Read anuak Moa Tïïc Nyïïatwieli 26 Bible Online

Moa Tïïc Nyïïatwieli 26 - anuak bible

Moa Tïïc Nyïïatwieli 26

¹Kanyøgø Agaripa aköö jï Pøøl, ni «Ïïna wec nø ki man caanï marï.» Køøre Pøøl cere atïŋ maal ni caan mare, ni kööe,

²na «Acaara ni yia met na tïme ni beeye ïïni, ï na nyeya ma Agaripa en, noo caana mara nyïmï dïcäŋi kiper luup bëët moa kïth jø Juuthi bääta.

³Kiper ïïni kööŋŋe mo jø Juuth bëët ki pïëm marge ŋäyï døøc. Kiper manøgønø, a kwaya ïïni nee luumma wïnynyï mëëth.

⁴«Bëëtö mara kanya ööa ki thïnhö na bëëda dï jø powa, ki kanya bëëda yi Jerucalem, ŋäc jø Juuthi bëët.

⁵Ni ŋäcge ki kany mo bäär, ni dege caanø onää ge caya gø, ni bëëtö mara ena køør jøøa en ri jöör lam marwa mana teek døc, ni aano bëëdö ni aana ŋat Paricith.

⁶'Ba kawaane a cuŋŋö kar løøk kany en kiper mana ŋäädha luumma kwøŋ Jwøki buuk jï kwäcwa.

⁷Ni beeye luum wø ŋääth dhøk uudi mowa na apaar kurriiø nee ci jïge, kany wø tïnyge Jwøk døøc ki wärre ki cääŋŋe. Ni beeye kiper luum ŋäädhe manøgø ni ö jø Juuthi ni lööge ki aani, ï na nyeya.

⁸?Aŋø ni tïme keda gïn mo ba maaru jïëc en, ki man ŋääth Jwøk ni jiy wø tïŋe maal ki yi thøø?

⁹«Këël aani ki dëëra acaara ni doo beer jïra ki man tïïa ki gïï mo thööth naa raanynya nyeŋ Jecu nyï Nadhareth.

¹⁰Ni tïïa gø møn yi Jerucalem. Ni kïtha jø Krictø mo thööth øt twöc ki teek mana wëëk kwääc laammi aani. 'Ba na wara nääŋ geni, aano jïëy thuwø ni cïba dwøra.

¹¹Ni ge wø pööta pöötö cooth yïth uut acook lam bëët, naa manynya man wëëga geni jany nyeŋŋøgø. Ni gëëma ki geni këël mana pïïa tiet mïëc juurre, naa män ki geni døc.

¹²«Ni beeye na aa naa cøøa Damacka ki teek mana wëëk kwääc laammi aani.

¹³'Ba na tïme na dhöör cäŋ, ï na nyeya, kanya ena waŋjöö, da tar ma araŋa mo ööi ki maal, ni tar døc ni kaala tac cäŋ, ni put rieny bääta ki jøøa cäädhö ki aani.

¹⁴Ni putwa pädhö bëët, ni wïnynya dwøl ni cäänö ka aani ki dhi Ibaru, ni ‹?Cøøl, Cøøl, aŋø ni gëëmï ki aani en? Beeye gïn mo leth kiperï ki man cäpï gïï mo cööba ïïni.›

¹⁵«Ni kööa, ni ‹?Ïïna ŋa, Kwäärö?› «Ni ö Kwäärö ni løk gø, ni ‹Aana Jecu ni gëëmï ki gø en.

¹⁶Ö maal ni cuŋŋï ki tietï. Kiper dëëra anyoodha jïrï kiper niï jiera naa tïnynyï, nee gïïa nø jootï aani dëëtge, ki moo nyoodha raa jïrï yïthge nee gïrge køpï.

¹⁷'Ba ïïno gwøa ceŋ jø Juuth ki ceŋ juurre, jøw ojääŋŋa ïïni baŋge en,

¹⁸kiper nee nyeŋge japï, nee muudhö wecge ni løøge rege baŋ tar, ni wecge teek Ceethan ni løøge rege baŋ Jwøk, kiper nee raay moge wec Jwøki, ni jïtge ki karge dï jøøa näk ocïp kur keerge na mo Jwøk, ki køør ŋäädhe man wø ŋääthge aani.›

¹⁹«Kiper manøgønø, ï na nyeya ma Agaripa, wïïa kär teek ki mana neena na öö ki maal.

²⁰'Ba akwøŋa køp jï jøøa en Damacka, køøre akøba yi Jerucalem ki yïth mïëri bëët mo Judia, ki jï juurre thuwø, nee wïthge cäŋge caarrø ni løøge rege baŋ Jwøk, ni tïïcge gïï mo orømø ki løk cwïny marge.

²¹Beeye gïnögø nø, na ö jø Juuthi ni makge aani yi Øt Jwøk Mana Dwøŋ, ni ge manynya man 'näkge aani.

²²'Ba a wø køny Jwøki kønyø këël dïcäŋi en. Ni beeye ni cuŋŋa kany en, naa cäänna jøøa kwörge therø ki jøøa kwörge døøŋŋø, naa para luupa car nyïïkuk Jwøki ki moa car Modhe ni doo tägö, ni bäŋ gïn mør mo kïtha bäätge,

²³ni beeye ni Krictø gïï mo leth jwøre jwørø, 'ba kiper mano tïme ni bee eni noo kwøŋ duu wøk ki yi thøø, eni luum tar købe købø jï jø poge ki juurre bëët.»

²⁴'Ba kanya poot Pøølli ni caana luumme na enønø, Pecta dwøre atïŋ maal døc ni kööe, ni «Pøøl, ïïna bøøl, luupa thööth na kwanyï ïïna døøcge bøøl.»

²⁵'Ba Pøøl aköö, ni «Mara paa bøølø, ï na Pecta, nyigwaak. 'Ba a cara gïï ma adïëri.

²⁶Kiper nyeya gïïögø ŋääe, ni beeye ni lämma gø døøc en. Kiper ŋääa døøc ni gïïögø bëët bäŋgø mo obøth jïre mo käre kwøŋ wïnynyö, kiper gïnögø kär tïïö gøøt.

²⁷?Ï na nyeya ma Agaripa, aŋø, ï patha ojïëy ki luup nyïïkuk Jwøk? Ŋääa ni ïïno jïëy.»

²⁸'Ba Agaripa aköö jï Pøøl, na «?Aŋø, iï caarø naa diï døøc dhaanh Krictø ki nyi kany mo thiinh en nø?»

²⁹'Ba Pøøl aköö, ni «Nee kany mo thiinh wala kany mo bäär, ki nyeŋ Jwøk yia doo met ni paa ïïni keerï, 'ba këël jøøi bëët thuwø ni wïny dwøra dïcäŋi en, mana dege tïmö kaamara, ba tiirra oguuti ii.»

³⁰'Ba kanyøgø nyeya aö maal, ki kwäärö, ki Bernice, ki jøøa näk opï piny ki geni.

³¹'Ba na nø aage wøk, gena cäänö keerge, ni «Nyenøgø bäŋ gïn mo ee tïïö mo doo rømø ki thøø, wala tööc.»

³²'Ba Agaripa aköö jï Pecta, ni «Nyenøgø doo pädö, onää eni kär nø köö ni eni cøøa nyïm Cidhar.»