Read anuak Moa Tïïc Nyïïatwieli 10 Bible Online

Moa Tïïc Nyïïatwieli 10 - anuak bible

Moa Tïïc Nyïïatwieli 10

¹'Ba yi Cecaria da ŋat mo nyeŋŋe Körnilia. Ni ena wïth dïkuye ma dïpa, lwaa wø cwøl ni lwaa Itali.

²Ena dhaanhø mo cwïnye ena køør Jwøk ni wø wøøra gø ki jø paare bëët, ni eni wø muuö ki jap cane jï jiy, ni eni wø bëëdö ni lama Jwøk cooth.

³'Ba dïcäŋ aciel kar caae adäk[6] ka abøøya, nyïïatwiel maal mør mar Jwøk ajoode døøc ni ööa baŋe ni kööe jïre, ni «Körnilia.»

⁴Ni raŋ jïgø ni cwïnye obwøk. Ni kööe, na «?Agïnaŋø, Kwäärö?» Ni kö nyïïatwielli jïre, ni «Lam marï ki muuce moï apïï maal na ŋïï nyïm Jwøk.

⁵'Ba kawaane, jääk Jøpa ki jiy, ni kälï Cayman ni wø cwøl ni Piter.

⁶'Ba eni bëëdö ka Cayman mør ma dïnyuŋ pëëne, mo paare ena bäät naama dwøŋ.»

⁷'Ba na nø aac nyïïatwiel maalli mana cäänö ki eni, eni jiy ariiø røk jø tïïc moe acwøle, ki dïkuri aciel mo cwïnye ena køør Jwøk dëët jø wø tïny gø.

⁸'Ba na nø caan jammi bëët jïge, gena jääŋŋe Jøpa.

⁹'Ba na tïme na aruunnø man, ni ge poot cäädhö ni karge oløny ni cään ki paanøca, Piter aeth maal wï øtø kuna läme, ki kar caae apaar kurriiø ki dïcäŋ.[7]

¹⁰Ni jït ree ki käc ni manynya gïn mo came. 'Ba kanya poode ni ge poot jiiŋŋa cam, nyeŋŋe animääw,

¹¹ni neen maal ni ree ee jabø, ni gïn mør mo caala aleeŋŋa mo dwøŋ ööa piny, ni lwär piny no omaa ki dhøge ŋweeni.

¹²'Ba yie da teeŋ lääy mo thööth, ki thwöre ki weny.

¹³Ni ö dwølli baŋe, ni kööe, ni «Piter, ö maal ni 'nägï ni cämï.»

¹⁴'Ba Piter aköö, ni «Jïra bäär, Kwäärö, kiper a poot kär cämö ki gïn mør jaak bäre bäre, wala gïn mo ba waany.»

¹⁵'Ba dwøl manøgø acäŋ ö baŋe ri rietge, ni kööe, ni «Gïn mo odøøc Jwøki mo waany, kär cwølï ni gïn mør jaak.»

¹⁶Gïnögø atägö kwöre adäk, ni puti dwøk maal.

¹⁷'Ba kanya poot Piterri ni yie othäŋŋö kiper gïna joode ki man näk tiere ŋø, jøøa jääŋ Körnilia oløny ni ge cuŋŋö dhi kal, ni geno nø pëëö, ni «?Po Cayman age?»

¹⁸Ni cwötge ni ge pëëö ki man näk Cayman ni wø cwøl ni Piter bëëdö kanyøce.

¹⁹'Ba kanya poot Piterri ni caara wïïe ki lääk, Jwïëc Jwøk aköö jïre, ni «Neenï, jiy adäk caya ïïni.

²⁰Ö maal ni ciï piny ni aayï ki geni ni bäŋ gïn lääŋŋï, kiper ge jääŋŋa aani.»

²¹Ni ö Piterri ni ci piny baŋ jøøgø ni kööe, ni «Aani en, na cayu. ?Agïnaŋø na ööu kipere?»

²²Ni köge, ni «Waani, wa jääŋŋa Körnilia ma wïth lwaa dïkuye ma dïpa, mo ena dhaanhø mo beer ni lwäär ki Jwøk, ni eni wø pwøc jø Juuthi pwøø bëët. Eni, ena nyuunh nyïïatwiel maalli mør na en kur keere na mar Jwøk kiper nee jääk baŋï niï ööï paare, kiper nee luupo caanï wïnynye.»

²³Kanyøgø gena put cwöl yi øtø na wëëlle moe. 'Ba na tïme na aruunnø man, ena tïŋŋö ni aae ki geni, ni ö nyïïmëëe møøk mo jø Jøpa ni lööpge ki eni.

²⁴'Ba na tïme na aruunnø maya, gena pïï Cecaria. 'Ba Körnilia lääŋŋa geni, ni tuuŋge bëët ki nyïïawääte ee nø cwøl.

²⁵'Ba na døny Piterri, Körnilia aput ci baŋe, ni päth tiet gø ni wøør gø.

²⁶'Ba ena tïŋ Piterri maal ni kööe, ni «Ö maal, aani, aana dhaanhø thuwø.»

²⁷'Ba kanya cääne ki gø, ena ci yi øtø ni joot jiy mo thööth mo dëëtge ege cooŋø.

²⁸Ni kööe ki geni, ni «Uuni ki dëëtu, ŋäyu ni ba beer ki køør ciik mowa ki man o ŋat Juuth ni cuuŋe ki juurre møøk wala ki man lïïmme baŋge. 'Ba anyooth Jwøki jïra ni kär dee dhaanhø mo cwøla ni dhaanhø jaak wala ba waany.

²⁹Kiper manøgønø, na öönnï baŋa, aana öö ni bäŋ gïn mo yaa pëënynyö. 'Ba beeye ni pëëa ennø, na ?Aperŋø na öönnï baŋa?»

³⁰Ni kö Körnilia, ni «Ki køør nïne aŋween moa pöödhö, teeŋ ka kar caanni ennø, naa lämö yi øda kar caae adäk ka abøøya, dhaanhø mør ajooda ni cuŋŋö nyïma ni dëëre da abïï mo tar,

³¹ni kööe, ‹Körnilia, lam marï awïnyö ni ö muuce moï ni ŋäyi ya Jwøki.

³²Kiper manøgønø, jääk Jøpa ni pëënynyï Cayman ni wø cwøl ni Piter. Eni bëëdö øt Cayman mør ma dïnyuŋ pëëne mo paare ena bäät naama dwøŋ.›

³³Ni beeye na puta öön baŋï en, ni put tïmö ni beer ni ööï ennø. Ni beeye ni enwa kany en bëët nyïm Jwøk, nee luupa køp Wuuö jïrï bëët nee wïnywa.»

³⁴Kanyøgø Piter dhee atuue ni kööe, na «Adïëri møn, ajooda ni Jwøk luumme aciel keere kiper jiy bëët.

³⁵'Ba ki yïth mïëri bëët ni näk da ŋat mo wøøra gø ni wø tïïya gïno beer, wø jïëc Jwøki jïëö.

³⁶'Ba luumma jääŋ Jwøki baŋ jø Icriel ŋäyu, ni køpa luumma nyään na met mar bëët-mëër ki køør Jecu Krictø, ŋata näk Kwääc jiy bëët,

³⁷luumma køp yi Judia bäre, ni täga yi Galili køør lwøk na nyuudhi mana køp Jøønni,

³⁸ki mana ö Jwøki na jør Jecu nyï Nadhareth ki Jwïëc Jwøk na en kur keere, ni mooc gø ki teek, ki kanya cäädhe ni tïïya gïï mo beyø, ni køny jøøa näk oraany anägö bëët. Kiper Jwøk ena buute.

³⁹Ni waana lïŋŋe mo japa tïïe bëët yïth mïëc jø Juuth ki yi Jerucalem. 'Ba ena ŋaapge bäät jaadha no odëëdö ni 'näkge gø.

⁴⁰'Ba atïŋ Jwøki maal ri dää nïne ni wëëk gø joot.

⁴¹'Ba paa jï jiy bëët, 'ba beeye waani na näk ojier Jwøki na lïŋŋe, wa na cämö ni mäthwa ki eni køør duunne wøk ki yi thøø.

⁴²Ni kööm waani ki man køpwa luummi jï jiy, ni caanwa gø ni beeye eni na jier Jwøki na ŋato ŋøl luup piny mo jøøa kwøw ki mo jøøa näk othøw.

⁴³Ni beeye eni na gïre caan nyïïkuk Jwøki bëët, ni jiy bëët moo jïëy ki eni ni ŋääthge gø, raacge owec ki køør nyeŋŋe.»

⁴⁴'Ba kanya poot Piterri ni caana luupögø, Jwïëc Jwøk na en kur keere aö bäät jøøa wïny luubö bëët.

⁴⁵Ni ö jøøa näk ojïëy dï jøøa näk odaŋø na öö ki Piter na aciel, ni thäŋ yïthge kiper na wëëk Jwïëc Jwøk na en kur keere juurre thuwø.

⁴⁶Kiper marge awïnyge ni ge cäänö ki dhøgi møøk ni ge pwøya Jwøk. Kanyøgø Piter acäänö ki ge, ni kööe,

⁴⁷ni «?Da ŋat mo maar pïï mänö ki man lwøk jøøi na nyuudhi? Geni Jwïëc Jwøk na en kur keere onø wëëk geni kaamarø!»

⁴⁸Ni cïpe ki dwøl ni ge lwøk na nyuudhi ki nyeŋ Jecu Krictø. Køøre Piter akwacge ki man bëëde ki geni ki nïne møøk.