Read anuak Moa Tïïc Nyïïatwieli 18 Bible Online

Moa Tïïc Nyïïatwieli 18 - anuak bible

Moa Tïïc Nyïïatwieli 18

¹'Ba køør manøgø Pøøl Athen awiie ni ci Körin.

²Ni joot ŋat Juuth mør mo nyeŋŋe Akwila ma nyï Pønta, ni beeye öönynye ki po jø Itali ki cïïe ma Paricila, kiper nyeya ma Kalødia ocïpö ki dwøl, ni jø Juuth bëët aage wøk ki yi Röm. Ni ci Pøølli kuna neen geni.

³'Ba kiper mana näk mo gena jiy mo ge tïïya teeŋ tïïc aciel, ena bëëdö ki geni ni ge tïïö. Kiper tïïa tïïcge, gena dïkwöc oduŋkaare.

⁴Ni eni wø pïëmö øt acooŋ lam yïth nïr jwömö bëët, ni cøga jø Juuth ki jø Gïrïïk.

⁵'Ba kanya pïïc Cayla ki Timöthi ki yi Macedönia, Pøøl acwänge ni køpa luum Jwøk, ni cäänna jø Juuth ni Krictø beeye Jecu.

⁶'Ba na kwierge luumme ni janyge eni, abïïge akenye, ni kööe jïge, ni «Remø maru odööŋ wïthu. A tøør yie. Køør man ennø, a cøøa baŋ juurre.»

⁷Ni aae kaace, ni ci øt nyen mo nyeŋŋe Tayta Jacta, ŋat mo bëëdö ni wø lama Jwøk, mo øde ena buut øt acooŋ lam.

⁸'Ba Karicpa na näk kwääy øt acooŋ lam ajïëy ki Wuuö ni ŋääth gø ki jø paare bëët. Ni ö jø Körinni mo thööth ni wïnyge luum Pøøl, ni jïëcge ni lwøk geni na nyuudhi.

⁹'Ba dïcäŋ aciel ki wäär Wuuö acäänö ki Pøøl yïth lääk, ni kööe, ni «Kärï lwäyö. Cäänï, ni ba lïŋï.

¹⁰Kiper aani, a nutö buutï, ni bäŋ dhaanhø mo ï dee røødhø mo tïïö dëërï ki gïn mo raac. Kiper jïra da jiy mo thööth yi paani en.»

¹¹Ni put bëëte ki cwiir aciel ki dwäde abïciel, ni pöö ki luum Jwøk dïge.

¹²'Ba kanya bëët Galliø na kwäärö mar Akeea, jø Juuth adwätö ni makge Pøøl ni kälge gø kar løøk.

¹³Ni köge, ni «Nyeni en, cøga jiy nee Jwøk lamge ki jöö mo ba en ri ciik Jwøk.»

¹⁴'Ba kanya tïm Pøølli ni manynya man jaal dhee, Galliø aköö jï jø Juuth, no «Onää u käla luum gïn mo obøth wala gïn mo raac mo ee tïïö ennø, kanymør ïtha daa ciiø ki luummu, u na jø Juuth.

¹⁵'Ba na tïme na luum pïëc kiper luup ki nyeŋŋi, ki luum ciik Jwøk maru, neennu yie keeru. Aana kweer ki man ŋøla luupögø piny.»

¹⁶Ni riem ge wøk ki kar løøk.

¹⁷Ni cige bëët ni makge Cøtheni na näk kwääy øt acooŋ lam, ni pwötge gø nyïm kar løøk. 'Ba Galliø bäŋ gïn mo ee caanø kiper gïnögø.

¹⁸'Ba køør manøgønø, Pøøl aruu yi Körin ki nïne møøk mo thööth. Køøre ena tïŋŋö buut nyïïmëëe ni aa Ciria ki jää naam. Ni Paricila ka Akwila cäädhi ka eni na aciel. 'Ba kanya jöök Cencure, jïëye agwäär wøk, kiper kööŋ mana kööŋ ki gø.

¹⁹'Ba na pïïcge Epeca, gena wii kaace. 'Ba eni ki dëëre adøny yi øt acooŋ lam ni pïëme ki jø Juuth.

²⁰'Ba kanya pëënyge eni ki man bëëde ki geni dïciel, eni kär jïëy.

²¹'Ba na tïŋŋe buutge, ena köö, ni «Aano duu baŋu noo kö Jwøki.» Ni tïŋŋe yi Epeca ki jää naam.

²²'Ba na pïïe Cecaria, ena cøø ni määth acooŋ Jwøk. Køøre ena ci Antïëk.

²³'Ba na thöödhe ki nïne møøk kaace, ena aay ni cäädhe ni gaa paani nø ni ci paani nø yïth mïëc Galeecia ki Parijia, ni eni cøømma cwïny bääŋi bëët.

²⁴Kanyøgø da ŋat Juuth mør mo nyeŋŋe Apøla mo oöö ki Alekdhandaria, ni ö yi Epeca. Eni, ena ŋat mo ŋäc cäänö, ni luup moa en yïth weet Jwøk ŋääe døøc,

²⁵ni eno pwönynyö ki jöör Wuuö. 'Ba kiper na en cwïnye køør gø, eni wø cäänö ni pöö ka luum Jecu døøc na karge, këël na ŋäc lwøk mar Jøøn keere na nyuudhi.

²⁶Ena tägö ki man cääne yi øt acooŋ lam ni cwïnye da cer. 'Ba na ö luumme na wïnynyi ya Paricila ka Akwila, ena kälge ni cäŋge tier luum jöör Jwøk lammø jïre døøc.

²⁷'Ba køøre na tïme ni manynya man kath løøga ya Akeea, cwïnye acøm nyïïmëëe, ni göönge bääŋi ki wëëlö, nee eni pänhge. 'Ba na pïïe kaagø, jøøa näk ojïëy ki køør met yi Jwøk akønye døc.

²⁸Kiper ena cäänö ni teek ni bööt jø Juuth ka cäänö nyïm jiy, ni nyøth luup moa en yïth weet Jwøk ni Krictø beeye Jecu.