Read anuak Jøøn 19 Bible Online

Jøøn 19 - anuak bible

Jøøn 19

¹Kanyøgø Paylat Jecu alwøre ni wëëk gø pwöt.

²Ni ö jø tøŋŋi ni tïïcge koodhi na aduda ni kïthge gø wïïe, ni runyge dëër gø ka abïï ma dïmuur.[11]

³Ni öge baŋe ni köge, ni «Ïïna määth, nyeny jø Juuth.» Ni dhööŋge gø ki ceŋge.

⁴Kanyøgø Paylat acäŋ ö wøk ni kööe jï jø Juuth, «Neennu, ena käla wøk baŋu en, kiper nee ŋäyu ni bäŋ gïn mo obøth mo yaa joodø baŋe.»

⁵Køøre Jecu aö wøk na adun koodhi ena wïïe, ni dëëre orunynyö ka abïï ma dïmuur. Ni kö Paylati jïge, «Neennu, ŋatøca en.»

⁶'Ba na neeni ya kwääc laammi ki dïkuye mo Øt Jwøk, gena rëëdö døc, ni köge, ni «Gurï! Gurï bäät jaadha no odëëdö!» 'Ba Paylat aköö jïge, ni «Lwørru ki dëëtu ni guru gøøni bäät jaadha no odëëdö, kiper aani bäŋ gïn mo obøth mo yaa joodø baŋe.»

⁷'Ba aløk jø Juuthi jïre, ni «Jïwa da luubö ri ciik Jwøk, 'ba ki køør luummögøøni, eni doo nääö kiper na døøc ree O Jwøk.»

⁸'Ba Paylat na wïny luummögøøni, lwär mare akääthö.

⁹Ni cäŋ døø øt bura ni kööe jï Jecu, na «?A kaa na kälï yie?» 'Ba Jecu bäŋ gïn mo ee løø.

¹⁰Kanyøgø Paylat aköö jïre, na «?Aŋø, ï ba cäänö ki aani? ?Kuyï ni jïra da teek ki man päda ïïni, ki teek man gura ïïni bäät jaadha no odëëdö?»

¹¹Ni løgi ya Jecu jïre, ni «Jïrï doo bäŋ teek bääta, onää kär wëëk ïïni ki maal. Kiper manøgønø, ŋata cïp aani jïrï, dwøŋŋa ajälle ki marï.»

¹²'Ba kanyøgø Paylat amäänyö ki jöö man pät Jecu ki gø. 'Ba jø Juuth arëëdö døc, ni köge, ni «Noo pätï ŋatøgøøni, ï paa nyawat Cidharri këët. Kiper jiy bëët mo wø thïïŋ rege na nyeye, ge thïïŋa rege bäät Cidhar.»[12]

¹³'Ba Paylat na wïny gïïögøøni, Jecu akäl wøk, ni pï piny bäät køøm løøk bäät thudhi, na cwøl ni Gabatha ki dhi Ibaru.

¹⁴'Ba dïcäŋögø beeye dïcäŋ jiiŋ røk kiper ajwöm-cam mar cäŋ Cäŋa Pööth Thøøe Yie. 'Ba beeye caae abïciel. Ni kö Paylati jï jø Juuth, ni «Nyenynyu en.»

¹⁵'Ba gena rëëdö døc, ni köge, «Aayï ki gø, aayï ki gø, ni gurï gø bäät jaadha no odëëdö!» 'Ba Paylat aköö jïge, «?Aŋø, nyenynyu daa gurö bäät jaadha no odëëdö?» Ni løgi ya kwääc laammi, ni «Waani jïwa bäŋ nyeya mør, 'ba beeye Cidhar keere na nyeya marwa.»

¹⁶Kanyøgø ena cïbe jïge, nee gur bäät jaadha no odëëdö.

¹⁷Ni ö dïkuye ni kälge Jecu, ni cøøe, ni käära jaadhe na no odëëdö, ni cøøa kany mo cwøl ni Kar Cuu Wïc, na cwøl ni Gølgøtha ki dhi Ibaru.

¹⁸Kanyøce ena gurge bäät jaadha no odëëdö, ni 'näkge gø ki jiy ariiø møøk, na aciel ena bäät caam, ni maya ena bäät cwïïc. Ni Jecu ena yïthakicge.

¹⁹'Ba Paylat agöödö ki luubö, ni kïth gø wï jaadha no odëëdö. Ni luumma gööre beeye en, «Ŋati en beeye Jecu nyï Nadhareth na näk nyeny jø Juuth.»

²⁰Ni ö jø Juuthi mo thööth ni kwaange luummögø, kiper kanya 'näk Jecu yie bäät jaadha no odëëdö kare cään ki pääny. Ni luummögø göör ka dhi Ibaru, ki dhi Latin, ki dhi Gïrïïk.

²¹'Ba kanyøgøøni kwääc laam mo jø Juuth aköö ki Paylat, ni «Kär luummögø göörï, ni ‹Nyeny jø Juuth›, 'ba göörï, ni ‹Nyeni en aköö, ni Beeye aani na nyeny jø Juuth.› »

²²'Ba aløk Paylati, ni «Mana gööra, anø gööra.»

²³Kanyøgø na ö jø tøŋŋi na nø gurge Jecu bäät jaadha no odëëdö, abïïge alwørge ni pääŋge ge na thäŋi aŋween, ni røm dïkuye moøgø karge ŋweeni. Ni jalabiinynye patha okwøø, 'ba ocwääö na aciel bäre, ni tägi ka maal këël mana këët piny.

²⁴Kiper manøgønø, gena cäänö yïthakicge keerge, ni köge, «Kär jeeyø; 'ba beerra man kwäägø ki baw nee ŋato ci jïre nee joodø.» Manøgø tägi kaper nee luumma en yi wëël Jwøk thur kare, na køp, na «Abïïga apääŋge yïthakicge, ni tïïge ki nyuuthe kiper abïïna maya.»

²⁵Køøre gïnögø atïïc jø tøŋŋi. 'Ba jøøa cuŋŋö buut jaadha no odëëdö mar Jecu beeye menni ki cöök menni, ki Meeri cï Kilöpa, ki Meeri Magdalin.

²⁶'Ba na ö Jecu na neen menni, ki bääŋ mana mëëre ki gøøni ni ge cuŋŋa kany mo cään, ena köö ki menni, «Ayaŋ, neen wäädï.»

²⁷Køøre ena köö jï bääŋ manøgø, ni «Neen meru.» Ni puti ya bääŋögø lwør yi caannøgø ni kïth gø paare.

²⁸Køør manøgø na ŋäyi ya Jecu ni jammi bëët anø thur karge, ena köö, ni «Raa da riew.» Manøgø acaane nee luumma en yi Wëël Jwøk thur kare.

²⁹'Ba kaace da awal mo ocïp piny mo yie da køøŋ nyïïomøki mo wac. Kanyøgø gena lwötö ki lïïpa ni cøtge gø yi køøŋø manøgø, ni cømge gø wï jaath, ni rwaakge gø dhee.

³⁰'Ba na ö Jecu na bel køøŋ nyïïomøki manøgø na wac enø, ena köö, «Aløny nø.» Ni put wïïe kuul piny ni cïp jwïëye.

³¹'Ba kiper mana tïm cäŋögø na cäŋ jiiŋ røk, jø Juuth Paylat apëënyge nee tiet jøøgø tøyi, nee dëëtge käl wøk, kiper nee ge ba bëëtge bäät jera no odëëdö ki cäŋ jwömö, kiper mana näk cäŋ jwömöce beeye cäŋ mo dwøŋ.

³²Kanyøgø jø tøŋ aöö ni tøcge tiet ŋata cwöpge ki gø, ki tiet dhaanhø maya mana näk ogurö buut Jecu bäät jaadha no odëëdö.

³³'Ba na öge baŋ Jecu na jootge gø ni eno nø thøø, tiet gø kärge tøyø.

³⁴'Ba dhaanhø aciel dëët jø tøŋ tier-buut Jecu acwøbe ki tøŋ, ni put remø ki pïï ö wøk.

³⁵'Ba ŋata neen gøøni ki waŋe beeye na caan mare kiper gø, ni mana caane beeye adïëri, ni ŋääe ni eni caana adïëri, kiper nee uuni thuwø, nou jïëyu ni ŋäädhu.

³⁶Gïïögøøni atägö kaper nee luumma en yi Wëël Jwøk thur kare, na køp, ni «Eni bäŋ cöö dëëre mo otoor.»

³⁷'Ba ocäŋ caannø yi wëëlö maya, ni «Dëër ŋata cwøpge, oneenge.»

³⁸'Ba na tïme na køør manøgø, ŋat mo cwøl ni Jocep nyï Arimathia, ma bääŋ Jecu mo ree käre nyoodhø kiper mana lwääre ki jø Juuth, Paylat apëënynye nee dëër Jecu käle. Ni ö Paylati ni jïëe ki mare. Ni ööe ni lwør dëër Jecu.

³⁹'Ba Niködima na kwøŋ ö baŋ Jecu ki wäär, aöö ni käla jer wø ŋwääi ni met mo orubö mo jïtö ki kïïle ma pïëradäk.

⁴⁰Ni öge ni lwørge dëër Jecu ni bøønyge gø ka abïïk koony, ni pørge bäät gø ki jerøgø ni wø ŋwääi ni met, ki køør kööŋŋö mar koony mar jø Juuth.

⁴¹'Ba kanya nääi yie bäät jaadha no odëëdö, da pwöth jenni. 'Ba yi pwöthögø yie da bwöc kïdi mo orøø mo nyään, mo poot bäŋ dhaanhø mo okoony yie.

⁴²'Ba kiper mana tïm cäŋögø na cäŋ jiiŋ røk mar jø Juuth, ni bwöyögøøni kare cään, dëër Jecu akïthge yie.