Read anuak Tiet Ciik 7 Bible Online

Tiet Ciik 7 - anuak bible

Tiet Ciik 7

¹«'Ba Wuuö Jwøk na näk Jwøu u kïthe yi ŋöömmo cou yie nou lwørru na maru, ni riem wïth juurre mo thööth wøk nyïmmu, ni beege jø Këth ki jø Gërgëca ki jø Amör ki jø Keenan ki jø Përec ki jø Ëwi ki jø Jeebuc, ni beege wïth juurre abïriiø mo thöötha geni ki uuni mo kaala uuni ki teek.

²'Ba kanyo ö Wuuö Jwøki na näk Jwøu noo cïp geni ceŋŋu, ni böötu geni, ge wäru putu raanynyø na bäre bäre. Kär dee gïn mo tuutu ki geni, ni ba päth cwïnynyu ki gïrge.

³Kär røgu nywømmu ki geni. Kär nyïïu cïpu jïge nee nywøm wäätge, ni ba källu nyïïge nee nywøm wäätu.

⁴Kiper obwöre mou bwøthge wøk ki jöör Wuuö Jwøk, ni tïmge ni ge tïnynya juu møøk. Køøre wëëc Wuuö Jwøk liel dëëtu kaamar maac, ni ö eni ni laar u thöör.

⁵'Ba gïna dou tïïö dëëtge beeye ki man raanynyu gïï wø cïpge olämme moge bäätge, ni tøgu kïte moa näk ege cwöth piny kiper nee lamge, ni ŋødu jenni moge piny moa näk ege tieŋø ni wø lamge, ni ö gïïa näk ege tieŋø na juu ni waaŋu geni ki maac.

⁶Gïïögø bëët dou tïïö kiper uuna jiy mo ena kur keerge jï Wuuö Jwøk na näk Jwøu. Wuuö Jwøk na näk Jwøu uuna jiere nou tïmu ni uuna thööge dï jiy bëët moa en bäät piny.

⁷«'Ba Wuuö Jwøk tier mëër mana mëëre ki uuni na jier uuni paa kiper mana thööth kwäännu ki kwään jiy møga, kiper nøka kwäännu røk wïth juurre bëët.

⁸'Ba uuna jiere kiper mana mëëre ki uuni jaak, ni eni manynya man gwøk gïna kööŋe ki gø jï kwäyu; ni beeye tiere gø na käl uuni wøk ki teek bade, ni pät uuni yi bëët laŋ, ni käl uuni wøk cer Peerø nyeny Ijep.

⁹Kiper manøgø nø, wär ŋäyu ni Wuuö Jwøk na näk Jwøu beeye eni na Jwøk keere, ni ena Jwøk mo maar ka ŋääth; ni luumma tuude, ki mëëye ni wø ba jøøl, bëëdö ni gwøe gwøø ki yïth beenhnhe ma kume mo ba løny ki kwaan jï jø wø mëër ki eni ni wø gwøk ciik moe.

¹⁰'Ba kwöre wø coole coolø dëët jø wø män ki eni, ni put wïthge dïïr. Eni ba ruu ki man cool kwöre dëër ŋat wø män ki eni.

¹¹Kiper manøgø nø, gwøgu ciik ki luup ŋøl moi ni köömma uuni ki geni dïcäŋi en, ki man kïthu geni bäät tïïc.

¹²«'Ba gïno tägi, ni näk ciik moi leŋu leŋø, ni gwøgu geni ni kïthu geni bäät tïïc, Wuuö Jwøk na näk Jwøu luumma tuude na kööŋe ki gø jï kwäyu, ki mëëye ni wø ba jøøl, gwøe gwøø kiperu.

¹³Ni bëëde ni mëër ki uuni ni gwïëth uuni ni wëëk uuni nyaay; obwöre mou moo nywøllu ogwïëdhe, ni gwïëth caammi moo ciek yïth ŋøøm mou, ni gwïëth dhäk mou ki dïëk mou, ni tïmge ni thööth yi ŋöömma kööŋe kipere jï kwäyu nee cïbe jïïu.

¹⁴'Ba uuno gwïëth ni tïmu nou kaala jiy bëët ki gwïëth; ni bäŋ dïcwøø wala dhaagø mo tïmö na bwøc dïïu, ni tïme ni bäŋ thwønh wala maath ma bwøc røk lääc paac mou.

¹⁵'Ba Wuuö Jwøk täwe bëët paanye paanyø bäätu; ni ba kïth bäätu ki teeŋ täwe moa leth na ŋäyu Ijep. 'Ba täwe okïth bäät jiy bëët mo wø män ki uuni.

¹⁶Jiy bëët moo cïp Wuuö Jwøki na näk Jwøu ceŋŋu wär putu thöör, ni ba päth cwïnynyu ki gïrge; ni ba tïnynyu juu moge, kiper noo tïnynyu ge, puta tïmö ni caala abïëp kiperu.

¹⁷«'Ba kanymør u köö ki cwïnynyu, ni ‹Wïth juurre moi thöötha geni ki øøni. ?Olønye jïïø nidïï ki man böötø geni ni lwørø ŋöömö marge?›

¹⁸Käru lwäyu ki geni. 'Ba beerra man caarru wïthu døc ki gïïa tïïc Wuuö Jwøki na näk Jwøu dëër Peerø ki yi Ijep bäre,

¹⁹ni beege gïïa leth døc na jootu ki nyeŋŋu, ki ŋïïce ki gïï mo rëëma ec moa tïïc Wuuö Jwøki na näk Jwøu ki teek bade ki teek mare na dwøŋ kanya käl uuni wøk. 'Ba Wuuö Jwøk na näk Jwøu teeŋ gïïögø thuwø otïïe dëët jiy bëët moo lwäyu ki geni.

²⁰Køøre thuwø, Wuuö Jwøk na näk Jwøu piini ojääŋŋe dï jøøgø, këël mano thum jiyi mo obøth no okaan dëëtge.

²¹Kär dëëtu kwanynyi ni maru lwäär ki geni, kiper Wuuö Jwøk na näk Jwøu nutö buutu, ni beeye Jwøk mo dwøŋ mo di lwäärö.

²²'Ba Wuuö Jwøk na näk Jwøu, wïth juurre moøgø oriem wøk nyïmmu mëëth mëëth, ni ba laaru wïthge dïïr bëët, kiper nee lääc paap ba nyaacge töök mïëyu.

²³'Ba Wuuö Jwøk na näk Jwøu jøøgø ocïp ceŋŋu ni mooc geni ki böök ni jït wïthge ko okiera, këël mano thumge bëët.

²⁴'Ba Wuuö Jwøk nyeye moge ocïp ceŋŋu, ni putu nyeŋge tïïc ni kuc bäät ŋøøm, ni tïme ni bäŋ dhaanhø mo maar lønyø jïre ki man cuŋŋe nyïmmu kany wø näk ri leny, këël mano thöörru geni na bäre.

²⁵'Ba gïïa tieŋge na juu moge dou waaŋø ki maac. 'Ba kär dee gïn manynyu ri warkey wala gwel-bïrö mana näk oleeny dëëtge, ni ba kädu rege kiper dëëtu, nee ba tïmge ni caala abïëp kiperu, kiper gïïögø beege gïï mo Wuuö Jwøk na näk Jwøu yie raac ki ge døc.

²⁶Kär dee gïn mo Wuuö Jwøk yie raac ki gø mo kïthu yïth uudi mou; kiper ni näk mo you tïïö, acïëni mana en bääte ööa bäätu. 'Ba u doo männö ki teeŋ gïïögø, ni bëëdu ni yïthu reyø ki ge, kiper acïën Wuuö Jwøk ena bäätge, ni beege gïï mo di raanynyø na bäre bäre.