Read anuak Jøøn 8 Bible Online

Jøøn 8 - anuak bible

Jøøn 8

²'Ba na tïme na amöölla cøøn, ena cäŋ duu Øt Jwøk Mana Dwøŋ. Ni ö jiyi bëët baŋe, ni pï piny ni pwöny geni.

³'Ba dïpööye mo ciik Jwøk ki jø Paricith, gena kännö ki dhaagø mo omaa ki luk. 'Ba na cïpge gø dïër,

⁴gena köö jï Jecu, «Dïpööy, dhaaŋŋi en omaa ki luk.

⁵Ki ri ciik Jwøk acaan Modhe jïwa, ni teeŋ dhaagø ma enøgø nø wär këëri ki kïte. ?A ïïni nø, agïnaŋø noo caanï kipere?»

⁶Manøgø acaange ni ge päänynya gø nee ge jïtge ki jöö mo kïthge bääte ki luubö. 'Ba Jecu agääŋ ni gööde piny ki lweete.

⁷'Ba kiper mana pootge ni ge pëënynya gøøni, eni ree athïïŋe ni kööe jïge, ni «Ŋato dëëre bäŋ raay dïïu wär kwøŋ lwötö ki kïdi ni thöör gøøni.»

⁸Ni cäŋ gääŋŋö piny, ni gööde ki lweete.

⁹'Ba na wïnyge luummögø, gena aay no oceele ceele, ni tägi ka jøøa døøŋŋø. Ni ö Jecu ni dööŋe keere ki dhaaŋŋøgø na cuŋŋö nyïme.

¹⁰'Ba Jecu na thïïŋ ree aköö jïre, «?Nyijøøe, age geni? ?Bäŋ dhaanhø mo ojääl ïïni?»

¹¹Ni kö dhaaŋŋøgøøni, ni «Bäŋgø, Kwäärö.» Ni kö Jecu, «Aani thuwø, ï ba jääla. Ciï nø, ni ba bääyï këët.»][7]

¹²Ni ö Jecu ni cäŋ cäännö ki geni ni kööe, ni «Aana tac piny. Ŋat wø cäädhi køøra, ba cäädhi yi muudhö këët, 'ba beeye tac kwøw noo joode.»

¹³'Ba kanyøgøøni, jø Paricith aköö jïre, «Ïïni, ï køpa gïrï keerï. 'Ba luummögø ni caanï enø patha adïëri.»

¹⁴Ni løgi ya Jecu, «Këël doo naa a køpa gïra keera, luumma caana beeye adïëri. Kiper aani, kuna käla yie ki kuno cøøa yie ŋääa. 'Ba uuni kuna käla yie ki kuno cøøa yie kuyu.

¹⁵Uuni, luup ŋølu piny ka køør acaac dhaanhø, 'ba aani bäŋ dhaanhø mo luumme ŋøla piny.

¹⁶'Ba këël ni näk maa ŋuta piny ki luup, ŋut piny mara beeye adïëri. Kiper paa a keera ni wø ŋøl luup piny, 'ba beeye aani ki Ŋata jääŋ aani.

¹⁷Ki ri ciik Jwøk maru ogöörö, ni ‹Gïn wø caan jiyi ariiø, beeye adïëri.›

¹⁸Aani, a caana mara, ni Wära na jääŋ aani wø køpa gïra.»

¹⁹'Ba kanyøgø, gena köö jïre, «?Aŋø, wäru, age eni?» Ni løgi ya Jecu, «Uuni, a kuyu, ni kuyu Wära thuwø. Onää a ŋäyu, Wära dou ŋääö thuwø.»

²⁰Luupögøøni caane buut kar gïn wø cïp muuce yie, kanya pööe yi kal mar Øt Jwøk Mana Dwøŋ. 'Ba bäŋ dhaanhø aciel mo omak gø, kiper na poot caa mare ni poot kär öö.

²¹Ni cäŋ Jecu köö jïge, ni «Aano aay, ni cayu aani, 'ba uuno thøw yïth raay mou. Ni kuno cøøa yie, u ba dou maara ö yie.»

²²Køøre jø Juuth aköö, «?Aŋø, ree nääe nääö, na caan gïnögø, ni ‹Kuno cøøa yie, u ba doo maara ö yie›?»

²³'Ba ena köö jïge, «Uuni, u käla piny, 'ba aani, a käla maalø. Uuna jø pinyi en, 'ba aani, a paa ŋat pinyi.

²⁴Anø caana jïïu, ni ‹Uuno thøø yïth raay mou.› Kiper ni näk mou ba jïëy ni beeye aani na eni, u thøøa yïth raay mou.»

²⁵'Ba gena köö jïre, «?Ïïna ŋa cøøn?» Ni kö Jecu jïge, ni «Mana kwøŋa caan jïïu wïlöölö beeye ni pooda ree en.

²⁶Aani jïra da luup mo thööth mo caana caanø kiperu, ki mo thööth mo ŋøla piny. 'Ba eni na jääŋ aani beeye adïëri, ni luup moa wïnynya baŋe beeye ni wø caana jï jø piny.»

²⁷'Ba geni tier gø kucge, ki man näk mo eni cäänö kaper Wuuö.

²⁸Kanyøgø Jecu aköö, ni «Noo ŋaabu Wär Dhaanhø maal, oŋäyu nø ni beeye aani na eni, ni bäŋ gïn mo tïïa ki wïïa keera, 'ba a wø cäänö keda mana ö Wuue na pwöny aani.

²⁹'Ba eni na jääŋ aani, ena buuta. Naa käre wiiø a keera, kiper a wø tïïya gïï wø mïn yie ki ge cooth.»

³⁰'Ba na cääne na enønø, jiy mo thööth ajïëy ki eni ni ŋääthge gø.

³¹Kanyøgø nø Jecu aköö jï jø Juuth moa näk ojïëy ki eni ni ŋääthge gø, ni «Ni näk mo pwöc 'moa wø kïthu bäät tïïc cooth, uuna bääga møn.

³²Ni dou adïëri ŋääö ni ö adïëri ni pät uuni.»

³³Ni løkge gøøni jïre, ni «Waana nyïïkwaac Eeberam, ni wa kär kwøŋ tïmö ni waana laaŋe jï jø møøk. ?Aŋø ni kööï, ni wa doo pädö?»

³⁴Ni løgi ya Jecu jïge, na «Adïëri møn, a caana gø jïïu, ni jiy bëët mo wø tïïc gïïa reyø, gena laaŋe mo raay.

³⁵'Ba laŋŋø ba doo bëëdö paana maai yie ki tøŋ na bäre bäre, 'ba wäädö beeye ni wø bëëdö poge na bäre bäre.

³⁶Kiper manøgøøni, ni näk uuno pät Wäädö, uuno pädö møn.

³⁷Ŋääa ni uuna nyïïkwaac Eeberam, 'ba u poot caya man 'nägu aani, kiper luumma käru maa ki cwïnynyu.

³⁸Aani, a caana moa jooda baŋ Wära, ba uuni, u tïïya moa wïnynyu baŋ wääu.»

³⁹Ni løkge gø jï Jecu, ni «Eeberam beeye na wääwa.» Ni kö Jecu jïge, «Onää uuna nyïï Eeberam, u doo tïïya gïïa tïïc Eeberammi.

⁴⁰'Ba kawaane u caya man 'nägu aani, ni aana ŋat maa caana adïëri jïïu mana wïnynya baŋ Jwøk. Manøgøøni patha mana tïïc Eeberammi.

⁴¹'Ba u bëëdö nou tïïya mana tïïc wääu.» Ni köge jïre, ni «Wa kär nywølø ni waana wäät kääpe. Jïwa da wääwa aciel, na näk beeye Jwøk.»

⁴²Ni kö Jecu jïge, «Onää Jwøk beeye Wääu, u doo mëër ki aani, kiper Jwøk beeye na käla baŋe. A kär öö ki wïïa a keera, 'ba beeye eni na jääŋ aani.

⁴³?Aŋø ni ba wïnynyu luup mo wø caana jïïu en? Tiere beeye ni ïthu you dhïïŋö ki luumma.

⁴⁴U käla ri wääu na näk anägö, nou manynya man tïïyu man wø many wääu. Eni, ena dïnääy këël ki kanya täge yie, ni bäŋ gïn manynye ra adïëri, kiper na bäŋe adïëri cwïnye. 'Ba kany wø caan tööt, eni caana gïr bëëtö mare, kiper na näk ena dïtwöt, ni beeye wää tööti.

⁴⁵'Ba aani, kiper na caana adïëri, u bäŋ wø jïëy ki aani.

⁴⁶?Aŋa dïïu na joot aani ni aano bääyö? ?'Ba ni näk a caana adïëri, aŋø ni ba jïëyu ki aani?

⁴⁷'Ba ŋat wø näk dhaanh Jwøk, wø wïnynya luup Jwøk. 'Ba kiper na ba nägu mo Jwøk, beeye ni ba wïnynyu luupe.»

⁴⁸'Ba aløk jø Juuthi jï Jecu, na «?Aŋø, marwa paa adïëri møn, na caanwa gøøni ni ïïna nyï Cameria, ni riï da anägö?»

⁴⁹Ni løgi ya Jecu, «Raa bäŋ anägö. 'Ba aani, a wøøra Wära, ni ö uuni ni ba wøørru aani.

⁵⁰'Ba aani, a ba cac man ö jiyi ni pwøcge aani. 'Ba beeye Jwøk ni wø cac man pwøc aani, eni ni wø ŋøl luup.

⁵¹Adïëri møn, a caana gø jïïu, noo dee ŋat mo gwøk luumma, eni thøø ba dee belø.»

⁵²'Ba jø Juuth aköö jïre, ni «Kawaane, aŋäcwa møn ni riï da anägö. Eeberam athøw, kaawat mana thøw nyïïkuk Jwøki. ?Ï doo köö, ni ‹Noo dee ŋat mo gwøk luumma, eni thøø ba dee belø›?

⁵³?Aŋø, dwøŋŋa ïïni ki kwarwa ma Eeberam na thøw? Këël nyïïkuk Jwøk athøw. ?Ïïni, riï otïïyï gø na ŋa cøøn?»

⁵⁴Ni løgi ya Jecu, ni «Ni näk maa pwøya dëëra, pwøc mara ba doo thura kare. 'Ba beeye Wära ni wø pwøc aani, ŋat wø gïre caannu ni beeye Jwøk maru.

⁵⁵'Ba eni kuyu. 'Ba aani, eni ŋääa. Onää yaa caanø, ni eni kuua, a doo tïmö ni aana twöt kaawat maru. 'Ba aani eni ŋääa, ni luumme yaa gwøø.

⁵⁶'Ba kwaru ma Eeberam yie amïnnö na wëëgi man neen nïra. Ni neen gø, ni mïn yie.»

⁵⁷Yi kar kanyøgøøni jø Juuth aköö jïre, «Ïïni, cwiiyï poot kär tïmö na pïërabïïyu. ?Aŋø, Eeberam iï neenø wäne?»

⁵⁸Ni løgi ya Jecu jïge, na «Adïëri møn a caana gø jïïu, kanya poot Eeberammi ni poot kär nywølø, a nutö.»

⁵⁹Kanyøgø gena kwänynyö ki kïte nee eni këërge ki ge, 'ba Jecu ree akane ki geni, ni aa wøk ki yi Øt Jwøk Mana Dwøŋ.