Read anuak Moa Tïïc Nyïïatwieli 24 Bible Online

Moa Tïïc Nyïïatwieli 24 - anuak bible

Moa Tïïc Nyïïatwieli 24

¹'Ba na tïme na køør nïne abïïc, Kwääy Lam Mana Dwøŋ ma Ananaya apïï, ki jaae møøk, ki dïcääni aciel mo nyeŋŋe Tertula. Ni peethge luup løøk marge mana caange dëër Pøøl nyïm kwäärö ma Pilik.

²'Ba kanya cwøl Pøøl, Tertula atägö ki man lööe ki Pøøl, ni kööe, ni «Ï na Pilik, nyigwaak, beeye ki køørï na jïtwa ki bëët-mëër, ni beeye käädö marï na beer na jït paaci ki bëëtö mo beer.

³'Ba ki yïth luup bëët paac bäre ajïëy ki gø, ni yïthwa met døc.

⁴'Ba ï ba ööla ki man cööpa kany mo bäär, 'ba a kwaya ïïni ki met ec marï, nee ïthï cegï ki luumwa ki kany mo thiinh.

⁵Kiper nyeni en, ajootwa ni ena dhaanhø mo raac, ni cøønna yïth jø Juuth yi piny bäre, ni ena bwödhi mar lwaa Nadharin ni wø lämö ki teeŋ lam mør.

⁶Ni eni manynya man tïïc Øt Jwøk Mana Dwøŋ thuwø ni ba waany. ['Ba amakwa ni luumme dewa ŋøla piny ki køør ciik marwa.

⁷'Ba kwääy dïkuye ma Licia aöö ni käl gø wøk ceŋwa ki teek.

⁸Ni kööm jøøa löö ki eni, ni öge nyïmï.][12] 'Ba ennø, noo pëënynyï gø ki dëërï, tiet jammi bëët moa caanwa dëëre owïnynyï baŋe.»

⁹Ni ö jø Juuthi møga thuwø ni dwalge dhøkge ni gïïögø bëët beege karge.

¹⁰Kanyøgø kwäärö Pøøl anyoodhe ki cere nee cääne. Ni ö Pøølli ni jute ni kööe, ni «Ï ŋääa niï bëëdö kany ki cwiiri mo thööth ni ïïna kwääy løøk paani. Kiper manøgønø, yia amïnnö ki man caana luumma nyïmï.

¹¹'Ba ojootï, naa jïtö ki nïne apaar kurriiø keerge ki mana cøøa yi Jerucalem baŋ lam.

¹²Ni kärge a joodø naa pïëmö ki dhaanhø mør, wala yi lwaak mo yaa coonø yi Øt Jwøk Mana Dwøŋ, wala yïth uut acook lam, wala dï pääny.

¹³Ni bäŋe nyuudhi mo maarge nyooth jïrï, kiper luupa kïthge bääta kawaane en.

¹⁴'Ba mano jïëa jïrï beeye ni a wø lämö ki Jwøk mar kwäcwa ki Jöör Lam man wø cwølge ni teeŋ lam mør, ni aano jïëy ki jammi bëët moa näk ocaanø ri ciik Jwøk ki moa näk ogöörö yïth weet nyïïkuk Jwøk.

¹⁵Ni Jwøk yaa ŋäädhö ni da duun wøk køør thøø jï jøøa beyø ki jøøa reyø bëët, na näk ege jïëö thuwø.

¹⁶Kiper manøgønø, raa yaa gwøø cooth ki man bëëda ni cwïnya tar nyïm Jwøk ki nyïm jiy.

¹⁷'Ba na nø thöödha ki cwiiri mo boop, aana öö naa käla jap cane jï jø powa, naa cïpa ko olämme thuwø.

¹⁸'Ba kanya tïïa gïnögø, aana jootge yi Øt Jwøk ni dëëra yaa døøc mo waany, ni bäŋ lwaak buuta wala dïlweel.

¹⁹'Ba da jø Juuth møøk mo käla Eecia, mo ge doo ena kany thuwø nyïmï kiper luumma dege caanø dëëra, ni näk jïge da løøk ki aani.

²⁰Wala jøøi ii ki dëëtge beerra man caange gïna raac na tïïa na jootge kanya cuŋŋa nyïm kwääc løøe.

²¹Kiper beeye gïrpiny aciel keere, mana kööa ki gø ni dwøra yaa tïŋ maal kanya cuŋŋa dïge, ni ‹Beeye gïr duun wøk køør thøø ni tïm løøki ni dagø bääta dïcäŋi en.› »

²²'Ba Pilik kiper na ŋäc tier Jöör Lam manøgø ki mo thiinh, gena wëëk ciin wøk, ni kööe, ni «Kanyo ö Licia na näk kwääy dïkuye, luummu oneena.»

²³Køøre ena cïpö ki dwøl jï kwääy lwaa dïkuye ma dïpa, nee Pøøl bëëde yi øt twöc, ni patha twöc mo raac, ni ba män nyïïawääte ki ciin baŋe kiper gïno manynye.

²⁴'Ba na tïme na køør nïne møøk Pilik aöö, ki cïïe ma Darucila ma nyijø Juuth. Ni jääk baŋ Pøøl ni wïny luumme na caane kiper tier ŋäädhe na en ri Krictø Jecu.

²⁵'Ba kanya ö Pøølli na piem gïr bëëtö mo beer, ki gïr män røk ki raay, ki kanya caan gø ni da kany mo luup jiy ŋøla piny yie mo poot ena nyïm, Pilik cwïnye abwøk ni kööe, ni «Ci wøk dïciel. Aano jïti ki kany cwøla ïïni yie.»

²⁶Ni ee ŋäädhö thuwø, ni kanymør eno mooc Pøølli ki jammi. Kiper manøgønø, ena tïmö ni jääga baŋe kwöre mo thööth ni wääge ki gø.

²⁷'Ba na nø thum cwiiri ariiø, Pilik awiil Pörcia Pecta. 'Ba Pilik kiper na many man døøc yïth jø Juuth mo met, Pøøl awii øt twöc.