Read anuak Jøøn 21 Bible Online

Jøøn 21 - anuak bible

Jøøn 21

¹'Ba køør manøgø Jecu ree acäŋ nyoothø jï bääge bäät Puul Taybiria. Ni ree nyoodhe na ennønø jïge.

²Cayman Piter, ki Tøma na cwøl na Acwiek, ki Nathaniel nyï Keena paana en yi Galili, ki wäät Dhebedi, ki bääge ariiø møøk, geno dwät kanya ciel bëët.

³'Ba Cayman Piter aköö jïge, na «A cøøa baŋ bïth.» Ni köge jïre, ni «Wa cøø ki ïïni na aciel.» Ni cige wøk ni cige yi jääy. 'Ba dïwäänögø, bäŋ gïn mo ege maa.

⁴'Ba na tïme na amöölla ni cäŋ tuulö, Jecu acuŋŋö bäät ageela. 'Ba kuc bääge ni beeye Jecu.

⁵Ni kö Jecu jïge, no «?Obwöre, jïïu da rec?» Ni løkge gø jïre, ni «Bäŋgø.»

⁶Ni kööe jïge, «Leeŋu ajääp kur jääy manø ni bäät cwïïc enø. Uuno jïti.» Køøre ajääp aleeŋge, ni putge mägö, ni dhäl geni ki man kälge gø wøk, kiper rec na thööth yie.

⁷'Ba bääŋ mana mëër Jecu ki gøøni aköö jï Piter, ni «Nyie, manøgø beeye Kwäärö.» 'Ba na wïnynyi ya Cayman Piterri ni beeye Kwäärö, eni abïïge akïth dëëre, kiper na bëëde na abïïge ee käl wøk kiper bïth, ni put päär yi naam.

⁸'Ba bääge møga gena öö ki jääy ni ge pieya ajääp na päŋ ki rec, kiper na ba bäär karge ka ageela. 'Ba ge ena yi naam mëëth.

⁹'Ba na pïïcge wøk bäät ageela, cuk mo oäbö ajootge no otwäät, ni yie da rec ki møø.

¹⁰Ni kö Jecu jïge, «Kännu ki rec dëët moa magu yøø.»

¹¹Køøre Cayman Piter aci yi jääy ni tuut ajääp bäät ageela, ni päŋ ki rec mo døøŋŋø ma dïpa aciel ki pïërabïïc kurdäk. 'Ba këël na thööth reci døc, bäŋ kany mo ojeec ra ajääp.

¹²Kanyøgø Jecu aköö jïge, ni «Ööu, ni cämu nø.» 'Ba bäŋ bääŋ aciel mo cwïnye ee maa ki man pëëny gø, ni «?Ïïna ŋa?» 'Ba aŋäcge ni beeye Kwäärö.

¹³Kanyøgø Jecu aöö ni lwør møø ki rec ni cïp gø jïge.

¹⁴Manøgø beeye dää nyuudhi mana ö Jecu na nyooth ree jï bääge ki køør mana tïŋi maal ki yi thøø.

¹⁵'Ba na lønyge ki cam, Jecu aköö jï Cayman Piter, ni «?Cayman o Jøøn, ï mëër ki aani ni kaala moi?» Ni kööe jïgø, «Ŋäyï, Kwäärö, naa mëër ki ïïni.» Ni kö Jecu jïre, «Piith nyïï dïëga.»

¹⁶Ni cäŋ köö ri rietge, ni «?Cayman o Jøøn, ï mëër ki aani?» Ni kööe jïgø, «Ŋäyï, Kwäärö, naa mëër ki ïïni.» Ni kö Jecu jïre, «Gwøk dïëga.»

¹⁷Ni cäŋ köö ri dääge, «?Cayman o Jøøn, ï mëër ki aani?» Kanyøgø Piter cwïnye apädhö kiper na pëënynyi ya Jecu kwöre adäk, ni «?Ï mëër ki aani?» ni kööe jïgø, ni «Kwäärö, kawaane jammi bëët ŋäyï. Ni ŋäyï ki man näk maa mëër ki ïïni.» Ni kö Jecu jïre, «Piith dïëga.

¹⁸Adïëri møn, a caana gø jïrï, ni kanya poodï ni ïïna wøp, ï wø ruyö ka abïï, ni ciï kany wø manynyï. 'Ba kanyo jalï, ceŋŋï orwaagï baŋ dhaanhø mør ni kïth abïïnï dëërï, ni kïth ïïni kany mo kärï parø ki man ciï yie.»

¹⁹Luummögø acaane ni nyootha teeŋ thøø mano thøw Piterri ki gø, ni jiema Jwøk. 'Ba køør luummögø ena köö jïgø, ni «Ööï ni cäädhï køøra.»

²⁰'Ba Piter ree aløøe ni joot bääŋ mana mëër Jecu ki gøøni ni lämma køørge, ŋata nyaaŋ ree piny buut Jecu kar cam, na köö, ni «?Kwäärö, aŋa noo cïp ïïni ceŋ nyïïmän?»

²¹Ba na jooti ya Piterri, ena köö jï Jecu, ni «?Kwäärö, a ŋati?»

²²Ni kö Jecu jïre, «?Ni näk beeye mana manynya ni eni dööŋe këël mano ööa, jïrï dee ŋø? Ööï, ni cäädhï køøra.»

²³'Ba luummögø akeethø dï nyïïmëëe bëët, ni ge cäänö ni bääŋ manøgø ba thøw. 'Ba paa mana caan Jecu jïre, ni «Eni ba thøw.» 'Ba mana caane beeye, ni «?Ni näk beeye mana manynya ni eni dööŋe këël mano ööa, jïrï dee ŋø?»

²⁴'Ba bääŋ manøca beeye ni caan mare en kiper gïïögøøni, ni beeye ni göör gïï ii. Ni ŋääø ni mana caane, adïëri.

²⁵'Ba da gïï møøk mo thööth thuwø mo otïïc Jecu. 'Ba onää gïïögø ogöörö bëët, yaa caarø ni piny doo tïmö ni thiinh kiper weeli moøgø na dii göörö.