Read anuak Moa Tïïc Nyïïatwieli 11 Bible Online

Moa Tïïc Nyïïatwieli 11 - anuak bible

Moa Tïïc Nyïïatwieli 11

¹'Ba kanyøgø awïny nyïïatwieli ki nyïïmëëe moa en Judia, ni juurre luum Jwøk ege jïëö thuwø.

²'Ba køøre na døø Piterri Jerucalem ena jääl jøøa näk odaŋø.

³Ni köge, na «?Aŋø na ciï baŋ jøøa näk kär daŋø ni cämï ki geni?»

⁴'Ba Piter atägö ki man caan tier gø jïge, ni kööe,

⁵ni «Kanya ena pääny Jøpa naa lämö, nyeŋŋa animääw ni neena gïn mo caala aleeŋŋa mo ööi ki maal, ni lwara piny no omaa ki dhøge ŋweeni, ni ö baŋa.

⁶'Ba na neena gø døøc ki buute, a joota lääy ki cwëënyi, ki thwöre, ki weny.

⁷Ni wïnynya dwøl ni cäänna aani, ni ‹Piter, ö maal, ni 'nägï ni cämï.›

⁸'Ba aana köö, ni ‹Jïra bäär, Kwäärö, kiper poot bäŋ gïn mør jaak wala gïn mo ba waany mo onø ci dhaa.›

⁹'Ba acäŋ dwølli manøgø duuö jïra ki maal, ni ‹Gïn mo onø døøc Jwøki mo waany, kär cwølï ni gïn mør jaak.›

¹⁰Gïnögø atägö kwöre adäk, ni cäŋ gïïögø tuut maal bëët.

¹¹'Ba kanyøgø kiree, jiy adäk aput pïï dhi øtø mana bëëtwa yie, ni öör baŋa ki Cecaria.

¹²Ni caani ya Jwïëc Jwøki jïra, ni cøøa ki geni ni bäŋ gïn lääŋŋa. Ni ö nyïïmëëe moi na abïciel ii ni lööpge ki aani thuwø, ni ciwa ni dønywa yi øt nyenøca.

¹³Ni ö eni ni caan luum nyïïatwiel maal jïwa mana joode ni cuŋŋö yi øde, na köö jïre, ni ‹Jääk Jøpa ni kälï Cayman ni wø cwøl ni Piter.

¹⁴Eni luubö mo nyään mano piem ïïni ki køøre ki jø paarï bëët okøbe jïrï.›

¹⁵'Ba kanya täga ki cäänö, Jwïëc Jwøk na en kur keere aö bäätge, kaawat mana kwøŋ ö bäätø.

¹⁶Ni puta wïïa par ki luum Kwäärö na caane, ni ‹Jøøn löö ka pïï na nyuudhi, 'ba uuno lwøk ki Jwïëc Jwøk na en kur keere.›

¹⁷?'Ba na nø cïpi ya Jwøki jïge kaawat mana mooc øøni kanya jïëø Kwäärö ma Jecu Krictø, aana ŋa nø na doo män mo Jwøk?»

¹⁸'Ba na wïnyge luummögø, gena lïŋö ni jiemge Jwøk, ni köge, ni «Këël juurre thuwø awëëk Jwøki løk cwïny nee kwøw jootge.»

¹⁹'Ba kanyøgø jøøa keethø kiper gïïa leth na tägö køør kanya 'näk Ectipen, gena aay gøøc mana pïïcge Pönicia, ki Caypara, ki Antïëk, ni luum Jwøk køpge købø jï jø Juuth keerge.

²⁰'Ba da jø møøk dïge ma jø Caypara ki Cayriin mo öö yi Antïëk ni ge cäänna jø Gïrïïk thuwø, ni ge køpa gïr Kwäärö ma Jecu jïge.

²¹'Ba cer Wuuö ena bäätge. Ni ö jiyi mo thööth ni jïëcge ni løøge rege baŋ Wuuö.

²²'Ba gïr gïna tägö awïny acooŋ Jwøki mana en Jerucalem. Ni jääŋge Barnaba Antïëk.

²³'Ba na pïïe ni neen gïna tägö ki køør met yi Jwøk, yie amïnnö. Ni pwöny geni bëët døøc ki man bëëtge ni cwïnyge ena køør Wuuö, ni cwïnyge ege maa ni teek.

²⁴'Ba eni, ena dhaanhø mo beer, mo cwïnye päŋ ki Jwïëc Jwøk na en kur keere ki ŋäädhe. Ni ö lwaaki mo päl ni løøge rege baŋ Wuuö.

²⁵Kanyøgø Barnaba aci Tarca kuna cac Cøøl.

²⁶'Ba na joot gø, ena käl Antïëk. Ni cuŋge ka acooŋ Jwøk ki cwiir bäre ni pwönyge jiy mo thööth. 'Ba yi Antïëk beeye kanya kwøŋ bääŋi cak yie ni jø Krictø.

²⁷'Ba ki yïth nïrögø da nyïïkuk Jwøk mo oöö ki yi Jerucalem ni öge Antïëk.

²⁸'Ba dhaanhø aciel dïge mo cwøl ni Agaba aö maal ni køp gïna nyooth Jwïëc Jwøki jïre, ni piny bäre jïtö ki meel. 'Ba gïnögø täga ri nïr nyeya ma Kalødia.

²⁹Ni ö bääŋi ni jïëcge ki man jääŋge jap køny jï nyïïmëëe moa en Judia, ni ŋati man nø cïpö kaawat mano en cere.

³⁰Ni putge gø tïïc, ni jääŋge gø baŋ jaak acooŋ Jwøk, ni käära Barnaba ki Cøøl.