Read anuak Moa Tïïc Nyïïatwieli 9 Bible Online

Moa Tïïc Nyïïatwieli 9 - anuak bible

Moa Tïïc Nyïïatwieli 9

¹'Ba Cøøl cwïnye poot raac ni manynya man 'näk bääk Wuuö, ni ci baŋ Kwääy Lam Mana Dwøŋ,

²ni pëëny gø ki weeli kiper uut acook lam moa en Damacka, kiper noo näk mo eni jïtö ki jiy mo ena ri Jöör Lam mar Jecu, nee cwøw wala mään, nee ge käl yi Jerucalem ni geno twöö.

³'Ba yi wääth mare na tïm kare ni cään ki Damacka, tar aput öö ki maal ni rienye bääte.

⁴Ni put pädhö ni wïny dwøl ni cäänö ki eni, ni köö, ni «?Cøøl, Cøøl, aŋø ni gëëmï ki aani en?»

⁵Ni kööe, ni «?Ïïna ŋa, Kwäärö?» Ni duu gø, ni «Aana Jecu ni gëëmï ki gøøni enø.

⁶'Ba ö maal ni ciï pääny; gïno tïïyï ocaan jïrï.»

⁷'Ba jøøa cäädhö ki eni gena mak apïte, kiper dwøl wïnyö jïge, 'ba bäŋ dhaanhø mo jootge.

⁸Ni ö Cøølli maal. 'Ba na jap nyeŋŋe ena tïmö ni ba nëënö. Kiper manøgønø, ena piecge ki cere ni kïthge gø yi Damacka.

⁹Ni bëëde ki nïne adäk ni ba nëënö, ni ba cämö, ni ba mädhö.

¹⁰'Ba da bääŋ aciel yi Damacka mo nyeŋŋe Ananaya. Wuuö acäänö ki eni yïth lääk, ni kööe, «Ananaya.» Ni dwøk gø, ni «Aani en, Kwäärö.»

¹¹Ni kö Wuue jïre, ni «Ö maal ni ciï yi øtjöör wø cwøl ni Tiir, ni pëënynyï nyen mør yi øt Juudac no nyeŋŋe Cøøl ma nyï Tarca. Kiper eni lämö.

¹²'Ba yi lam mare, da ŋat mør mo nyeŋŋe Ananaya mo ee joodø ni ööa baŋe ni peeth ceŋŋe bääte kiper nyeŋŋe nee døøge karge.»

¹³'Ba adwøk Ananaya, ni kööe, ni «Kwäärö, gïï nyenøgø awïnynya dhøk jiy mo thööth, ni gïï mo thööth mo reyø døc ee tïïö dëët jiyï yi Jerucalem.

¹⁴Ni eni jïre da teek kany, mo owëëk kwääc laammi eni, man twöc jiy mo wø cøør nyeŋŋï.»

¹⁵'Ba Wuuö aköö jïre, ni «Ciï, kiper eni yaa jierø na gïr tïïc mara, nee nyeŋŋa kääre dï juurre ki nyeye ki dï wäät Icriel.

¹⁶'Ba eno nyutha gïï mo thööth mo jwøre jwørø kiper nyeŋŋa.»

¹⁷Kanyøgø Ananaya acøø ni døny yi øtø. Ni peeth ceŋŋe bäät Cøøl, ni kööe, ni «Cøøl, coka, Kwäärö ma Jecu na nyuth dëëre ïïni øtjööra ööï ki gø, aana jääŋŋe nee nyeŋŋï cäŋge døø karge, ni päŋ cwïnyï ki Jwïëc Jwøk na en kur keere.»

¹⁸Kanyøgø gïï mo caala kwönne aput päth piny ki nyeŋŋe, ni døø nyeŋŋe karge. Ni ö maal ni lwøi na nyuudhi.

¹⁹Ni cäme ni tëën dëëre. Kanyøgø Cøøl abëëdö ki bääŋi yi Damacka ki nïne mo boop.

²⁰Ni put gïr nyeŋ Jecu køp yïth uut acook lam, ni caana gø, ni Jecu beeye O Jwøk.

²¹'Ba jøøa wïny luumme bëët, yïthge athäŋŋö, ni köge, na «?Aŋø, nyeni en, paa nyena wara raany jiy yi Jerucalem mo wø cøør nyeŋŋøgø? Ni beeye na ö kany nee jøøa jïëy ki Jecu kïth baŋ kwääc laam no otwöö.»

²²'Ba teek Cøøl ree ameede, ni tïm wïth jø Juuthi moa bëëdö yi Damacka ni wïïrö, kiper man wø nyuth gø geni ni Jecu beeye Krictø.

²³'Ba na tïme na køør nïne mo thööth, jø Juuth atïmö ni ge caya man 'näkge Cøøl.

²⁴'Ba luum 'näk marge atïmö ni ŋäc Cøølli. 'Ba gena tïmö ni ge køya dhøk kiir ki cääŋŋe ki wärre nee eni 'näkge.

²⁵'Ba ena käl bääge ni kïthge gø yi dhwöŋŋö, ni gapge gø wøk ŋää kiir.

²⁶'Ba Cøøl na nø ö yi Jerucalem, ena tïmö ni manynya man dwäte ki bääŋi. 'Ba bääŋi alwäyö bëët ki eni, kiper patha ege jïëö ni ena bääŋ.

²⁷'Ba ena käl Barnaba ni kïth gø baŋ nyïïatwieli. Kanyøgø gïr luum Cøøl kanya neen Kwäärö waŋjöö ni cääne ki eni acaane jïge døøc. Ni caan kanya bëët Cøølli yi Damacka na køp gïr nyeŋ Jecu ni cwïnye da cer.

²⁸Kanyøgø Cøøl atïmö ni cäädhö dïge yi Jerucalem, ni køp luum Jwøk ki nyeŋ Kwäärö ni cwïnye da cer.

²⁹Ni cääne ni pïëme ki jø Juuth moa näk odhoom na jø Gïrïïk. 'Ba gena tïmö ni ge caya man 'näkge gø.

³⁰'Ba na ö gïnögø na jooti ya nyïïmëëe, ena kïthge Cecaria ni jääŋge gø Tarca.

³¹Kanyøgø acook Jwøk mo Judia bäre, ki Galili ki Cameria, gena bëëdö ki bëët-mëër ni tëënge. Ni ge bëëdö ni ge wøøra Wuuö, ni meetge rege ki køør cøm cwïny mar Jwïëc Jwøk na en kur keere.

³²'Ba kanya bëët Piterri ni cäädhö dï mïëri, ena ci baŋ jø Jwøk moa näk bëëdö Lida thuwø.

³³Ni joot nyen mo nyeŋŋe Aneea, mo obëëdö bäät pëëm ki cwiiri abära no obäp.

³⁴Ni kö Piterri jïgø, na «Aneea, ïïna køny Jecu Krictø; ö maal ni jegï pëëmï.» Ni put ö maal.

³⁵Ni ö jø Lida bëët ki jø Caran ni jootge Aneea, ni løøge rege baŋ Wuuö.

³⁶'Ba da bääŋ aciel mo bëëdö Jøpa, mo nyeŋŋe Tabitha, na näk tiere beeye Dørka. Ena nyijø mo wø tïïya gïï mo beyø na ŋat køny.

³⁷'Ba yïth nïrögø ena mak täwi ni thøøe. 'Ba na nø lwøkge dëër gø, apïëlge yi øt pööki mana en maal.

³⁸'Ba kiper mana tïme ni Lida kare cään ki Jøpa, na wïnynyi ya bääŋi ni Piter ena yie, gena jääk baŋe ki jiy ariiø nee kwacge ki man ö baŋge ni ba ruu.

³⁹Kanyøgø Piter aö maal ni cøøe ki ge. 'Ba na pïïe, ena kälge ni kïthge gø yi øt pööki mana en maal. Ni ö määr thuunhnhi bëët ni cuŋge buute ni ge jwöŋö, ni ge nyøtha koothe ka abïïe moa tïïc Dørka kanya poode dïge.

⁴⁰'Ba gena wëëk Piterri ciin wøk bëët. Ni ö Piterri ni këël cøŋŋe piny ni läme. Køøre ree aløø baŋ dëër nyijøøgø, ni kööe, ni «Tabitha, ö maal.» Ni ö nyijøøgø ni jap nyeŋŋe. 'Ba na joot Piter, ena ö maal ni bëëde.

⁴¹Ni ö Piterri ni rwaak cere baŋ gø ni tïŋ gø maal. Køøre jø Jwøk acwøle ki määr thuunhnhi, ni käl gø nyïmge no okwøw.

⁴²Ni put gïnögø tïmö ni ŋäc jø Jøpa bëët. Ni ö jiyi mo thööth ni jïëcge Wuuö ni ŋääthge gø.

⁴³Ni ö Piterri ni bëëde yi Jøpa ki nïne mo thööth buut Cayman, ŋat ma dïnyuŋ pëëne.