Read anuak Tiet Ciik 34 Bible Online

Tiet Ciik 34 - anuak bible

Tiet Ciik 34

¹Køøre Modhe aay ki yi pwöl Möap, ni eth wï Kïn Pedhega, na en bäät Kïn Nebø jï kuna dïët ki Jerikö. Ni ö Wuuö Jwøki ni nyooth ŋööm Gelät bäre jï gø këël mana këët Daan,

²ki ŋööm jø tuuŋ Naptali bäre, ki ŋööm jø tuuŋ Ipariem, ki ŋööm jø tuuŋ Maneeca, ki ŋööm jø tuuŋ Juuda bäre këël mana këët deŋ naama dwøŋ na en jï løø kur pänh-cäŋ.

³Ni nyooth ŋöömma cwøl ni Nëgëp ki pwölla en yi goor Jerikö, päänya näk yie da twöe, këël mana këët Dhöär.

⁴Køøre Wuuö Jwøk aköö jï Modhe, ni «Manøgø beeye ŋöömö mana kööŋa kipere jï Eeberam ki Aydhak ki Jeekap na kööa ni cïba cïbö jï nyïïkwaacge. Ennø, ŋöömö manøgø ïïna wëëga neen gø nee jootï ki waŋï; 'ba ba løny jïrï ki man ciï kaace.»

⁵'Ba Modhe dhaanh Wuuö Jwøk athøø yi ŋööm Möap kaace kaawat mana caani ya Wuuö Jwøki.

⁶Ni koonyi yi gool yi ŋööm Möap na näk dïët ki kanya cwøl ni Bëëth-Pëëgör; 'ba bäŋ ŋat mo ŋäc kanya koony Modhe yie këël dïcäŋi en.

⁷'Ba këël na bëëde ni Modhe beeye dhaanhø mo jaal mo cwiiri moe dïpa ki pïërariiø, kanya thøøe eni nyeŋŋe poot rääŋö ni beyø jaak, ni dëëre poot teek jaak.

⁸Ni ö jø Icrielli ni jwøkge Modhe ki nïne mo pïëradäk yi pwöl Möap. Køøre nïr kïmmö ki nïr jwøk moa jwøk Modhe ki gø athum.

⁹'Ba Jøcua o Nun dëëre apäŋ ki Jwïëc Jwøk ni bëëde ni wïïe leer ki køør mana ö Modhe na cïp ceŋŋe bäät gø. Ni ö jø Icrielli ni leŋge dwøre ni tïïcge gïïa ö Wuuö Jwøki na kööm Modhe ki ge.

¹⁰'Ba ki mana täge kar kaaca nø, bäŋ nyikuŋ Jwøk mo othïïŋö dï Icriel mo ŋäc Wuuö Jwøki kaamar Modhe;

¹¹kiper beeye Modhe na tïïc ŋïïce ki gïïa näk rëëma ec bëët moa ö Wuuö Jwøki na jääŋ eni ki ge nee tïïe dëër Peerø nyeny Ijep ki jø tïïc moe bëët këël ŋööm Ijep bäre.

¹²Ni bäŋ nyikuŋ Jwøk mo jïre da teek wala mo otïïö ki gïï mo di lwäärö kaawat mana tïïc Modhe nyïm jø Icriel.