Read anuak Moa Tïïc Nyïïatwieli 25 Bible Online

Moa Tïïc Nyïïatwieli 25 - anuak bible

Moa Tïïc Nyïïatwieli 25

¹'Ba kanya tïïc Pecta na kwäärö mar Cecaria, ena ci yie. 'Ba na pïïe paanøgø, køør nïne adäk ena tïŋŋö ni aa Jerucalem.

²Ni ö kwääc laammi ki jøøa døøŋŋø røk jø Juuth ni caange gïr Pøøl jï Pecta, ni kwaacge eni døøc,

³nee Pøøl cwöl yi Jerucalem ki met ec mare, kiper gïre ege nø cooŋ ki cwïnyge ni ge møøra piny waŋjöö nee 'näkge.

⁴'Ba aløk Pecta, ni «Pøøl ena Cecaria no otwöö, ni aani ki dëëra, a døøk kany mo cään.

⁵Kiper manøgønø, beerra man ö jøøa näk ocuumö dïïu ni lööpge ki aani. 'Ba noo näk da gïn mo raac jïre, geno löö ki eni.»

⁶'Ba na nø bëët Pecta ki geni ki nïne mo jïtö ki kar abära wala apaar, ena døø Cecaria. 'Ba na tïme na aruunnø man, ena ci kar løøk ni cïpe ki dwøl, nee Pøøl käl nyïme.

⁷'Ba na ööe, jø Juuth moa öö ki yi Jerucalem acuŋŋö buute, ni ge kïtha bäät Pøøl ki luup mo reyø døc, mo kär maar lønyø jïge ki man nyoothge tietge.

⁸'Ba Pøøl mare aläw caan ni kööe, ni «Aani bäŋ gïn mo yaa baa bäre bäre dëër ciik Jwøk mar jø Juuth, wala dëër Øt Jwøk Mana Dwøŋ, wala dëër Cidhar.»

⁹'Ba Pecta na many man døøc yïth jø Juuth mo met, aköö jï Pøøl, ni «?Ï manynya man ciï yi Jerucalem, nee luupi ii na caan dëërï nee caan nyïma kaace?»

¹⁰'Ba Pøøl aköö, ni «Aani, a cuŋŋa kar løøk mar Cidhar, kanya di mara caanø yie. Bäŋ gïn mo raac mo yaa tïïö dëët jø Juuth, ni manøgø ŋäyï ki dëërï.

¹¹Kiper manøgønø, ni näk mo aana dhaanhø mo raac, ni da gïn mo raac mo yaa tïïö maa doo thøw kipere, a ba doo kweer ki thøø. 'Ba ni näk luupa kïth jø Juuthi bääta bäŋ tietge, doo bäŋ ŋat mo cïp aani ceŋge. Aani, mara ocaana nyïm Cidhar.»

¹²Kanyøgø Pecta na nø løøŋ tier gïnögø ki jaae moe, ena köö jï Pøøl, ni «Ïïna köö niï cøøa nyïm Cidhar. Beer nø, ïïno ci nyïm Cidhar.»

¹³'Ba na tïme na køør nïne møøk, nyeya ma Agaripa ki Bernice gena pïï Cecaria kuna määthge Pecta.

¹⁴'Ba na bëëtge kaace ki nïne mo thööth, Pecta luum Pøøl apare jï nyeya, ni kööe, ni «Da dhaanhø kany mo owii Piliki øt twöc.

¹⁵'Ba kanya cøøa yi Jerucalem, kwääc laam ki jaak jø Juuth, gïre aparge jïra, ni pëënyge aani ni ŋøla eni wøk.

¹⁶'Ba adwøga jïge ni manøgø ba beer jï jø Röm ki man ŋøl dhaanhø wøk ni eni poot kär pï kanya ciel ki jøøa löö ki eni, nee jïte ki kar dhee kiper luummo caange dëëre.

¹⁷Kiper manøgønø, kanya öge kany ki aani, raa kära gaalø. Aana put ci kar løøk ka aruunnø man ni cïpa ki dwøl ni nyenøgø käli.

¹⁸'Ba na ö jøøa löö ki eni ni öge maal, bäŋ gïn mo raac mo ege caanø yi løøk mare, kaa mana näk yaa gø caarø ni dege caanø.

¹⁹'Ba ge cara luup møøk mo ge pïëmö ki eni kiper lam marge, ki gïr nyen mør ma Jecu mo othøw, mo ocaan Pøølli na acäŋ kwøw.

²⁰'Ba na dhäth gïïögø jïra ki ŋøl, ena pëënynya ki man näk mo eni manynya man ci Jerucalem, nee luupögø cäŋge løøgø kunöce.

²¹'Ba na kö Pøølli ni eni bëëde no otwöö ni koora luubö mano ŋøl nyeya mana dwøŋŋi piny, ni beeye Cidhar, aana cïpö ki dwøl ni eni bëëde no otwöö, gøøc kanyo jïta ki jöö mano kïtha gø nyïme.»

²²'Ba Agaripa aköö jï Pecta, na «A doo manynya man wïnynya dwør nyenøgø ki dëëra.» Ni dwøk gø, ni «Beer, mare owïnynyï diøø.»

²³'Ba na tïme na aruunnø man, Agaripa ki Bernice, gena öö ni geno ruyö døøc. Ni dønyge øt wø kuut jøwi yie, ni ge cäädhi ka kwääc dïkuye ki jøøa kwörge døøŋŋø mo paac. Ni ö Pecta ni cïpe ki dwøl, ni put Pøøl käl nyïmge.

²⁴Ni kö Pecta, ni «Ï na nyeya ma Agaripa, ki uuni bëët ni en kany ki waani en, neennu nyena ö jø Juuthi bëët moa en Jerucalem ki moa en kany na kwaacge aani kipere, ni ge rëëdö ni eni ba doo beer ki man kwøe këët.

²⁵'Ba bäŋ gïn mo yaa joodø mo ee tïïö mo doo rømø ki thøø. 'Ba na kööe ni eni cøøa nyïm nyeya mana dwøŋ, aana jïëy ni eni jääŋŋa jääŋŋö.

²⁶'Ba aani, jïra bäŋ tier luubö mo beer mo gööra baŋ nyenynya kipere, ni beeye tiere ni käla gø nyïmmu en, ni beeye nyïmï røk, ï na nyeya ma Agaripa en, kiper noo nø pëënynyø gø, naa jïta ki gïn mo gööra.

²⁷Kiper nëëni kee paa gïn mo beer jïra ki man wëëga ŋat mo otwöö käl, ni bäŋ gïn mo onyooth tiet luupa caan dëëre.»