Read anuak Jøøn 13 Bible Online

Jøøn 13 - anuak bible

Jøøn 13

¹'Ba kanya cään kar ajwöm-cam Cäŋa Pööth Thøøe Yie, aŋäc Jecu ni kanyo aae pinyi en noo ci baŋ Wuuö kare acäännö. Ni eni mëër ki jiye na en piny, ni bëëdö ni mëër ki geni këël aŋuun kwøw mare.

²'Ba kanya pootge ni ge ena kar cam, na anägö gïn mør ee nø kïth cwïny Juudac Ickarïët na näk o Cayman nee Jecu cïbe ceŋ nyïïmänne,

³Jecu na ŋäc gø ni jammi bëët ocïp Wuue cere, ni eni ööi ka baŋ Jwøk, ni eni cäŋa døø baŋ Jwøk,

⁴aö maal kar cam, ni cïp abïïge piny, ni lwöte ki puutha, ni dwøl gø dëëre.

⁵Køøre pïï akøny ya athäänh ni täge ki man lwøk tiet bääge, ni pooc geni ki puunhnha näk ee dwøl dëëre.

⁶Ni ö baŋ Cayman Piter. Ni kö Piterri jïre, na «?Aŋø Kwäärö, tieta diï lwøø?»

⁷Ni løgi ya Jecu jïre, «Man tïïa en kuyï ennø, 'ba noo näk køøre tiere ojootï.»

⁸Ni kö Piterri jïre, «Ïïni tieta ba diï lwøø na bäre.» Ni løgi ya Jecu jïre, «Ni näk ï ba lwøa, jïrï bäŋ karï buuta.»

⁹Ni kö Caymanni Piter jïre, «Kwäärö, paa tieta keerge noo lwøgï, 'ba këël ceŋŋa ki wïïa thuwø.»

¹⁰Ni kö Jecu jïre, ni «Ŋat mo onø lwøk, ba many lwøk këët, 'ba beeye tiete keerge na dee lwøø, kiper dëëre bäre waany. Ni uuni, dëëtu waany, 'ba paa u bëët.»

¹¹Kiper eni ŋato cïp eni ceŋ nyïïmänne ŋääe. Beeye na caan luummi, ni «Paa dëëtu bëët ni waany.»

¹²'Ba na lønye ki lwøk tietge, ni lwør abïïge ni døø kare, ena köö jï bääge, «?Gïna tïïa jïïu en tiere ŋäyu?

¹³A wø cwøllu cwølø ni Dïpööy, ni cwøllu a ni Kwäärö, ni beeye kare, kiper beeye aani.

¹⁴Ni näk aani na näk Kwääyu, ni näga Dïpööy, tietu yaa lwøø, uuni thuwø ŋati man nø tiet watge dee lwøø.

¹⁵Kiper man beeye nyuudhi mana cïba jïïu, nee tïïyu thuwø kaawat mana tïïa gø jïïu.

¹⁶Adïëri møn, a caana gø jïïu, ni ŋat tïïc ba dwøŋŋa eni ki kwääye, wala eni na jääŋŋi ba dwøŋŋa eni ki ŋata jääŋ gø.

¹⁷Ni näk mo gïïögø ŋäyu, uuno gwïëth kany wø tïïyu geni.

¹⁸A ba cäänö kaperu bëët. Aani moa jiera ŋääa. 'Ba mana no ogöörö thura kare, na en nø, ni ‹Eni na cam møga, aana cääbe ko opunye.›

¹⁹'Ba a caana gïn jïïu kawaane, kany poode ni poot kär tägö, kiper kanyo täge nee u jïëyu ni beeye aani na Eni.

²⁰Adïëri møn a caana gø jïïu, ni ŋat wäro jïëc ŋato jääŋŋa, jïëya aani; ni ŋato wäro jïëc aani, jïëya eni na jääŋ aani.»

²¹'Ba na løny Jecu ki caan luummögø, cwïnye apädhö, ni put dwøre caan, ni kööe, na «Adïëri møn, a caana gø jïïu, ni dhaanhø aciel dïïu aano cïp ceŋ nyïïmän.»

²²Ni ö bääge ni neetge nyeŋge, ni ŋata cääne kipere kucge.

²³'Ba dhaanhø aciel dï bääge mana mëër Jecu ki gøøni, ree ee nyaaŋ piny na akicge cään ki Jecu.

²⁴Kanyøgø Cayman Piter amuuŋ bäät ŋatøgø ni kööe, «Caan ŋata cääne kiper gø jïwa.»

²⁵Køøre ŋata näk ree ee nyaaŋ piny na akicge cään ki Jecu aköö, ni «?Kwäärö, aŋa na wärï?»

²⁶Ni løgi ya Jecu, ni «Beeye ŋato cïba møgo cwenya en jïre.» 'Ba na nø cweny møø, amëëk Juudac o Cayman Ickarïët.

²⁷'Ba køør møgøgø, Ceethan aput døny cwïnye. Ni kö Jecu jïre, «Gïno tïïyï, laar tïïc nø.»

²⁸'Ba bäŋ dhaanhø aciel kar cam mo oŋäc tier gïna caane jï ŋatøgø.

²⁹'Ba jø møøk acädö ni Jecu caana gø jïre, ni «Ci ŋëëwï ki gïï wø manynyi kiper ajwöm cam,» wala caana gø nee ci kuna cïpe ki gïrpiny jï jøøa can, kiper mana näk opïr gwel ena cere, e na Juudac.

³⁰Køøre Juudac na nø lwør møgøgø, ena put aa wøk. 'Ba piny a wäär.

³¹'Ba na nø aa Juudac wøk, Jecu aköö, ni «Kawaane, ajiem Wär Dhaanhø aci kare, ni ö Jwøki ni jïte ka ajiem ki ree.

³²'Ba ni näk Jwøk ojiemø ki ree, eno jiem Jwøki thuwø ka ajiem mana en jïre, ni put gø jiem.

³³Nyïïobwöre, a poot en buutu ka kany mo thiinh. Aani, aano cayu, 'ba kanyo cøøa yie, u ba doo maara ö yie, kaawat mana caana gø jï jø Juuth. Ni beeye ni caana jïïu en.

³⁴'Ba a wëëga uuni ciik mo nyään, ni mëërru ki røgu, keda mana mëëra ki uuni, kiper nou tïmu nou mëër ki røgu thuwø.

³⁵Beeye noo ŋäyi ya jø bëëti ni uuna bääga, ni näk mou mëër ki røgu.»

³⁶'Ba Cayman Piter aköö jïre, ni «?Kwäärö, a kaa ŋø noo ciï yie?» Ni løgi ya Jecu, ni «Kanyo cøøa yie en, ï ba doo ööa køøra. 'Ba ïïno läm køøra cään.»

³⁷Ni kö Piterri jïre, ni «?Kwäärö, aŋø ni ba ööa køørï ennø? Jwïëya ocïba kiperï.»

³⁸Ni løgi ya Jecu, na «?Aŋø, ïïni jwïëyï diï cïbö kipera? Adïëri møn, a caana gø jïrï, ni gwienø ba doo köök, ni riï poot kärï mooŋø ki aani kwöre adäk naa kuyï.»