Read anuak Jøøn 2 Bible Online

Jøøn 2 - anuak bible

Jøøn 2

¹'Ba na tïme na ri dää nïne da nywöm ma atïïc yi Keena yi Galili. 'Ba mii Jecu ena kanyøce.

²Ni Jecu thuwø ocwølø kar nywöm ki bääge.

³'Ba na thum køøŋ nyïïomøki, mii Jecu aköö jï Jecu, ni «Køøŋ nyïïomøki athum jïge.»

⁴'Ba Jecu aköö jï menni, «?Ayaŋ, agïnaŋø ni tïïyï ki aani en? Kara poot kär öö.»

⁵Ni kö menni jï jø tïïc, ni «Noo dee gïn mo caane jïïu, wär tïïyu.»

⁶'Ba kaace da dääe abïciel mo otïïc jø Juuthi na mo wø jiiŋge dëëtge ki geni, na aciel yie da rumme ariiø wala adägö.[2]

⁷Ni kö Jecu jïge, ni «Pääŋŋu däägögø ki pïï.» Ni ö geni ni pääŋge ge gøøc dhøkge.

⁸Ni kööe jïge, ni «Lwötu rege kawaane ni mëëgu gø kwääy nywöm.» Ni putge gø käl.

⁹'Ba na ö kwääy nywömmi na bel pïïögø na tïmö na køøŋ nyïïomøki, ni kanya käl yie kuue, 'ba ŋäya jø tïïci na twøm pïï; eni ŋat nywöm acwøle.

¹⁰Ni kööe jïre, «Nyie, jiy bëët wø kwøŋa køøŋ nyïïomøki moa met kälö, 'ba noo mäth jiyi døøc, køøre mo wø bäth cäŋ ka kälö nø. 'Ba ïïni køøŋ nyïïomøki moa met adwøgï cään, gøøc kawaane en nø.»

¹¹Manøgø beeye ŋïï mana tïïc Jecu dïkwøŋ yi Keena yi Galili, ni nyootha ajieme. Ni ö bääge ni jïëcge ki eni ni ŋääthge gøøni.

¹²'Ba køør manøgøøni Jecu aci yi Kapernaam, ki menni ki nyïïmenni ki bääge. Ni bëëtge kaace ki nïne mo nøk.

¹³'Ba ajwöm-cam Cäŋa Pööth Thøøe Yie[3] mar jø Juuth kare ocäännö, ni ö Jecu ni ci yi Jerucalem.

¹⁴'Ba na ö yi kal mar Øt Jwøk Mana Dwøŋ, jø wø dwök pwödhö ki rwädhe ki dïëk ka akuyi, ki jø wø wïïdö ki gwel ajoode ni geno pï piny kwör tïïe moge.

¹⁵Kanyøgø ena tïïö ka adaay, ni riem jøøgø wøk bëët ki yi kal mar Øt Jwøk Mana Dwøŋ, ki dïëk ki rwädhe, ni køny gwel piny mo jø wø wïïdö ki gwel, ni jaal tharabëëte moge.

¹⁶Ni ööe ni luum jø wø gädhö ka akuyi, ni «Kïthu gïïögø wøk. Uuni øt Wära ba dou tïïö na øt gath.»

¹⁷Kanyøgø bääge wïthge aputge caar ki luumma no ogöörö, ni «Remø mara atwak kiper øtø marï.»

¹⁸'Ba jø Juuth aköö jïre, na «?A ŋïï mane noo nyoothï jïwa, na tïïyï gïnögø kipere?»

¹⁹Ni løgi ya Jecu jïge, «Nyagu Øt Jwøk man. 'Ba aani, ødøgø otïŋa maal ki nïne adägö.»

²⁰'Ba kanyøgøøni, jø Juuth aköö jïre, ni «Kanya geer Øt Jwøk manøgøøni, akän wøk ki cwiiri ma pïëraŋween ka abïciel. ?Aŋø, ï doo köö ni tïŋï maal ki nïne adägö keerge?»

²¹'Ba eni caana Øt Jwøk mana näk dëëre.

²²Kiper manøgønø, kanya tïŋi maal ki yi thøø, bääge wïthge aputge caar, ni luummögø akwøŋ caan, ni jïëcge ki luup moa no ogöörö, ki luup moa caan Jecu.

²³'Ba kanya en Jecu yi Jerucalem ya ajwöm-cam cäŋ Cäŋa Pööth Thøøe Yie, jiy mo thööth ajïëy ki nyeŋŋe ni ŋääthge gøøni, kanya jootge ŋïïce moa tïïe.

²⁴'Ba Jecu, dëëre käre wëëk geni, kiper eni jiy ŋääe bëët,

²⁵ni eni ba cac dhaanhø mør mo køp gïr ŋat mør jïre. Kiper eni ki dëëre gïn wø en cwïny dhaanhø ŋääe.