Read anuak Jøøn 6 Bible Online

Jøøn 6 - anuak bible

Jøøn 6

¹'Ba køør manøgøøni, Jecu aci løø Puul Galili, ni beeye Puul Taybiria.

²Ni ö lwaaki mo päl ni läp køøre, kiper ŋïïce moa neenge na thööth na tïïe røk jøøa tuu.

³'Ba Jecu aaa bäät thuur ni pï piny kaace ki bääge.

⁴'Ba kanyøgø ajwöm-cam mar cäŋ Cäŋa Pööth Thøøe Yie mar jø Juuth kare ocäännö.

⁵'Ba na ö Jecu na tïŋ wïïe maalø, ni joot lwaak ni ööa baŋe, ena köö jï Pilip, «?Øøno ŋëëwø kaa ki muunni kiper nee cam jøøi ni thööth ii?»

⁶Luummögø caane ni eni päänynya gø, 'ba eni ki dëëre gïno tïïe ŋääe.

⁷Ni løgi ya Pilipi, «Gwel ma dïpe ariiø ba doo rømø ki ŋïëw ki muunni kiper nee ŋati man nø jïte ki mo thiinh.»

⁸'Ba dhaanhø aciel dï bääge, ni beeye Andaru cöök Cayman Piter, aköö jïre,

⁹ni «Da nyilaal kany mo jïre da muunni abïïc ki rec ariiø. ?'Ba agïnaŋø noo kønyge jï jøøi ni thööth ii?»

¹⁰'Ba Jecu aköö, ni «Köömmu jiy nee pïge piny.» 'Ba kaace da luum mo mar yie. Ni ö jøøgøøni ni pïge piny. 'Ba kwäänge bëët jïtö ki kume abïïc.

¹¹Kanyøgøøni Jecu muunni alwøre. 'Ba na nø dwøk met ec jï Jwøk, apääŋŋe jï jøøa no opï piny, këël rec. Ni rømge bëët kaa mana manyge.

¹²'Ba na nø cämge ni jäŋge bëët, eni bääge aluumme, ni kööe, ni «Cooŋŋu moa no odhäthö, nee bäŋe gø mo rwäänyi.»

¹³Køøre acooŋge ni päŋ gupe apaar kurriiø ki thäk muunni moa then then, na dööŋ piny baŋ jøøa cam ge.

¹⁴'Ba na ö jøøgø na neenge ŋïï mana tïïe, gena köö, ni «Ŋati beeye nyikuŋ Jwøk møn, na wäŋŋi ni doo thïïŋö bäät piny.»

¹⁵'Ba Jecu na joot gø ni geni caya man makge eni ki teek nee tïïcge na nyeya, ena cäŋ døø bäät thuur e keere.

¹⁶'Ba na tïme na abøøya ni cäŋ pätha piny, bääge aci Puul Galili,

¹⁷ni cige yi jääy, ni täkge ki man ŋutge løøga yi Kapernaam. 'Ba kanyøgøøni piny oløny ni cøl, ni Jecu poot kär pïï buutge.

¹⁸'Ba naam ajïtö ka athaga mo päl, kiper jamø kwödö ni teek døc.

¹⁹'Ba na kïïge, ni geno nø kän wøk ki kiïlömethërri abïïc wala abïciel, Jecu ajootge ni cäädhö ki bäät pïï yi naam ni ööa kany mo cään ki jääy. Ni putge bwøk.

²⁰'Ba ena köö jïge, ni «Man a aani. Käru lwäyö.»

²¹Kanyøgø yïthge amïnnö ki man kïthge gøøni yi jääy, ni put jääyi pïï lak ageela kuna cige yie.

²²'Ba na tïme na aruunnø man, jøøa no odööŋ løø Puul Galili, ajootge ni beeye jääy aciel keere na kwøŋge neen kanyøce, ni Jecu kär ci yi jäänögøøni ki bääge, 'ba beege bääge keerge na aay.

²³'Ba da jïëthe mo oöö ki yi Taybiria ni öge kany mo cään ki kanya ö Kwäärö na dwøk met ec jï Jwøk ni camge muunni yie.

²⁴Kiper manøgø nø, na ö jøøgø na neenge Jecu ni tøør kaace, ki bääge bëët, geni ki dëëtge gena ci yïth jïëthe ni cige yi Kapernaam kuna cacge Jecu.

²⁵'Ba na jootge eni løøga, gena köö jïre, «?Dïpööy, ïïno ö kany yi wäne?»

²⁶Ni løgi ya Jecu jïge, na «Adïëri møn, a caana gø jïïu, naa ba cayu kaper ŋïïce moa neennu, 'ba a cayu kaper muunni moa cammu ni jäŋŋu.

²⁷Kär røgu ööllu kiper cam man wø ränynyi, 'ba tïïu kiper cam mano bëëdö, ni beeye mano këët ri kwøw mana näk adïëri mo bäŋ cuŋŋe, mano cïp Wär Dhaanhe jïïu. Kiper beeye eni na ö Jwøki na näk Wuuö na jïëe ki eni ni kïth ŋïï mare dëër gø.»

²⁸Kanyøgø gena köö jïre, na «?Agïnaŋø na dewa tïïö, nee tïme ni wa tïïö ki tïï Jwøk?»

²⁹Ni løgi ya Jecu jïge, «Ki man jïëyu ki eni na jääŋ Jwøki ni ŋääthu gøøni beeye eni na tïï Jwøk.»

³⁰Køøre gena köö jïre, na «?A ŋïï mana ŋø nø noo tïïyï kiper nee neenwa nee wa jïëcwa ki ïïni ni ŋääthwa? ?Ïïni, agïnaŋø noo tïïyï?

³¹Kwäcwa acämö ki meena [6] dï paap kaawat mana gööri, ni ‹Gena mooe ki møø mo ööi ki maal nee camge.› »

³²'Ba Jecu aköö jïge, na «Adïëri møn, a caana gø jïïu, ni paa Modhe na mooc uuni ki møø mana öö ki maal, 'ba beeye Wära wø cïp møø mana näk adïëri jïïu ni wø ööi ki maal.

³³Kiper møø mar Jwøk beeye na öö ki maal ni ö piny, ni cïpe ki kwøw jï jø piny.»

³⁴Ni köge jïre, ni «Kwäärö, cïp møgøgø jïwa cooth.»

³⁵'Ba Jecu aköö jïge, ni «Beeye aani na møk kwøw. 'Ba ŋat wø ö baŋa doo bäŋ käc ree, ni ŋat wø jïëy ni ŋääth aani doo bäŋ riew ree na bäre bäre.

³⁶'Ba a caana gø jïïu, ni aana nø neennu, 'ba u kär jïëy.

³⁷'Ba jiy mo wø cïp Wära jïra bëët ööa baŋa. 'Ba ŋat wø ö baŋa, ba riemma.

³⁸A kär öö ki maal ni ööa piny naa tïïa mana manynya ki wïïa keera, 'ba beeye mana many Ŋata jääŋ aani ni wø tïïa.

³⁹Ni mana many Ŋata jääŋ aani beeye en, ni bäŋe ŋat mo rwäänya ri jøøa cïbe jïra bëët, 'ba beeye ki man tïŋa ge maal yi cäŋo cuŋ pinynyi yie.

⁴⁰'Ba mana many Wära beeye en, ni ŋato wäro ŋec Wäädö ni jïëe ki eni ni ŋääth gø, jïtö ki kwøw mana näk adïëri mo bäŋ cuŋŋe. 'Ba aani, ŋatøgø otïŋa maal yi cäŋo cuŋ pinynyi yie.»

⁴¹Kanyøgø jø Juuth, gena ŋurö ki nyeŋŋe kiper na kööe, ni «Aana møø mana öö ki maal na ö piny.»

⁴²'Ba gena köö, na «?Aŋø, ŋati en paa Jecu o Jocep na wänni ki menni ŋääø? ?Aperŋø ni caan gïnögø kawaane, ni ‹Aana öö ki maal ni ööa piny›?»

⁴³Ni løgi ya Jecu jïge, «Käru muuŋö yïthakiyu keeru.

⁴⁴Bäŋ dhaanhø mo doo maara ö baŋa ni näk ba nyïï Wära na jääŋ aani. 'Ba eni otïŋa maal yi cäŋo cuŋ pinynyi yie.

⁴⁵'Ba ogöörö yïth luup nyïïkuk Jwøk, ni ‹Geno pwöny Jwøki bëët.› 'Ba jiy bëët mo wø wïny dwør Wuuö ni kwanyge tier gø, ge ööa baŋa.

⁴⁶Bäŋ dhaanhø mo Wuuö ee neenø, 'ba beeye eni na käl baŋ Jwøk keere, na neen Wuuö.

⁴⁷Adïëri møn a caana gø jïïu, ni ŋat wø jïëy ni ŋäädhe, ree da kwøw mana näk adïëri mo bäŋ cuŋŋe.

⁴⁸Beeye aani na møk kwøw.

⁴⁹Kwäyu acämö ki meena dï paap. 'Ba gena thøw.

⁵⁰'Ba man en beeye møga öö ki maal ni ö piny, nee dhaanhø cäme ree, nee ba thøøe.

⁵¹'Ba beeye aani na møk kwøw mana öö ki maal na ö piny. Noo dee ŋat mo cam møgøgøøni, eni okwøw na bäre bäre. 'Ba møgo cïba kiper nee jø piny kwøwge, beeye dëëra.»

⁵²'Ba kanyøgø jø Juuth gena jïtö ki pïëm yïthakicge keerge, ni köge, ni «?Ŋati dëëre a dee gø cïbö jïïø nidïï nee camø?»

⁵³Kiper manøgønø, Jecu aköö jïge, na «Adïëri møn a caana gø jïïu, ni näk dëër Wär Dhaanhø ba cammu, ni maathu remme, bäŋ kwøw dëëtu.

⁵⁴Ŋat wø cam dëëra ni maath remma, ree da kwøw mana näk adïëri mo bäŋ cuŋŋe, ni eno tïŋa maal yi cäŋo cuŋ pinynyi yie.

⁵⁵Kiper dëëra beeye cam møn, ni remma beeye maath møn.

⁵⁶'Ba ŋat wø cam dëëra ni maath remma beeye wø bëëdö dëëra, ni bëëda ree.

⁵⁷Wuuö ni wø bëëdö ni kwøw beeye na jääŋ aani, ni kwøa en kiper Wuuö. Kaawat manøgø, ŋat wø cam aani, okwøw ki køøra.

⁵⁸'Ba møø manøgø beeye møga öö ki maal na ö piny, ni paa møga cam kwäyu ni thøwge. 'Ba ŋat wø cam møgøgøøni, okwøw na bäre bäre.»

⁵⁹Luummögø beeye mana caane yi øt acooŋ lam kanya pööe yi Kapernaam.

⁶⁰'Ba bääk Jecu mo thööth na wïnyge luummögø, gena köö, ni «Man a luubö mo teek. ?Aŋa noo lønye jïre ki man jïëc gøøni?»

⁶¹'Ba Jecu na ŋäc gø ki dëëre ni bääge moøgø muuŋö kiper luummögøøni, ena köö jïge, na «?Aŋø, cwïnynyu ränynyö kiper luubö man?

⁶²?A dee tïmö nidïï nø ni näk mo Wär Dhaanhø neennu neenø ni cøøa maal kuna kwøŋ öö ki yie dïkwøŋ?

⁶³Beeye Jwïëc Jwøk ni wø cïpi ki kwøw; 'ba teek mar dhaanhø bäŋ gïn tïïe. 'Ba luupa caana jïïu kännö ki kwøw ki ri Jwïëc Jwøk.

⁶⁴'Ba da jiy møøk dëëtu mo ba jïëy ni ŋääthge.» Kiper dëët jøøa kär jïëy, ŋäc Jecu cøøn, ki ŋato cïp eni ceŋ nyïïmän.

⁶⁵Ni ö eni ni kööe, ni «Beeye tiere na caana gø jïïu, ni doo bäŋ ŋat mo doo maara ö baŋa, ni näk ba wëëga Wuue öö.»

⁶⁶Køør manøgøøni bääge mo thööth adøø cään ni tïmge ni ge ba cäädhi ki eni këët.

⁶⁷'Ba Jecu aköö jï jøøa näk apaar kurriiø, «?A uuni, u aay thuwø?»

⁶⁸Ni løgi ya Cayman Piterri jïre, «?Wui Kwäärö, waano ciwa baŋ ŋa? Luum kwøw mana näk adïëri na näk bäŋ cuŋŋe ena baŋï.

⁶⁹Ni ewa ŋäädhö ni jootwa gøøni, ni beeye ïïni na en kur keerï na näk mar Jwøk.»

⁷⁰Ni løgi ya Jecu jïge, na «?Aŋø, paa aani na jier uuni ni uuna apaar kurriiø, ni ö acielli røgu ni jït ree ka anägö?»

⁷¹'Ba eni cäänö kaper Juudac o Cayman Ickarïët, kiper beeye eni noo cïp Jecu ceŋ nyïïmän, ni ena bääŋ aciel røk jøøa näk apaar kurriiø.