Read anuak Jøøn 16 Bible Online

Jøøn 16 - anuak bible

Jøøn 16

¹«Luup moï bëët acaana jïïu, nou ba døøu cään.

²Uuno mänge ki ciin uut acook lam. 'Ba ka adïëri møn, da caa mo öö, mo jø wø 'näk uuni caarge caarø ni ge tïnynya Jwøk.

³'Ba gïnögø otïïcge kiper na kucge Wuuö ki aani bëët.

⁴'Ba luup moi bëët acaana jïïu, kiper kanyo täk gïnögø, nee wïthu parru, ni gïïögøøni yaa kwøŋ caan jïïu. «'Ba dïkwøŋ luummögøøni kära kwøŋ caan jïïu, kiper na pooda naa ena buutu.

⁵'Ba kawaane a døøa baŋ Ŋata jääŋ aani. 'Ba poot bäŋ dhaanhø dïïu mo opëëny aani en, ni ‹?Ï ciï kaa ŋø cøøn?›

⁶'Ba kiper mana caana gïï jïïu, beeye ni bëët cwïnynyu ni kïmmö døc en.

⁷'Ba kawaane a cäänna uuni ka adïëri, ni doo beerra eni jïïu ki man aa. Kiper ni näk maa ba aay, Dïkunyi ba ö baŋu. 'Ba ni näk maa aay, eni ojääŋŋa baŋu.

⁸'Ba noo ööe, gïïa bac jø pinynyi onyuth geni, ki bëënynyö, ki ŋøl luup.

⁹Bääyö mar jø piny onyuth geni, kiper na ba jïëcge ni ŋääthge aani.

¹⁰'Ba bëënynyö onyuth geni, kiper a cøøa baŋ Wuuö naa ba laaru joot.

¹¹Ni ŋøl luup onyuth geni, kiper kwääy pinyi oŋøl wøk.

¹²«'Ba jïra poot da luup mo thööth mo daa caanø jïïu. 'Ba ba maar lønyø jïïu ki man wïnynyu gø kawaane.

¹³'Ba kanyo ö Jwïëc Jwøki ni wø cïp adïëri, moa näk adïëri bëët onyoodhe jïïu. Kiper eni bäŋ gïn mo caane ki wïïe keere, 'ba man wäro wïnynye beeye noo caane. 'Ba japo tägi yi nyïm, ocaane jïïu.

¹⁴'Ba aano jieme, kiper gïno näk mara olwøre ni køp gø jïïu.

¹⁵'Ba moa en jï Wuuö bëët beege 'moa. Beeye na caana gø, ni gïno näk mara olwøre ni køp gø jïïu.

¹⁶«'Ba ki kany mo thiinh a ba neennu. 'Ba ki kany mo thiinh aano cäŋu neennø.»

¹⁷'Ba møøk dï bääge røkge apëënyge, ni «?Man agïnaŋø ni caane jïïø en, ni ‹Ki kany mo thiinh a ba neennu, 'ba ki kany mo thiinh aano cäŋu neennø›, ki mana caane ni kööe, ni ‹Kiper a cøøa baŋ Wuuö›?»

¹⁸Ni köge, ni «?Tier ‹kany mo thiinh› agïnaŋø na caan gø? Tier gïna caane kuuø.»

¹⁹'Ba ŋäc Jecu ni ge caya man pëënyge eni, ni kööe jïge, ni «?U pëënynya røgu ki tier gïna caana jïïu, ni ‹Ki kany mo thiinh a ba neennu, 'ba ki kany mo thiinh aano cäŋu neennu›?

²⁰Adïëri møn a caana gø jïïu, ni uuno jwöŋi ni dhööŋŋu kööthu, 'ba jø piny yïthge omïnni. Uuni cwïnynyu opädhi, 'ba pänh cwïny maru oløk na met ec.

²¹Dhaagø kany wø täk mäc lwaarri dëëre, cwïnye wø pädhö, kiper na ö kare. 'Ba kany wø ö nyilaalli wøk, eni wïïe ba caare ki rääm këët, kiper na tïm yie ni met ki nyilaal mana nywøle.

²²'Ba ennø, beeye kar pänh cwïny maru, 'ba uuno cäŋa neennø, ni ö cwïnynyu ni mïnge, ni bäŋ dhaanhø mo raany met ec maru këët.

²³'Ba dïcäŋöca bäŋ gïn mo pëënynyu a ki gø. Adïëri møn, a caana gø jïïu, ni gïn wäro pëënynyu Wuuö ki gø ki nyeŋŋa, ocïbe jïïu.

²⁴'Ba kawaane poot bäŋ gïn mo you pëënynyö ki nyeŋŋa. Pëëu, ocïp jïïu, nee met ec maru kääthe.

²⁵«Luup moi acaana jïïu ni tietge ba nëëni døøc, 'ba da kany mo öö maa ba cäänö jïïu ki luup mo tietge ba nëëni këët, 'ba mo Wuuö oputa caan jïïu ni wïnyö jaak.

²⁶'Ba dïcäŋöca uuno pëëö ki nyeŋŋa. 'Ba a ba caan gø jïïu, ni Wuuö okwaa kiperu.

²⁷Kiper Wuuö ki dëëre mëër ki uuni, kiper na mëërru ki aani ni jïëyu naa käla baŋ Wuuö.

²⁸A käla baŋ Wuuö møn, ni ööa piny en. 'Ba a cäŋa aay piny ni døøa baŋ Wuuö.»

²⁹Ni kö bääge, «Adïëri møn, acaanï ni tiere wïnyö kawaane, ni paa luup mo tietge ba nëëni këët.

³⁰'Ba kawaane ï ŋäcwa ni jammi bëët ŋäyï, ni doo bäŋ dhaanhø mo pëëny ïïni këët. Ni beeye na jïëcwa niï käla baŋ Jwøk.»

³¹'Ba aløk Jecu jïge, na «?Aŋø, uuna jïëy ennø?

³²Da kany mo öö, ni beeye ennø møn, kanyo keethu noo ö ŋati man nø noo aa paare, ni weyu aani keera. 'Ba a ba dööŋ a keera, kiper Wuuö ena buuta.

³³Man en a caana jïïu, nee bëët-mëër nee jootu baŋa. Uuni, gïï mo leth ojwørru yi pinyi en. 'Ba magu cwïnynyu, kiper piny yaa nø böötö.»