Read anuak Jøøn 12 Bible Online

Jøøn 12 - anuak bible

Jøøn 12

¹'Ba kanya poode ni dööŋŋa nïne abïciel kiper ajwöm-cam Cäŋa Pööth Thøøe Yie, Jecu aö yi Bethani, kanya bëët Ladhara yie, ŋata tïŋ Jecu maal ki yi thøø.

²Kanyøgø Jecu atïmge ki cam. 'Ba Martha beeye na käl cam, ni Ladhara ena dï jøøa en kar cam ki eni na aciel.

³Ni ö Meeri ni lwöte ki maaw mo ŋeew ka gwel mo thööth, ni wïïr tiet Jecu ki gøøni, ni pøc gø ki jïëye. Ni ö øte bäre ni pääŋe ki ŋwääny maaw manøgø.

⁴'Ba Juudac Ickarïët na en dï bääge, ŋato cïp eni ceŋ nyïïmänne, aköö,

⁵na «?Aŋø na ba dwøk maarøgøøni pwödhö ki gwel ma dïpe adägö, ni mëëk gwete jøøa can?»

⁶'Ba luummögøøni ba caane kaper ni yie met ki man køny jøøa can, 'ba caane kaper na näk ena kuu, no opïr gwel ena cere, ni eni wø lwötö ri mo wø kïth yie.

⁷'Ba Jecu aköö, «Wec nyaanøgø, nee gïnögø bëëde na ŋïï kiper cäŋo koony aani yie.

⁸Jøøa can wø ena dïïu cooth, 'ba aani, a ba en dïïu cooth.»

⁹'Ba na wïnynyi ya lwaa jø Juuthi ni eni ena kaace, gena öö bëët, ni ge ba ööi kaper Jecu keere, 'ba ge ööi nee Ladhara raŋge thuwø, ŋata tïŋ maal ki yi thøø.

¹⁰Kanyøgøøni kwääc laam ocäänö ni Ladhara 'näkge nääö thuwø,

¹¹kiper mana tïm jø Juuthi mo thööth ni rege ege løø baŋ Jecu, ni jïëcge ki eni ni ŋääthge gøøni ki køør mana neenge ri Ladhara.

¹²'Ba kanya tïme na aruunnø man lwaak mo päl mana ö kar ajwöm-cam Cäŋa Pööth Thøøe Yie, awïnyge ni Jecu ööa yi Jerucalem.

¹³Kanyøgø gena käädö ki bäät tuue ni cige kuna røømge ki eni, ni ge rëëdö, ni «Odhaana! Pwøc en jï Jwøk![8] Gwïëth en ri ŋat ööi en ki nyeŋ Wuuö Jwøk, ni beeye na Nyeny jø Icriel.»

¹⁴'Ba na ö Jecu na joot nya arëën, ena pï bäät gøøni kaa mana gööri,

¹⁵ni «Kärï lwäyö, Dhayan. Raŋï, nyeya marï ööa baŋï, ni ena bäät nya arëën.»

¹⁶'Ba dïkwøŋ tier luummögø kär ci cwïny bääge ni beer. 'Ba na jït Jecu ka ajiem, wïthge aputge par ni gïïa näk ogöörö kipere athur karge.

¹⁷'Ba lwaaa en buute kanya cwöl Ladhara wøk ki yi bwörö, ni tïŋ gø maal ki yi thøø, beege na køp gïr gø.

¹⁸Ni beeye tiere na ci lwaaki nee røømge ki eni, kiper na wïnyge ŋïï manøgø na tïïe.

¹⁹'Ba kanyøgøøni jø Paricith acäänö yïthakicge keerge, ni «Käru joodø, uuni, bäŋ gïn mo maaru tïïc! Neennu, dhaanhø bäre aci køøre!»

²⁰'Ba da jø Gïrïïk dï jøøa ci baŋ lam yi kar ajwöm-cam Cäŋa Pööth Thøøe Yie.

²¹Ni öge baŋ Pilip na näk nyï Betheeda, paac mo ena yi Galili, ni köge jïre, «Ŋat dwøŋ, wa caya man neenwa Jecu.»

²²Ni ci Pilipi ni caan gø jï Andaru. Ni ci Andaru ki Pilip ni caange gø jï Jecu.

²³Ni løgi ya Jecu jïge, ni «Kanyo jiem Wär Dhaanhø yie kare acäännö.

²⁴Adïëri møn, acaana gø jïïu, ni näk waŋ bëëlö kär päth yïth ŋøøm ni thøøe, waŋ bëëllögø doo bëëdö keere. 'Ba ni näk mo othøw, beeye wø känne ki nyïëdi mo thööth.

²⁵Ŋat wø mëër ki jwïëye, wø nyääga gø. 'Ba ŋat wø män ki jwïëye yi pinyi en, gwøga gø kiper kwøw mana näk adïëri mo bäŋ cuŋŋe.

²⁶'Ba ni näk da ŋat mo tïnynya aani, wär eni caath køøra. Ni kanyo ena yie, beeye kanyo en ŋat wø tïny aani yie thuwø. 'Ba ni näk da ŋat mo tïnynya aani, eno røøny Wära.

²⁷«Kawaane ennø cwïnya opädhö. ?'Ba agïnaŋø noo caana? ?A doo köö, na ‹Awuuö, wëëk a pöödhö ki yi gïn›? Patha eni, kiper beeye kanya wäŋŋi en na öönynya.

²⁸Awuuö, jiem nyeŋŋï.» Køøre dwøl aput öö ki maal, ni kööe, na «Anø jiema, ni cäŋa ka jiemmø.»

²⁹'Ba lwaaa cuŋŋö buute na wïnyge dwørøgø, gena köö, ni «Køth amäär.» 'Ba møøk aköö, «Ni cäänö nyïïatwiel maal ki eni.»

³⁰Ni løgi ya Jecu, «Dwørøgøøni ööi kaperu, ni ba ööi kapera.

³¹'Ba beeye kar ŋøl luum piny en nø. Ni kawaane beeye kanyo riem kwääy pinyi wøk yie.

³²'Ba aani kanyo tïŋ a maal bäät piny, jiy bëët onyïïa baŋa.»

³³Luummögø caane ni nyootha thøø mano thøøe ki gø.

³⁴'Ba aløk lwaaki jïre, na «Awïnywa ri ciik Jwøk ni Krictø doo bëëdö na bäre bäre. ?Aŋø na caanï gø, ni Wär Dhaanhø doo tïŋa maal? ?Wär Dhaanhnhøgø aŋa?»

³⁵Ni kö Jecu jïge, ni «Tar obëëdö dïïu ki kany mo thiinh. Cäädhu kany poode ni tar bëëdö dïïu en, kiper nou ba mac muudhe. 'Ba ŋat wø cäädhi yi muudhö, kun wø ci yie kuue.

³⁶Kany poode ni tar ena buutu en, jïëyu ki tayøgø ni ŋääthu gø, kiper nou tïmu ni uuna nyïï tayøgøøni.» 'Ba na løny Jecu ki caan luummögøøni, ena aay ni kan ree ki ge.

³⁷'Ba këël na bëët Jecu ni tïïö ki ŋïïce mo thööth, jø Juuth kär jïëy ki eni ni ŋääthge gø.

³⁸Ni beeye kiper nee luumma caan nyikuŋ Jwøki ma Aydheea thur kare, na köö, ni «?Wui Wuuö Jwøk, aŋa na ŋääth luumma køpwa? ?Na a jï ŋa na nyuth bat Wuuö Jwøk eni?»

³⁹Ni beeye na kärge jïëy, kaawat mana cäŋ Aydheea caannø,

⁴⁰ni «Nyeŋge awëëk Jwøki cøørø, ni tïïc cwïnyge ni teek, kiper nee ba neenge ki nyeŋge, ni ba kwanyge tier gø ki cwïnyge, nee rege ba cäŋge luu baŋa nee ge kønya.»

⁴¹Luummögø acaan Aydheea kiper na joot ajiem Jecu, ni cääne kiper gø.

⁴²'Ba këël dïbwöthe mo thööth ojïëy ki eni ni ŋääthge gøøni, 'ba kiper mana lwäärge ki jø Paricith, marge kärge caanø, kiper nee ge ba riem wøk øt acooŋ lam.

⁴³Kiper ge mëër ka pwøc jiy, ni kaala pwøc mar Jwøk.

⁴⁴'Ba Jecu dwøre atïŋ maal døc ni kööe, ni «Ŋat wø jïëy ki aani ni ŋääth a, ba jïëc aani keere, 'ba jïëya eni na jääŋ aani thuwø.

⁴⁵Ni ŋat wø neen aani, neena eni na jääŋ aani.

⁴⁶Aana öö ni aana tar kiper piny, nee ŋato jïëy ki aani ni ŋääth aani nee ba dööŋe yi muudhö.

⁴⁷'Ba noo dee ŋat mo wïny luup moa caana ni ba gwøk geni, eni ba ŋøla wøk. Kiper a kär ö kuna ŋøla luup mo piny, 'ba a ööa kuna piema piny.

⁴⁸'Ba ŋat wø kweer ki aani ni ba wïny luup moa caana, da ŋat mo ŋøla luumme piny. Ni beeye luubö mana kwøŋa caan noo ŋøl mare piny yi cäŋo cuŋ pinynyi yie.

⁴⁹Kiper aani, a ba caan luup mo käla wïïa, a keera. 'Ba Wuuö ki dëëre na jääŋ aani beeye na cïp luubö mano caana ki mano looba.

⁵⁰Ni ŋääa ni ciik mare beeye kwøw mana näk adïëri na bäŋ cuŋŋe. Kiper manøgønø, aani, gïï wø caana, wø caana keda mana køpi ya Wuue jïra.»