Read anuak Jøøn 10 Bible Online

Jøøn 10 - anuak bible

Jøøn 10

¹'Ba Jecu aköö, na «Adïëri møn, a caana gø jïïu, ni ŋat wø ba dønyi ki dhi kal mar dïëk, 'ba eni edhi ka jöö mør, ŋatøgø beeye kuu ni näk dïtwïëdi.

²'Ba ŋat wø dønyi ki dhi kal beeye dïkwääy dïëk.

³Ni ö ŋat wø koor dhi kal ni jap gø jïre. Ni ö dïëki ni wïnyge dwøre. Ni eni dïëge wø cøøre cøørø ki nyeŋge, ni bwøth geni wøk.

⁴'Ba wø nø käl moe wøk bëët, eni cøøa nyïmge, ni ö dïëki ni cääthge køøre, kiper na ŋäcge dwør gø.

⁵Ni geni ba doo cäädhö køør ŋat mo path, 'ba ge bwøk, kiper na kucge dööt jiy mo path.»

⁶Luummögø acaan Jecu jïge kaamar leer, 'ba tier mana caane jïge kärge kwanyø ni beer.

⁷Kiper manøgøøni Jecu acäŋ köö jïge, na «Adïëri møn a caana gø jïïu, ni beeye aani na dhi øt dïëk.

⁸'Ba jøøa kwøŋ öö bëët naa poodi beege kuuwe ni näkge dïtwïëte. 'Ba marge kär leŋ dïëki.

⁹Aana dhi øtø. Noo dee ŋat mo dunynyi ki raa, eni di piemø. Ni eni dønya yie ni duu wøk cooth ni jïte ki pwöla mo yie da luum mo mar.

¹⁰'Ba kuu wø ööi kaper kwal keere, ki 'näk, ka aranya. 'Ba aani, a ööi kaper nee ge kwøwge ki kwøw mana näk adïëri.

¹¹Aana dïkwääy mana näk adïëri. 'Ba dïkwääy mana näk adïëri jwïëye cïbe cïbö kiper dïëk.

¹²'Ba ŋat mo tïïö ka jammi ni paa dïkwääy ni dïëk paa moe, kany wø joot kwac ni öö, dïëk wø wiie wiiø ni reeŋe. Ni ö kwaci ni maaŋ dïëk ni keeth geni.

¹³Eni reŋi kaper na tïïe ki jammi ni bäŋ gïn mo maar caar kiper dïëk.

¹⁴'Ba aani, aana dïkwääy mana näk adïëri. Ni moa näk 'moa ŋääa, ni ö 'moa ni ŋäcge aani,

¹⁵kaa mana ö Wuue ni ŋäc aani, ni ŋääa Wuuö thuwø. Ni aani jwïëya cïba cïbö kiper dïëk.

¹⁶'Ba jïra da dïëk møøk mo tøør ri pïïth man. 'Ba geni käla kälö thuwø, ni wïnyge dwøra. Køøre geno tïmö na pïïth aciel ki dïkwääy aciel.

¹⁷'Ba tier mëër mar Wuuö ki aani beeye kiper mana jïëa ki man cïba jwïëya, nee cäŋa lwørrø.

¹⁸Ni bäŋ dhaanhø mo doo käl gø wøk cera, 'ba cïpa a keera ki wïïa. Jïra da teek ki man cïba gø, ki teek man cäŋa gø lwørrø. 'Ba luummögø jooda baŋ Wära.»

¹⁹'Ba kanyøgø yïthakic jø Juuth acäŋ jïtö ka apääk kiper luupögø.

²⁰Ni kö mo thööthi, ni «Eni ree da anägö, ni ena dïbøøl. ?Aŋø ni cegu ïthu ki luumme?»

²¹'Ba møøk aköö, ni «Luupi ba doo caan dhaanhe mo ree da anägö. ?Aŋø, anägö nyeŋ dhaanhø ma cwør dee jabø?»

²²'Ba kar kanyøgøøni beeye nïr ajwöma yi Jerucalem, ni beeye ajwöm par wïc kiper kanya cïp Øt Jwøk Mana Dwøŋ kur keere.

²³'Ba kar kanyøgø, piny arïïa, ni Jecu nutö kaagø, ni eni cäädhö ya agööl Cølöman na en deŋ Øt Jwøk Mana Dwøŋ.

²⁴Kanyøgø jø Juuth røkge acooŋge buute, ni köge jïre, ni «?Marï ocaanï gø wäne ni wëëgï wa koor en? Ni näk beeye ïïni na Krictø, caanï jïwa ni wïnyö jaak.»

²⁵Ni løgi ya Jecu jïge, ni «Anø caana jïïu, 'ba u bäŋ wø jïëy. 'Ba tïïe mo wø tïïa ki nyeŋ Wära beege wø køp gïra.

²⁶'Ba uuni, u kär jïëy, kiper na ba enu ri dïëga.

²⁷'Ba dïëga dwøra wø wïnyge wïnynyö, ni ŋääa geni, ni ö geni ni cääthge køøra.

²⁸Ni cïpa jïge ki kwøw mana näk adïëri mo bäŋ cuŋŋe. 'Ba ge ba doo maara ränynyö, ni bäŋ ŋat mo doo gwëën ge wøk cera.

²⁹Wära na cïp geni jïra, dwøŋŋa eni ki jammi bëët, ni bäŋ ŋat mo doo maara lønyø jïre ki man gwëën ge wøk cer Wära.

³⁰Aani ki Wuuö, waana acielø.»

³¹'Ba jø Juuth gena cäŋ kwänynyö ki kïte nee eni këërge.

³²Ni løgi ya Jecu jïge, «Aani tïïe mo thööth mo beyø mo käla baŋ Wära, anyoodha jïïu. ?A manaŋø nø dëëtge noo këëru aani kipere?»

³³'Ba aløk jø Juuthi jïre, ni «Paa per tïïc mo beer noo këërwa ïïni kipere, 'ba beeye per ajaany. Kiper ïïna dhaanhø mo nëëna waani, ni tïïyï riï na Jwøk.»

³⁴Ni løgi ya Jecu jïge, na «?Aŋø, paa ogöörö yi Wëël Ciik Jwøk maru, ni ‹Jwøk aköö, ni uuna juu›?

³⁵?Ni näk jøøa ö luum Jwøki baŋge ee cwølø ni juu, ni moa en yi wëël Jwøk ba maar dhal,

³⁶aŋø, u doo köö, naa jädö, a na cïp Wuue kur keere ni jääŋŋi piny, kiper na kööa, ni ‹Aana O Jwøk›?

³⁷'Ba ni näk maa ba tïïc tïïe mo Wära, käru jïëy ki aani.

³⁸'Ba ni näk maa tïïya geni, këël u bäŋ doo jïëy ni ŋääthu aani, jïëyu ki tïïe, kiper nee ŋäyu ni ci cwïnynyu ni Wuuö ena raa, ni ena ri Wuuö.»

³⁹Ni cäŋge tïmö ni ge manynya man makge gø, 'ba kär päth ceŋge.

⁴⁰'Ba ena cäŋ ŋut løø Naam Jördan kanya kwøŋ Jøønni löö yie na nyuudhi, ni put bëëte kaace.

⁴¹Ni ö jiyi mo thööth baŋe ni ge köö, ni «Jøøn bäŋ ŋïï mo ee tïïö, 'ba luup bëët moa car Jøønni kiper ŋatøgø athur karge na adïëri.»

⁴²Ni jïëc mo thööthi ki eni kanyøce, ni ŋääthge gø.