋ Acer onø gwïëth ni kadha geni ki jø tuŋi møga. Beerra man bëët jø tuŋi møga ni yïthge met ki geni; beerra man tïm ŋøøm moge ni caammi ciek yie.

²⁵U na jø tuuŋ Acer, dïdëëte mo dhøk kiiri mou otïïc ki nywïënyö ma jwïël, ni bëëdu nou teek ki yïth nïr kwøw mou bëët.»

²⁶Ni kö Modhe, ni «Bäŋ Jwøk mo caala Jwø Jecurun,[9] ni wø mëëre ki geni. eni öö ki maal ni öö kuna køny geni, ni cäädhi ki yïth pøøl ka ajiem mare.

²⁷Jwøk na nut cøøn beeye eni wø bëëdu ree ni wø gwøk uuni; ni bëëdö ni u ee jølø cooth ki ceŋŋe. Ni beeye eni na riem nyïïmännu wøk nyïmmu; ni caan gø jïïu kiper nee geni thööru.

²⁸'Ba jø Icriel bëëdö ni bäŋ gïn mo tägi dëëtge; ni ö geni na nyïïkwaac Jeekap yøø ni bëëtge keerge yi ŋöömö mo yie da beel ki pï nyïïomøki, na ŋöömö mo maal cïpö ki køth ki thööy jïre cooth.

²⁹U na jø Icriel, uuna jiy mo dëëtu gum. ?Aŋø, da jiy mo caala uuni mo okøny Wuuö Jwøki kaamar maru? Eni caala kwöt leny maru, ni beeye eni wø køny uuni. Eni caala opëëllö mo uuno jïtö ka ajiem ki køøre. Ni tïm nyïïmännu ni lwäär ki uuni, ni putu geni böötö na bäre.»