Read anuak Moa Tïïc Nyïïatwieli 13 Bible Online

Moa Tïïc Nyïïatwieli 13 - anuak bible

Moa Tïïc Nyïïatwieli 13

¹'Ba kanyøgø ya acooŋ Jwøk mana en Antïëk da nyïïkuk Jwøk ki dïpööye, ni beege Barnaba ki Cimien ni wø cwøl ni Najer, ki Lucia ŋat ma nyï Cayriin, ki Manien na piith po kwäärö ma Eerat, ki Cøøl.

²Kanya wøørge Wuuö ni ge lämö ki lam-wödö, Jwïëc Jwøk na en kur keere aköö, ni «Cïbu Barnaba ki Cøøl kur keerge jïra, kiper tïïc mana cöölla geni gø.»

³'Ba køøre na nø lämge ki lam-wödö, ceŋge acïpge bäätge, ni jääŋge ge wøk.

⁴'Ba kiper mana tïme ni ge jääŋŋa Jwïëc Jwøki na en kur keere, gena aa Celucia, ni lunyge ci Caypara ki jää naam.

⁵'Ba na pïïcge Calami, luum Jwøk akøpge yïth uut acook lam mo jø Juuth. Ni Jøøn ena buutge ni kønya ge.

⁶'Ba na nø caathge dï acuullögø bäre ni pööthge Peepa, gena røømmø ki nyen mør ma ajwøa, ma nyï Juuth ma nyikuŋ Jwøk mo patha adïëri, mo nyeŋŋe Bar-Jecu.

⁷Ni eni bëëdö ka kwäärö mo cwøl ni Cerjia Pøøla, nyen mo wïïe leer. 'Ba kwäärö manøgø Barnaba ki Cøøl acwøle ni manynya man wïny luum Jwøk.

⁸'Ba ajwønnøgø, na näk nyeŋŋe beeye Elima ki dhi Gïrïïk, luum Cøøl ki Barnaba akwiere, ni manynya man maaŋ wï kwäärö nee ba jïëe.

⁹'Ba Cøøl, ni wø cwøl ni Pøøl thuwø, na cwïnye päŋ ki Jwïëc Jwøk na en kur keere, jï ajwønnøgø aneene døøc,

¹⁰ni kööe jïgø, ni «Ïïni, ïïna wär anägö, niï män ki moa beyø bëët, ni cwïnyï päŋ ki cwøk, ni ïïna ŋat dïwït. ?Aŋø, gïnögø ba weyï bäre bäre ki man bëëdï niï tïïya uutjïëth Wuuö moa tiir no oköömmö?

¹¹'Ba kawaane, neenï, cer Wuuö ena bäätï, 'ba ïïno tïmö ni ïïna cwør ni cäŋ ba neenï ki nïne møøk.» Kanyøgø rwöc ki muudhö aput ö bääte, ni aae ni thäämmö ni cää ki jiy mo mak cere nee pieyi.

¹²Kanyøgø kwäärö ajïëy ni ŋäädhe kanya neen gïna tägö. Kiper yie arëëm ki pwöc Wuuö.

¹³Kanyøgø Pøøl ki jøøa cäädhö ki eni, gena tïŋŋö ki jää naam ni ge aaya Peepa, ni pïïcge Perga yi Pampilia. 'Ba Jøøn jøøgø awiie ni døø yi Jerucalem.

¹⁴'Ba gena pöödhö ki Perga ni cige Antïëk yi Picidia. 'Ba na tïme na cäŋ jwömö, gena ci øt acooŋ lam ni pïge piny.

¹⁵'Ba køøre na kwaan ciik Jwøk ki mo nyïïkuk Jwøk, kwääri mo øt acooŋ lam ajääk baŋge, ni köge, «Nyïïmera, ni näk jïïu da luubö mo dou købø jï jiy, caannu.»

¹⁶Kiper manøgønø, Pøøl aö maal, ni tïŋ cere maal ni kööe, ni «U na jø Icriel ki uuni ni wø lwäär ki Jwøk, wïnynyu luumma.

¹⁷Jwø jøøi na jø Icriel en beeye na jier kwäyø ni wëëk ge nyaay ni thööth kanya bëëtge yi ŋööm Ijep, ni bwøth ge wøk ki teek mo dwøŋ.

¹⁸Ni käär geni ki dï paap ki cwiiri ma pïëraŋween.

¹⁹'Ba na nø nyak wïth juurre abïriiø moa en yi ŋööm Keenan, ŋöömmögø amëëk geni na marge ni bëëtge yie, ni gïïögø bëët akän wøk ki cwiiri mo jïtö ki dïpe aŋween ki pïërabïïc.

²⁰'Ba ki køør manøgø gena mooe ki kwääri, këël mana këët ri nyikuŋ Jwøk ma Camiel.

²¹'Ba køøre gena pëëö kiper nyeya. Ni ö Jwøki ni cïp Cøøl o Kic jïge, na käl dhi øt Benjamen, ni bëëde na nyeya ki cwiiri ma pïëraŋween.

²²'Ba na nø käl gø wøk, Deebit athïïŋe nee tïme na nyeya jïge, ŋata cääne kipere, na kööe, ni ‹Cwïny Deebit o Jeci ajooda ni ena dhaanhø mo cwïnye ena baŋa, ni beeye ŋato tïïc gïïo manynya bëët.›

²³Ni beeye ki røk nyïïkwaac Deebit manøgø na ö Jwøki na käl Pïëmi jï jø Icriel, ni beeye Jecu, kaawat mana kwøŋ gø buuk.

²⁴'Ba kanya poode ni eni poot kär öö, Jøøn gïr lwøk na nyuudhi mar løk cwïny akøbe jï jø Icriel bëët.

²⁵'Ba kanya ö Jøønni ni tïme ni thööra tïïc mare, ena köö, ni ‹?Ki jïïu, u wø köö ni aana ŋa? Aani, a patha eni. Jïra bäär, 'ba da dhaanhø mo öö køøra, mo thøøth waye a ba doo mïërö ki man päda ge wøk tiete.›

²⁶«Nyïïmera, u na wäät nyïïkwaac Eeberam, ki jøø ni en dïïu ni wø lwäär Jwøk yøø, beeye øøni na wëëk luum piem man.

²⁷'Ba jø Jerucalem ki kwääri moge, kiper mana kärge Jecu ŋiiø ni kärge tiet luup moa car nyïïkuk Jwøki kwanyø, ni wø kwari ki yïth nïr jwömö bëët, luupögø awëëkge thur karge ki køør mana ŋølge gø yi thøø.

²⁸Këël na bëëde ni bäŋ gïn mo ege joodø mo eni doo rømø ki thøø, geni Paylat apëënyge nee eni 'näk.

²⁹'Ba na nø wëëkge gïïa näk ogöörö bëët kipere thur karge, rïŋ dëëre akäl piny ki bäät jaath, ni pïëlli yi bwörö.

³⁰'Ba atïŋ Jwøki maal ki yi thøø,

³¹ni nyøth dëëre ki nïne mo thööth jï jøøa öö ki eni ki yi Galili na ö Jerucalem. Ni bee geni na lïŋŋe moe jï jiy.

³²Ni beeye ni kälwa luumma nyään na met baŋu, ni beeye luumma kwøŋ Jwøki buuk jï kwäyø.

³³'Ba luummögø awëëk Jwøki thur kare røgø, ø na näk nyïïkwaacge, kanya tïŋ Jecu maal. Kaawat mana gööri ri riet Dut Pwøc thuwø, «ni ‹Ïïna wääda, ni dïcäŋi en aana tïmö ni aana wäru.›

³⁴'Ba luum mana tïŋ gø maal ki yi thøø, ni ba cäŋ døø yi kwääö këët, ena köö na enønø, «ni ‹Gwïëth Deebit na näk adïëri na en kur keere, mëëga ïïni.›

³⁵Kiper manøgønø, ena cäŋ köö thuwø yi Dut Pwøc kany mørø, «ni ‹Ïïni, dhaanhnhï na en kur keere ba diï wiiø nee kwääö joode.›

³⁶«Kiper Deebit na nø tïïc mo Jwøk yïth cwiiri moe, ena thøw, ni pïëli buut kwäye, ni ö dëëre ni joot kwääö.

³⁷'Ba eni na tïŋ Jwøki maal ki yi thøø, kwääö käre joodø.

³⁸Kiper manøgønø, beerra man ŋäyu gø, nyïïmera, ni beeye ŋatøgø ni køp wëën raay ki køøre jïïu en.

³⁹Ni beeye ki køøre no ö jøw ojïëy bëët ni ŋääthge noo pädi yïth jammi bëët moa ba doo maar lønyø jï ciik Modhe ki man pät uuni.

⁴⁰Kiper manøgønø, gwøgu rou, kiper nee bäŋe ya gïn mo ö bäätu dëët moa caan nyïïkuk Jwøki, na køp,

⁴¹«ni ‹Neennu, u jø ataa, yïthu rëëmge ni ränynyu. Kiper gïn mør otïïa yïth nïne mou, gïn mou ba doo maara jïëy ki gø, ni näk mo køp ŋat mørri købø jïïu.› »

⁴²'Ba kanya aacge wøk, gena kwaac jiyi kiper gïïögøøni nee cäŋ caannø jïge cäŋ jwömö mano ööi.

⁴³'Ba na keeth jiyi øt acooŋ lam, jø Juuth mo thööth, ki jøøa näk dëëtge ege løø na jø Juuth na cwïnyge en køør Jwøk, gena läp køør Pøøl ki Barnaba. Ni ö Pøølli ki Barnaba ni cäänge ki geni ni cøma cwïnyge ki man putge cwïnyge cïp køør met yi Jwøk.

⁴⁴'Ba na tïme ni cäŋ jwömö maya, päl pääny ki kare bäre røkge acooŋge kanya ciel nee luum Wuuö wïnyge.

⁴⁵'Ba na ö jø Juuthi na jootge jiy ni thööth, gena këëyö døc, ni peemge luumma caan Pøølli, ni janyge eni.

⁴⁶'Ba Pøøl ki Barnaba gena put cäänö døc ni cwïnyge da cer, ni köge, ni «Doo beer ki mana di luum Jwøk caanø jïïu dïkwøŋ. 'Ba kawaane na thanyu gø wøk, ni ŋølu rou wøk nou ba rømi ki kwøw mana näk adïëri mo bäŋ cuŋŋe, wa luga baŋ juurre nø.

⁴⁷Kiper beeye luumma caan Wuuö jïwa, na kööe, «ni ‹Ïïna thïïŋa niï tïmï ni ïïna tar kiper juurre, kiper nee pïëm man piem jiy ki gø kïthï yi piny kare bäre.› »

⁴⁸'Ba na ö luupögø na wïnynyi ya juurre, yïthge amïnnö ni jiemge luum Wuuö. Ni ö jøøa näk ojier Jwøki bëët kiper kwøw mana näk adïëri mo bäŋ cuŋŋe, ni jïëcge.

⁴⁹Ni ö luum Wuue ni nyaae yïth mïëyögø bëët.

⁵⁰'Ba jø Juuth yïth määr wø lämö na näk kwör cwøwge døøŋŋø, ki yïth jaae mo pääny, acoonge, ni tïïge ka ageem dëër Pøøl ki Barnaba, ni riemge ge wøk poge.

⁵¹'Ba geni tør tietge ateeŋge piny paanøgø, ni cige Ayköniem.

⁵²'Ba bääŋi yïthge amïnnö døc ni cwïnyge päŋ ki Jwïëc Jwøk na en kur keere.