Read anuak Moa Tïïc Nyïïatwieli 28 Bible Online

Moa Tïïc Nyïïatwieli 28 - anuak bible

Moa Tïïc Nyïïatwieli 28

¹'Ba køøre na nø pïï jøwi wøk ni bäŋ gïn mo otägö dëëtge, awïnywa na acuullögø beeye acuula mo cwøl ni Malta.

²'Ba jøøa bëëdö kaace met ec mo dwøŋ døc anyoothge jïwa. Kiper waana ämge ki maac ni pänhge wa bëët, kiper køth atïmö ni pädhö ni piny da köö.

³'Ba Pøøl akännö ki jenni ni kïth geni yi maac. 'Ba na tïm kar maaci ni lïëth, thwöl aö wøk ni gam cer Pøøl.

⁴'Ba na ö jøøa en kaagø na neenge thwöl ni lïërö cere, gena cäänö keerge, ni köge, ni «Nyenøgø dïnääy møn. Këël na bødhe ki naam, kär wec Jwøki nee kwøe.»

⁵'Ba eni thwöl ateeŋ yi maac, ni bäŋ gïn mo raac mo otägö dëëre.

⁶Ni raŋge gø ni ki baŋge ni dëëre puta kwöt, wala kanymør laara pädhö ni thøøe. 'Ba na nø ruuge ni ge neeta gø ki kany mo bäär, ni bäŋ gïn mo raac mo otägö dëëre mo ege joodø, acäŋge caarø ni köge, ni «Ena jwøk mør.»

⁷'Ba buut kanya enwa yie ya acuullögø, yie da ŋøøp kwäärö mo cwøl ni Publia. Eni waana cwöl paare ki mëër ni caam waani ki nïne adäk.

⁸'Ba wää Publia atïmö ni tuu ka adïrïgi ki ŋwel ec. Ni liimmi ya Pøølli, ni läme, ni kïth ceŋŋe bäät gø ni køny gø.

⁹'Ba na nø täk gïnögø, jø møga bëët moa näk dëëtge da ŋwiili ya acuullögø gena öö thuwø, ni køny geni.

¹⁰Ni moocge wa ki muuce mo thööth. 'Ba kanya tïŋwa, yi jääy akïthge ki japa canwa bëët.

¹¹'Ba na tïme na køør dwäde adäk, waana tïŋŋö ki jääy mør ma arïïa ee thöörö ya acuullögø, ni beeye jää paana cwøl ni Alekdhandaria, mo deŋŋe ogöönnö ki kït juu moa cwøl ni Cïp Jwøk ni beeye ŋïï mare.

¹²Ni mäkwa piny Ciraku ni bëëtwa kaace ki nïne adäk.

¹³'Ba na tïŋwa kaace, naam agørwa ni pïïcwa Regiem. 'Ba na nø rïïwa ki dicäŋ aciel, jam wø rïïw piny acööt. 'Ba na tïme na riet nïne, waana pïï Putiöli.

¹⁴Ni jïtwa ki nyïïmëëe kaace, ni cwølge waani nee wa bëëtwa ki geni ki nïne abïriiø. Køør manøgø nø, waana pïï Röm.

¹⁵'Ba nyïïmëëe moa en kunöce kanya wïnyge waani, gena öö ni julge waani ni wa poot ena Apia Pöram ki Tharii Tabaren. 'Ba na jootwa geni, Pøøl Jwøk apwøe ni put cwïnye mak.

¹⁶'Ba na pïïcwa Röm, Pøøl awëëk bëëtö keere ki dïkuri man wø koor gø.

¹⁷'Ba na tïme na køør nïne adäk, dïbwöthe mo jø Juuth moa en kaace acwöl Pøølli kanya ciel. 'Ba na nø öge kanya ciel, ena köö jïge, «Nyïïmera, këël na bëëde ni bäŋ gïn mo yaa tïïö dëët jø pøø wala dëët kööŋŋe mo kwäyø, aana twöc yi Jerucalem ni cïp aani ceŋ jø Röm.

¹⁸'Ba na nø tetge aani, gena tïmö ni ge manynya man pätge aani, kiper na bäŋe luubö mo doo rømø ki thøø dëëra.

¹⁹'Ba kanya kweer jø Juuthi, aana köö ni beerra man cøøa nyïm Cidhar, këël na bäŋe gïn mo raac mo caana dëët jø pøø.

²⁰Kiper manøgø nø, beeye na cwøla uuni naa lïïmu, naa cääna ki uuni. Kiper beeye ki køør ŋato ööi ni wø ŋääth jø Icrielli ni twöc aani kipere ko oguudi en.»

²¹Ni köge jïgø, ni «Bäŋ weeli mo oö baŋwa ki yi Judia mo caana gïrï. Ni bäŋ nyïïmëëe mo oö kany mo ocaan gø wala mo ocäänö ki gïn mo raac ki nyeŋŋï.

²²'Ba ennø, wa manynya man wïnywa mano caanï. 'Ba luum jöör lam manøgø, ŋäcwa ni piny bäre wø cara gïï mo reyø kipere.»

²³'Ba na nø cïpge piny ki cäŋ man öge baŋe yie, gena put ö baŋe kanya bëëde yie ni ge thööth døc. Ni par tier luummögø jïge, ni tägi ka amöölla këël abøøya, ni køpa gïr buc Jwøk, ni nyootha luum Jecu jïge ni beeye adïëri, ni nyoodhe ka ri luup moa en ri ciik Modhe ki mo nyïïkuk Jwøk.

²⁴'Ba jiy møøk ajïëy kiper gïïa care, ni ö jø møga ni kärge jïëy.

²⁵Køøre na jït dïge ki pïëm gena aay, køør luumma näk aciel na caan Pøølli, na kööe, ni «Jwïëc Jwøk na en kur keere mare adïëri na caan gø jï kwäyu ki dhi nyikuŋ Jwøk ma Aydheea, na kööe,

²⁶«ni ‹Ci baŋ jøøgø, ni kööï, no «Owïnynyu møn, ni ba maaru tiere kwany, ni nëënu møn, 'ba bäŋ gïn jootu.

²⁷Kiper cwïny jøøi ii, atïmö ni bäŋ gïn mo maarge joot, ni ïthge odhïŋ ki man wïnyge luubö, ni nyeŋge ege miiø kiper nee ba jootge ki nyeŋge, ni ba wïnyge ki ïthge, ni ba kwanyge tier gø ki cwïnyge, ni ba luŋge baŋa, nee ge køny.» ›

²⁸«Kiper manøgø nø, wär ŋäyu nø, ni luum pïëm man piem jiy ki gø man en, na öö ki baŋ Jwøk, awëëk kïth baŋ juurre. Kiper geni ïthge cekge ciiø.» [

²⁹'Ba na nø caan luummögøøni, jø Juuth gena aay buute, ni ge pïëmö døc yïthakicge keerge.][14]

³⁰Ni ö Pøølli ni put bëëtö kaace ki cwiiri ariiø bëët, ni dëëre caama eni keere. Ni pänh jiy mo wø ö baŋe bëët.

³¹Ni køp gïr buc Jwøk, ni pööe ki luum Kwäärö ma Jecu Krictø ni wïnyö jaak ni bäŋ ŋat mo omän gø.