Read anuak Röm 14 Bible Online

Röm 14 - anuak bible

Röm 14

¹'Ba ŋat mo ŋäädhe mare thiinh wär pänhnhu, ni paa kiper nou pïëmu ki gïr gïïa caare.

²Ŋat mør wø ŋäädhö ni eni doo cämö ki teeŋ caammi bëët jaak, ni ö ŋat mo ŋäädhe mare thiinh ni caam omär keerge.

³'Ba ŋat wø cämö ki teeŋ caammi bëët, kär ŋat wø ba cämö jøøŋŋe, ni ö ŋat wø ba cämö ni ba jääl ŋat wø cämö. Kiper eno nø pänh Jwøki.

⁴?Aŋø, ïïna ŋa ni jääl ŋat tïïc mar ŋat mør en? Beeye kwääye noo ŋøl mare piny nee cuŋŋö wala eno pädhö. 'Ba eno wëëk man cuŋŋe, kiper løny jï Wuuö ki man wëëk gø cuŋŋö.

⁵Ŋat mør cäŋ mør wø caare caarø ni beerra eni ki cäŋ maya. Ni ö ŋat mørri ni caar cääŋŋe ni röömi bëët. 'Ba wär ŋäc ŋati man nø ki cwïnye døøc.

⁶Ŋat wø gwøk cäŋ, wø gwøe ni eni wøøra Wuuö. Ni ŋat wø cämö ki teeŋ caammi bëët thuwø, wø cämö ni wøøra Wuuö, ni wø dwøga met ec jï Jwøk. 'Ba ŋat wø ba cämö ki teeŋ caammi bëët, wø poot wøøra Wuuö, ni dwøga met ec jï Jwøk.

⁷Kiper bäŋ dhaanhø dïïø mo bëënna ree keere, ni bäŋ dhaanhø dïïø mo thøwe mare keere.

⁸Ni näk mo ø kwøw, ø kwøwa jï Wuuö, 'ba ni näk mo ø thøw, ø thøwa jï Wuuö. Kiper manøgønø, ni näk mo ø kwøw wala ø thøw, øøna mo Wuuö.

⁹Ni beeye na thøw Krictø kipere ni cäŋ kwøw, kiper nee tïme na Kwääy jøøa thøw ki moa kwøw.

¹⁰?Aŋø ni jäälï cöögu? ?Wala ïïni, aŋø ni jøøŋŋï cöögu? Kiper ø cuŋŋö nyïm thunh løøk mar Jwøk karøbëët.

¹¹Kiper ogöörö, ni «Wuuö Jwøk aköö, ni ‹Kaawat man kwøa en, cøŋŋi bëët okëël piny nyïma, ni ö lëëpi bëët ni pwøcge aani na Jwøk.› »

¹²Kiper ŋati man nø dïïø opëëny Jwøki kiper mare.

¹³Kiper manøgønø, kär dëëtø jällø këët, 'ba beerra man caarø wïthø ni ba kïthø jöör cöögø ki gïn mo cwanynya tiel wala dïdëët.

¹⁴'Ba ŋääa ki cwïnya døøc ki nyeŋ Kwäärö ma Jecu ni bäŋ gïrpiny mo ba waany e keere, 'ba wø tïmö jï ŋat wø caar gø ni ba waany.

¹⁵'Ba ni näk cöögu oraany gïn wø camï, ï ba caath jöör mëër këët. Kär gïn wø camï wëëk raany ŋata thøw Krictø kipere.

¹⁶Kiper manøgønø, kär gïno beer jïrï wëëk carø ni gïn mo raac.

¹⁷Kiper buc Jwøk paa per cam ki maath, 'ba beeye bëëtö mo beer, ki bëët-mëër, ki met ec ki ri Jwïëc Jwøk na en kur keere.

¹⁸Ni ŋat wø tïny Krictø na enønø, døøya yi Jwøk mo met, ni ŋäyi ya jiyi ni beer.

¹⁹Kiper manøgønø, beerra man løpø køør gïn wø käl bëët-mëër nøø tëënnø karøbëët.

²⁰Kär tïï Jwøk raanynyï kiper cam. Jammi bëët beyø møn, 'ba wø raaca jï ŋat wø wëëk jø møøk pädhö ki køør gïn wø came.

²¹Wøp døc, ni ba cämï ki rïŋö wala maath køøŋ nyïïomøki, wala tïïc gïn mør jaak mo wëëga cöögu cwaany tiere.

²²'Ba ŋäädhe marï wiiï yïthakiyu ki Jwøk. Gwïëth en jï ŋat wø bäŋ gïn jääl dëëre kiper gø kiper gïn wø jïëe.

²³'Ba ŋat wø tääö di jäälö ni näk mo eni cämö, kiper eni bäŋ wø tïïö ka køør ŋäädhe. Kiper gïn wø tïïc ni ba tïïc ka køør ŋäädhe, gïnöca beeye raay.