Read anuak Röm 12 Bible Online

Röm 12 - anuak bible

Röm 12

¹Kiper manøgønø, nyïïmera, a kwaya uuni ki køør met yi Jwøk na päl ki man cïpu dëëtu no olämi mo kwøw ni ena kur keere, na gïn wø jïëc Jwøki, ni beeye lam maru ni wø en cwïnynyu.

²Käru bëëdö nou caala jø pinyi en këët, 'ba tïmu nou nyärö ki køør mana døøc cwïnynyu mo nyärö, kiper nee mana many Jwøki nee ŋäyu døøc, ki gïn mo beer ma kare man wø jïëc Jwøki.

³'Ba a cäänna uuni u bëët ki køør met yi Jwøk na wëëk aani, nee bäŋe dhaanhø dïïu mo caar dëëre ni eno kadhø ni kaala mana dee caarø. 'Ba ŋati man nø wïïe wär caare døøc no orømø ki ŋäädhe mana wëëk Jwøki eni.

⁴Kiper ŋääø ni dëël aciel da thäŋi mo thööth, ni thägögø ba tïïc tïïc aciel.

⁵Kaawat manøgønø, këël na thöödhø, øøna dëël aciel ri Krictø, ni ŋati man nø ena thääŋö ri wati maya.

⁶'Ba na tïme ni jïïø da muuce keda mana cïbi jïïø na teeŋi ki met ec, beerra man tïïø ki geni. Ni näk ma køp dwør Jwøk, beerra man købø gø no orømø ki ŋäädhe marø.

⁷'Ba ni näk beeye tïïc man tïny jø møøk na wëëk øøni, beerra man tïnynyø ge. Ni ŋato wëëk pwöc, wär pööe.

⁸Ni ŋato wëëk köömmö man kööm jiy, wär jiy köömme. Ni ŋato wëëk muuy man muu jammi, wär muue ki bäth ec. Ni ŋato wëëk nyuunhnhö man nyuunh jiy ki luup, wär jiy nyuunhnhe ki cwïnye bäre. Ni ŋato wëëk køny man kunye, wär kunye ni yie met.

⁹Beerra man mëërru ki mëër mo ree bäŋ atade. Männu ki gïno raac ni magu gïno beer.

¹⁰Ŋati man nø mëëre ki wati maya ki mëër man wø mëër nyïïmëëe ki gø. Ni ö ŋati man nø ni laar wödö wëëk wati maya.

¹¹Käru jøøm ki tïïu, 'ba bëëdu nou tïnynya Wuuö ni täärnyïmmu leer ki Jwïëc Jwøk ni en cwïnynyu.

¹²'Ba yïthu mïnge ki ri ŋäädhe maru, ni cïbu cwïnynyu piny ki gïïo leth ni wø pïï dëëtu, ni lämu cooth.

¹³Nywaagu japu ki jø Jwøk mo wø can, ni bëëdu nou pänhnha jiy.

¹⁴Gwïëthu jø wø caan uuni. Gwïëthu geni ni ba ciennu ge.

¹⁵Yïthu mïnge ki jø wø yïthge met. Ni jwöŋu ki jø wø jwöŋi.

¹⁶Bëëdu ki cwïny aciel. Käru tïmö nou töödö, 'ba ŋïïyu ki jø wø can. Ni ba caarru gø ni kadha uuni.

¹⁷Kär nou dwøga gïn mo raac jï ŋato caan gïn mo raac dëëtu, 'ba caarru gïno beer ki jï jiy bëët.

¹⁸'Ba ni näk mo løny jïïu ki kun ni da kuru en, u doo bëëdö ki bëët-mëër ki jiy bëët.

¹⁹Omëëya, kär kwöri mou coollu ki dëëtu, 'ba wiiu cer Jwøk kanyo wëëre. Kiper ogöörö, ni «Kö Wuuö Jwøki, ni ‹Cool kwöri beeye mara, ni beeye aani noo cool ge.› »

²⁰'Ba «Ni näk nyimännï ree da käc, caamï. 'Ba ni näk mo onäk riewi, mooc eni ki gïn maadhe. Kiper noo tïïyï manøgø, ï kïtha cuk mo oäpö wïïe.»

²¹Kärï bööt raayi, 'ba raay wär böötï ki gïno beer.