Read anuak Jøøn 3 Bible Online

Jøøn 3 - anuak bible

Jøøn 3

¹Da dhaanhø mør ma ŋat Paricith mo nyeŋŋe cwøl ni Niködima ma dhaanhø aciel røk dïbwöthe mo jø Juuth.

²Ŋatøgø aö baŋ Jecu ki wäär ni kööe jïre, ni «Dïpööy, ŋäcwa ni ïïna dïpööy mo käla baŋ Jwøk, kiper bäŋ dhaanhø mo doo maara tïïö ki ŋïïce moøgø ni wø tïïyï yøø, ni näk Jwøk tøør buute.»

³'Ba aløk Jecu jïgø, ni kööe, na «Adïëri møn a caana gø jïrï, ni näk mo dhaanhø kär cäŋ nywøllø ni nyään, eni buc Jwøk ba dee maara joot.»

⁴Ni kö Niködima jïre, na «?Aŋø, dhaanhø a dii cäŋ nywøllø nidïï ni eno nø døøŋŋø? ?Eni doo cäŋa døø yi menni nee cäŋ nywøllø?»

⁵'Ba aløk Jecu jïre, na «Adïëri møn, a caana gø jïrï, ni näk mo dhaanhø kär nywølø ki pïï ki Jwïëc Jwøk, eni ba doo maara døny yi buc Jwøk.

⁶Gïn wø nywøl dëëlli beeye dëël, 'ba gïn wø nywøl Jwïëc Jwøki beeye jwïëy.

⁷Kär yiï thäŋŋö kiper na caana gø jïrï, no ‹U doo cäŋa nywøllø nou nyärö.›

⁸Jamø wø kwödö kaawat mana caye, ni ö dhaanhe ni wïny dwør gø, 'ba kun wø käl yie ki kun wø ci yie, kuc dhaanhe. Kaawat manøgø thuwø, jiy bëët mo wø näk mo onywøl Jwïëc Jwøki ge bëëdö na enøgønø.»

⁹'Ba Niködima aköö jïre, «?Manøgøøni a dee maar tägö nidïï?»

¹⁰Ni løgi ya Jecu jïre, ni «?Ï paa dïpööy mar Icriel? ?Gïnögø doo poodø ni kuyï?

¹¹Adïëri møn a caana gø jïrï, wa caana gïn mo ŋäcwa, ni wa køpa mana neenwa. 'Ba u kär jïëy ki luumwa.

¹²?Ni näk jap piny yaa caanø jïïu, ni käru ge jïëö, uuno jïëyu nidïï, noo caana jap maal jïïu?

¹³'Ba bäŋ dhaanhø mo oci maal, 'ba beeye eni na öö ki maal, ni beeye Wär Dhaanhø.

¹⁴'Ba Wär Dhaanhø ŋaaba maal kaawat mana ö Modhe na ŋaap thwöl maal dï paap,

¹⁵kiper nee ŋato wäro jïëy ki eni ni ŋääth gø nee jïte ki kwøw mana näk adïëri mo bäŋ cuŋŋe.

¹⁶«Kiper Jwøk mëër ki jø piny døc, ni beeye na cïp Wääde ma aciel, kiper nee ŋato wäro jïëy ki eni ni ŋääth gø nee kwøe ki kwøw mana näk adïëri mo bäŋ cuŋŋe, nee ba ränynye.

¹⁷Kiper Jwøk Wääde käre jääŋŋö piny nee piny jääle, 'ba beeye kiper nee piny piem ki køøre.

¹⁸'Ba ŋat wø jïëy ki eni ni ŋääth gø, bäŋ ajäla bääte këët. 'Ba ŋat wø ba jïëy ki eni ni ŋääth gø, eno nø jääl kawaane ennø, kiper na käre jïëy ni ŋääth nyeŋ O Jwøk na näk aciel.

¹⁹'Ba gïna käl ajäla bäät jiy beeye en; kiper kanya ö tarri piny, jiy atïmö ni ge mëër ka muudhö ni kaala tar, kiper gïïa tïïcge reyø.

²⁰Kiper jiy bëët mo wø tïïc gïïa reyø, ge män ki tar, ni ge ba ö yi tar, kiper nee gïïa tïïcge nee rege ba nyoothge.

²¹'Ba ŋat wø tïïc gïn ma adïëri wø ööa yi tar, kiper nee joot møn ni gïïa tïïe käla baŋ Jwøk.»

²²'Ba na tïme na køør manøgøøni, Jecu ki bääge gena ci yi ŋööm Judia. Ni bëëde ki bääge kaace ni lööe na nyuudhi.

²³'Ba Jøøn thuwø alöö na nyuudhi yi Eenan buut Caalim, kiper kaace da pïï mo thööth. Ni ö jiyi ni öge nee ge lwøk na nyuudhi yie.

²⁴'Ba Jøøn poot kär twöö kar kaaca.

²⁵'Ba kanyøgø nø, da pïëm ma atägö yïthakic bääk Jøøn ki ŋat Juuth mør, ni ge piema luum lwøk na nyuudhi.

²⁶Ni öge baŋ Jøøn ni köge jïre, ni «Dïpööy, ŋata bëëdö ki ïïni løø Naam Jördan løøga, na gïre køpï, ena kany ni löö na nyuudhi, ni jiy bëët cøøa baŋe.»

²⁷'Ba aløk Jøønni, ni «Bäŋ dhaanhø mo doo jïtö ki gïrpiny, ni näk ba mëëk eni ka maal.

²⁸Uuni ki dëëtu, mara awïnynyu na caana gø, na ‹A paa Krictø, 'ba beeye aani na jääŋŋi nyïme.›

²⁹'Ba ŋat wø nyöömmi beeye na wää dhaagø thiinh. 'Ba lwöm wää nywömmi ni wø cuŋŋi ni wïnynya mare, yie wø mïnnö døc kany wø wïny dwør wää nywömmi. Ni beeye na mïn yia døøc kawaane.

³⁰'Ba eni kare odøøŋŋi, ni tïm kara ni thiinh.

³¹«Eni na öö ki maal, ena wïth jammi bëët. 'Ba eni ni en piny, beeye ŋat piny, ni jap piny beege wø caane. 'Ba eni na ö ki maal, ena wïth jammi bëët.

³²Ni eni wø køpa gïna neene na wïnynye, 'ba bäŋ ŋat mo ojïëy ki gïn wø købe.

³³'Ba ŋat wø jïëy ki luumma caane, mare wø pute ka køp, ni ‹Jwøk beeye na adïëri.›

³⁴'Ba eni na jääŋ Jwøki wø køpa luup Jwøk. Kiper Jwøk Jwïëye bäŋ wø cïbe ni ee rømø.

³⁵'Ba Wuuö mëër ki Wäädö ni cïp jammi bëët cer gø.

³⁶'Ba ŋat wø jïëy ki Wäädö ni ŋääth gø, ree da kwøw mana näk adïëri mo bäŋ cuŋŋe. 'Ba ŋat wø ba leŋ dwør Wäädö, kwøw ba dee joodø, 'ba ajäla mar Jwøk bëëdö bääte.»