Read anuak Tiet Ciik 9 Bible Online

Tiet Ciik 9 - anuak bible

Tiet Ciik 9

¹«Wui, u na jø Icriel, wïnynyu gïn. Dïcäŋi karu cään ki man ŋutu løø Naam Jördan løøga, nou cou nee wïth juurre mo døøŋŋø geni ki uuni, moa näk jïge da teek mo kaala maru, nee riemu wøk, këël na bëëde ni jïge da päänye mo døøŋŋø, ni kiiri moge ogeerø ni teek ni bäyö.

²'Ba jøøgø beege jiy mo dëëtge døøŋŋø mo bäyö ni beege nyïïkwaac Anak, jøøa ŋäyu na gïrge wïnynyu kanya købi, na ‹?Aŋa ni maar cuŋŋö nyïm nyïïkwaac Anak?›

³Kiper manøgønø, beerra man ŋäyu gø dïcäŋi, ni Wuuö Jwøk na näk Jwøu beeye noo ŋut løøga nyïmmu, ni eni caala maac ni wø thöör jiy. Eni jøøgø di thöörö ni bööt geni nyïmmu, ni putu geni riem wøk, ni laaru geni thöör, kaawat mana caani ya Wuuö Jwøki jïïu.

⁴«'Ba kanyo ö Wuuö Jwøki na näk Jwøu no onø riem jøøgø wøk nyïmmu, kär nou köö ki cwïnynyu ni beeye kiper beer maru na ö Wuuö Jwøki na käl uuni yi ŋöömmi en nee lwørru na maru. 'Ba beeye kiper rääö mar jøøa en yi ŋöömmögø no ö Wuuö Jwøki noo riem geni wøk nyïmmu.

⁵Ka adïëri møn, paa kiper beer maru wala thïïŋ cwïny maru noo cou yi ŋööm jøøgø nee lwørru na maru, 'ba beeye kiper rääö mar jøøgø no ö Wuuö Jwøki na näk Jwøu noo riem geni wøk nyïmmu, kiper nee kööŋ mana kööŋe ki gø jï kwäyu, ni beege Eeberam ki Aydhak ki Jeekap, nee nyoodhe jïïu na adïëri.

⁶Kiper manøgønø, beerra man ŋäyu gø ni paa kiper beer maru no ö Wuuö Jwøk na näk Jwøu noo cïp ŋöömmi ni beer en jïïu nee lwørru na maru, kiper uuna jiy mo wïthu teek.

⁷«Ba caarru wïthu ni ba wïl wïthu ki mana cwaatu yi Wuuö Jwøk na näk Jwøu këël mana wëëre ki uuni dï paap. Ki mana täge ki dïcäŋa ööu wøk ki yi Ijep këël mana pïïyu kany, uuna bëëdö nou gëëmö ki Wuuö Jwøk.

⁸Këël kanya bëëdu tier Kïn Körëp thuwø, Wuuö Jwøk yie acwaatu këël mana wëëre, ni put wëër døc ki uuni ni tïme ni manynya man thöör uuni.

⁹'Ba kanya cøøa bäät kïdi, nee opäp kïte moa näk luumma tuut Wuuö Jwøki ki uuni ogöör bäätge lwøra, kar kaaca aana bëëdö bäät kïdi ki nïne ma pïëraŋween, ni beeye dïcäŋ ki wäär, ni bäŋ gïn mo yaa camø wala pïï mo yaa maadhø.

¹⁰Køøre Wuuö Jwøk opäp kïte moa näk ariiø na gööre ki cere amëëk aani, ni luup moa en yïthge beege luup bëët moa caane jïïu bäät kïdi ni eni ena dï maac, dïcäŋa cooŋŋu rou na aciel bëët.

¹¹«'Ba kanya tïme na aŋuun nïne moa näk pïëraŋween, Wuuö Jwøk opäp kïte moa näk ariiø na näk luumma tuut ogöör bäätge acïbe jïra.

¹²Kar kaaca Wuuö Jwøk aköö ki aani, ni ‹Ö maal ni laarï ci piny, kiper jiyï moa kälï wøk ki Ijep dëëtge araanyge keerge. Gena laar gaa wøk ki øtjöö mana köömma geni ki gø, ni tïnyge dëëtge ki kït gïn mo oleenyø kiper nee lamge.›

¹³«Ni cäŋ Wuuö Jwøki cäänö ki aani, ni kööe, ‹Ka adïëri møn, jøøi ii ajooda ni gena jiy mo wïthge teek.

¹⁴'Ba ennø, wec aani kiper nee geni nääa, ni thööra geni, ni tïmge ni bäŋ nyeŋge bäät piny. 'Ba ïïni na Modhe en, ï tïïa tïïö ni ïïna wï jur mo teek mo dwøŋŋa eni ki geni.›

¹⁵«Køøre dëëra aputa løk ni ööa piny ki bäät kïdi, ni maac poot liel bäät kïdi, no opäp kïte moa näk ariiø moa näk luumma tuut ogöör bäätge käära ka ceŋŋa karge riet.

¹⁶Ni jooda uuni møn ni uuno bääyö dëër Wuuö Jwøk na näk Jwøu. Dëëtu atïnynyu ki kït gïn mo oleenyø mo caala nyirøøa kiper nee lammu, ni laaru gaa wøk ki øtjöö mana ö Wuuö Jwøki na kööm uuni ki gø.

¹⁷'Ba aani, opämi moa näk ariiø agøøa piny ni thøwge nyïmmu ni nëënö jïïu ki nyeŋŋu.

¹⁸Køøre aani raa aleeŋa piny nyïm Wuuö Jwøk ni kwaaa gø ki nïne ma pïëraŋween, ni beeye dïcäŋ ki wäär, ni bäŋ gïn mo yaa camø wala pïï mo yaa maadhø, kaawat mana tïïa dïkwøŋ. 'Ba Wuuö Jwøk akwaaa kiper gïna baayu na raac dëëre, ni cwaatu yie ki gø këël mana wëëre.

¹⁹Gïnögø atïïa ni lwäya aani ki wëëc Wuuö Jwøk ki räny ec mana räny yie ki uuni, ni beeye mana wëëre ki uuni ni dee uuni nääö. 'Ba kar kaaca thuwø Wuuö Jwøk lam mara awïnynye.

²⁰Ni ö Wuuö Jwøki ni wëëre ki Aran døc, ni manynya man 'näk gø; 'ba aana lämö kiper Aran kar kaaca thuwø.

²¹Køøre gïna raac na näk caala nyirøøa, na tïïyu kiper nee lammu, alwøra ni waaŋa gø ki maac, ni tøøa gø, ni puta gø guur na ŋiidhi këël mana tïme na tør, ni leeŋa tør mare yi naam mana löönynyö ki bäät kïdi.

²²«Køøre thuwø, kanya enu Tabëëra ki Maca ki Kibïröth-Ataba, Wuuö Jwøk yie acäŋu cwaatø këël mana wëëre.

²³«Maya thuwø, kanya ö Wuuö Jwøki na jääŋ uuni ki Kadëc-Bernia, ni kööe, ni ‹Cou ni lwørru ŋöömö mana cïba jïïu,› uuna kweer ki mana caan Wuuö Jwøki na näk Jwøu, ni käru mare ŋäädhö ni käru dwøre leŋø.

²⁴'Ba uuna bëëdö ni maru ageem ki Wuuö Jwøk, ki mana tääa bëëtö ki uuni.

²⁵«'Ba kanya leeŋa raa piny nyïm Wuuö Jwøk, ni kwaaa gø ki nïne ma pïëraŋween, kwaaa kaper mana kö Wuuö Jwøki nou nääe nääö.

²⁶Ni läma jï Wuuö Jwøk, ni kööa, ‹Wui Kwäärö Wuuö Jwøk, jiyï moa näk thöögï na wïïlï wøk ki køør teegï na dwøŋ, na kälï wøk ki yi Ijep ki teek badï, kär 'nägï.

²⁷Caar wïïï ki laagï ma Eeberam ki Aydhak ki Jeekap; kärï tïmö niï neeta teek wïc mar jøøi, ki gïïa reyø na tïïcge, ki raay moge,

²⁸kiper nee jø paana kälï waani wøk ki yie nee ba köge, ni «Wuuö Jwøk kär løny jïre ki man kïth geni yi ŋöömma kööŋe kipere jïge,» nee ba köge thuwø, ni «Ena männö ki geni, ni ge käl wøk kaper nee ge nääe dï paap.»

²⁹'Ba geni, ge poot na jiyï ni beege thöögï na kälï wøk ki køør teegï na dwøŋ ki teek badï.›