Read anuak Jøøn 1 Bible Online

Jøøn 1 - anuak bible

Jøøn 1

¹Wïlöölö Dwøl nutö, ni Dwørøgøøni ena kanya ciel ki Jwøk, ni Dwørøgøøni beeye Jwøk.

²Wïlöölö eni ena kanya ciel ki Jwøk.

³Ni jammi bëët cwääc ka ree, ni bäŋ gïn mo ocwääö ri moa cwääc bëët, ni eni tøør ree.

⁴Ni kwøw ena ree, ni kwøwøgøøni beeye na cïp tar jï jiy.

⁵Ni tayøgø meenya muudhö, ni käri ya muudhe nää.

⁶Da dhaanhø mo ojääŋ Jwøki, mo nyeŋŋe cwøl ni Jøøn.

⁷Ena öö kiper nee cääne, nee gïr tayøgøøni købe, kiper nee jiy bëët jïëcge ni ŋääthge ki køøre.

⁸Eni patha tayøgøøni, 'ba ena öö nee gïr tayøgøøni købe.

⁹'Ba taya näk adïëri na cïpö ki tar jï jiy bëët, beeye eni na ö piny.

¹⁰Eni ena piny, ni beeye eni na cwääc piny ki køøre, 'ba eni kär ŋec jø pinynyi.

¹¹Ena ö baŋ moa näk moe, ni kär moe jïëy ki eni.

¹²'Ba jøøa jïëy ki eni bëët na ŋääth nyeŋŋe, amooe ki teek ki man tïmge na nyïï Jwøk.

¹³Ni jøøgøøni atïmö na nyïï Jwøk kiper mana tïïc Jwøki ki dëëre, ni paa kiper na nywøl ge na tuuŋ, wala kiper mana cac dëër dhaanhe, wala kiper mana caar dhaanhe nee tïïe ee keere.

¹⁴Ni ö Dwørøgøøni ni tïme na dhaanhø ni bëëde dïïø, ni mëër ka adïëri okääthö jïre. Ni waani ajiem mare ewa neenø, ajiema en jï Wäädö na näk aciel jï Wuuö.

¹⁵Jøøn acäänö ki gïre, ni cwödö, ni «Man beeye ŋata gïre caana, ni ‹Eni no ööi køøra dwøŋŋa eni ki aani, kiper eni nutö cøøn naa poodi.› »

¹⁶Ni ö øøni bëët ni jïtø ri met ec mare na näk okääthö, ni cäŋ bäät gwïëth marø mëënnö ki gwïëth.

¹⁷Kiper Ciik Jwøk cïp ka ri Modhe, 'ba met ec ki moa näk adïëri ööi ka køør Jecu Krictø.

¹⁸Bäŋ dhaanhø aciel mo Jwøk ee neenø, 'ba beeye Wäädö mana näk acielø jï Jwøk na en kö Wuuö na nyooth gøøni.

¹⁹'Ba man en beeye luumma køp Jøønni na ö jø Juuthi na jääŋge kwääc laam ki tuuŋ jø Libay møøk ki yi Jerucalem kuna pëënyge eni, ni «?Ïïna ŋa?»

²⁰Ni caan mare nyïmge ni käre mooŋø, 'ba aput caan, na «A paa Krictø.»

²¹Ni ö geni ni pëënyge gø, ni «?Ïïna ŋa? ?Ïïna Ilaaja?» Ni kööe, na «A patha eni.» Ni köge, ni «?Ïïna nyikuŋ Jwøk mana wäŋŋi?» Ni løk gø, ni «Jïra bäär.»

²²Køøre gena köö jïre, ni «?Ïïna ŋa nø? Caan marï jïwa nee dwøkwa baŋ jøøa jääŋ waani. ?Agïnaŋø ni caanï kiper dëërï?»

²³Ni kööe jïge, ni «Aana dwør dhaanhø mo cwödö ŋää paac, ni ‹Tïïyu jöör Wuuö Jwøk ni thïïŋ,› kaawat mana caan nyikuŋ Jwøki ma Aydheea.»

²⁴'Ba jøøgøøni na öge, jääŋŋa jø Paricithi.

²⁵Ni pëënyge gøøni, ni «?Ni näk enøgønø, niï patha Krictø, wala Ilaaja, wala nyikuŋ Jwøk mana wäŋŋi, aŋø ni lööï na nyuudhi en?»

²⁶Ni ö Jøønni ni løk gø jïge, ni «Aani, a löö ka pïï na nyuudhi, 'ba dïïu da dhaanhø mo nutö mo kuyu,

²⁷ni beeye eni noo ööi køøra, ŋata näk thøøth waye ba doo mïërö jïra ki man päda ge wøk tiete.»

²⁸Gïïögøøni täga Bethani løø Naam Jördan, kanya löö Jøønni na nyuudhi yie.

²⁹'Ba na tïme na aruunnø man, Jøøn Jecu aneene ni ööa baŋe, ni kööe, ni «Neennu, Nyidier Jwøk ŋato wëën raay mo jø piny.

³⁰Eni beeye na gïre køba, ni ‹Da dhaanhø mo öö køøra, mo dwøŋŋa eni ki aani, kiper eni nutö cøøn naa poodi.›

³¹'Ba aani ki dëëra eni kuua. 'Ba kiper nee eni ree nyoodhe jï jø Icriel beeye na ööa ni lööa na nyuudhi kipere.»

³²Ni ö Jøønni ni køp dwøre kipere, ni kööe, ni «Aani Jwïëc Jwøk aneena ni öö ki maal kaamar akuuru, ni pï bääte.

³³'Ba aani ki dëëra eni kuua. 'Ba eni na jääŋ aani kuna lööa ki pïï na nyuudhi beeye na caan gø jïra, ni ‹Ŋato jootï Jwïëc Jwøk ni öö ni pïïa bääte ni bëëde, beeye ŋato löö ki Jwïëc Jwøk na en kur keere.›

³⁴'Ba aani, ajooda ki waŋa ni køba gø, ni ‹Man beeye na O Jwøk.› »

³⁵'Ba na tïme na aruunnø maya, Jøøn acäŋ cuŋŋö ki bääge ariiø,

³⁶ni neen Jecu ni cäädhö, ni kööe, «Neennu, Nyidier Jwøk.»

³⁷'Ba na wïnynyi ya bääŋi riet ni caana gïnögø, gena läp køør Jecu.

³⁸Ni ö Jecu ni løk ree ni joot geni ni ge lämma køøre, ni kööe jïge, «?Agïnaŋø ni manynyu?» Ni köge jïre, ni «?Raabay,» na näk tiere beeye Dïpööy, «Ï bëëdï kaa ŋø?»

³⁹Ni kööe jïge, «Ööu nee neennu.» Ni cige ni jootge kanya bëëde yie, ni putge bëëdö kanyøce ki eni dïcäŋögø, kiper na näk cäŋ abøøya ki caae aŋween.[1]

⁴⁰'Ba dëët jøø na ariiø yøø na wïny dwør Jøøn ni luubö, na läp køør Jecu, dhaanhø aciel beeye Andaru na näk cöök Cayman Piter.

⁴¹Ni cøøe ni kwøŋ coki ma Cayman joot, ni kööe jïgø, «Waani Macaaya ajootwa;» na näk tiere beeye Krictø.

⁴²Ni ööe ni käl gø baŋ Jecu. 'Ba na ö Jecu na neen gø, ena köö, ni «Bee ï, Cayman wär Jøøn. Beer, ïïno cwøl ni Ciipa, wala Piter;» na näk tiere beeye Kïdi.

⁴³'Ba na tïme na aruunnø man, Jecu aköö ni eni cøøa Galili. Ni joot Pilip ni kööe jïgø, ni «Ööï ni cäädhï køøra.»

⁴⁴'Ba Pilip beeye nyï Betheeda po jø Andaru ki Piter.

⁴⁵'Ba Pilip Nathaniel ajoode ni kööe jïgø, «Waani, ŋata gööt Modhe kipere yi wëël Ciik Jwøk na näk da luup thuwø mo ogöör nyïïkuk Jwøki kipere, ajootwa, ni beeye Jecu nyï Nadhareth na näk o Jocep.»

⁴⁶'Ba Nathaniel aköö, ni «?Da gïn mo beer mo doo ööa wøk ki yi Nadhareth?» Ni kö Pilipi jïre, «Ööï nee neenï.»

⁴⁷'Ba na ö Jecu na joot Nathaniel ni ööa baŋe, ena köö jïgø, «Neennu, man beeye nyï Icriel møn, mana näk bäŋ cwøk cwïnye.»

⁴⁸Ni kö Nathanielli jïre, na «?A ï ŋääö nidïï?» Ni løgi ya Jecu jïre, ni «Kanya poodï ni ïïno pï piny tier olaam, niï poot kär cwøl Pilipi, ïïna jooda.»

⁴⁹Ni løgi ya Nathanielli jïre, «Dïpööy, beeye ïïni na O Jwøk, na näk Nyeya mar Icriel.»

⁵⁰Ni løgi ya Jecu jïre, na «?Aŋø, kiper na caana gø jïrï ni ïïna jooda tier olaam, beeye na jïëyï? Ïïni gïï mo døøŋŋø geni ki moi oneenï.»

⁵¹Ni cäŋ Jecu köö jïgø, na «Adïëri møn a cäänna uuni, uuni, maal oneennu ni ree ee jabø, ni nyïïatwiet maal mo Jwøk cøøa maal ni ööa piny bäät Wär Dhaanhø.»