Read anuak Röm 3 Bible Online

Röm 3 - anuak bible

Röm 3

¹?'Ba ni näk enøgønø, agïnaŋø nø ni beer jï jø Juuth ni kaala jø møøk? ?Wala agïnaŋø na duu daŋŋi?

²Oduunnö møn ki yïth luup bëët. Mana dïkwøŋ beeye ni jø Juuth luup moa caan Jwøki awëëk geni.

³?Agïnaŋø nø, këël na tïm jø møøki dïge ni ba maar jïëy, bëëtö marge ni ge ba jïëy, Jwøk ni wø ŋääth dee tïïö ni ba ŋääth?

⁴Ba doo løny. Jootu joodø, ni Jwøk poot bëëdö kare na adïëri këël jiy bëët doo tïmö ni ge ba maar ŋääth, kaawat mana gööri, ni «Kiper manøgønø, luummï na caanï beeye adïëri, ni tïm marï na kare ki køør luummï noo ŋølï.»

⁵?'Ba ni näk rääö marø beeye ni wø nyooth gø ni ŋøl luup mar Jwøk beeye adïëri, agïnaŋø nø noo caanø? ?Aŋø, ø doo köö ni mar Jwøk raac kany wø wëëre ki øøni? (Man caana en, caana kaawat man wø caan dhaanhe jaak.)

⁶'Ba doo løny. ?Onää enøgønø, Jwøk luup piny a dee gø ŋølø nidïï?

⁷?'Ba ni näk tööt mara beeye wø døøc adïëri mar Jwøk mo nëënö ni ree da ajiem, aŋø ni pooda ni aano jäälö na ŋat raay en?

⁸?Na aŋø nø ni ba tïïø ki raay nee gïïa beyø öge? keda man wø caan jø møøki ni ge kïtha luubö bäätwa, ni beeye gïn wø caanwa. 'Ba ajäla marge orøm dëëtge.

⁹?A mana ŋø nø? ?Aŋø, øøni na jø Juuth theemma marø ki jø møga? Patha eni bäre bäre. Kiper yaa nø caan, ni jiy bëët teek raay ena bäätge, këël jø Juuth ki jøw mo patha jø Juuth bëët.

¹⁰Kaawat mana gööri, ni «Bäŋ dhaanhø aciel mo mare beer. Bäŋgø, këël doo naa aciel.

¹¹Bäŋ ŋat mo kwany tier luubö, ni bäŋ ŋat mo mar Jwøk ee cayø.

¹²Geno gaa wøk bëët, ni tïmge ni ge reyø bëët. Ni bäŋgø mo tïïö ki gïn mo beer, këël dhaanhø aciel.»

¹³«Lwör moge atïmö keda bwörö mo ojabø, ni ge cara cwøk ki lëëpge.» «Ni cïmmi mo thwöre ena dhøkge.»

¹⁴«Ni dhøkge bëënna ajaany keere ki luup mo reyø.»

¹⁵«Ni tietge piew ki køny rem jiy piny.

¹⁶Ni nuta ränynyö ki kïmmö uutjïëthe mo wø cørge yïthge.

¹⁷Ni jöör bëët-mëër kucge.»

¹⁸«Ni Jwøk ba lwäärge bäre bäre.»

¹⁹'Ba ŋääø ni gïn mo ocaan ciik Jwøki wø cäänna jøøa bëën ciik Jwøk, kiper nee bäŋe dhaanhø mo jaal dhee këët, nee jø piny bäre ba maarge köö ni mana many Jwøki kucge.

²⁰Kiper bäŋ dhaanhø mo jïëc ni mare beer nyïm Jwøk ki køør tïïe moa en ri ciik Jwøk. Kiper beeye ciik Jwøk ni wø ö dhaanhe wø ŋäc raay ki køøre.

²¹'Ba kawaane bëënynyö man wø cïp Jwøki onyoodhø ni ciik Jwøk tøør ree, ni beeye na cään ciik Jwøki ki mo nyïïkuk Jwøk kipere,

²²ni beeye bëënynyö man wø cïp Jwøki man wø joot ki ri ŋäädhe ni en ri Jecu Krictø, ni beeye kiper jiy bëët mo wø jïëy ni ŋääthge. Kiper jiy röömi bëët.

²³'Ba kiper mana tïm jiyi bëët no obääyö ni geno kääŋö ka ajiem Jwøk,

²⁴gena jïëc Jwøki ni marge beer ki met yie na muuy mo di cïbö jaak, ki køør wïïdö mana ö Krictø Jecu na wïïl geni wøk,

²⁵ŋata kïth Jwøki nyïm no olämi ki køør remme, na doo jïëö ki køør ŋäädhe. Manøgø atïïc kiper nee ŋøl luup mar Jwøk na näk adïëri nyoodhe, kiper na kwøŋ bëëdö ni cwïnye ee cïp piny ni käre raay moa dïkwøŋ kwaan.

²⁶Ni eni nyootha gø ennø ni eni ki dëëre ŋøl luup mare beeye adïëri, ni ŋat wø ŋääth Jecu wø jïëe jïëö ni mare beer nyïme.

²⁷?Ni näk ma enøgønø, gïna døø töödö kipere, age eni? Bäŋgø. ?A køør ŋø? ?Køør tïïe? Patha eni. 'Ba beeye ki køør ŋäädhe.

²⁸Kiper wa wø köö, ni dhaanhø wø jïëc ni mare beer ka køør ŋäädhe, ni tïïe mo ciik Jwøk tøør ree.

²⁹?Wala Jwøk a Jwø jø Juuth keerge, ni patha Jwø juurre thuwø? Adïëri møn, ena Jwø juurre thuwø.

³⁰Kiper Jwøk aciel. Ni eni jøøa näk odaŋø ojïëe ni marge beer ki køør ŋäädhe marge, ni jïëc jøøa näk patha odaŋø ni marge beer kiper ŋäädhe marge.

³¹?Kiper manøgønø, ø weta ciik Jwøk wøk ki køør ŋäädhe man? Ba doo løny. Ø poot gwøga ciik Jwøk.