Read anuak Röm 5 Bible Online

Röm 5 - anuak bible

Röm 5

¹'Ba kawaane na tïme ni øøno jïëö ni marø beer ki køør ŋäädhe, yïthakiyø ki Jwøk ajïtö ki bëët-mëër ki køør Kwääyø ma Jecu Krictø.

²Ni beeye ki køøre na jïtø ki karø ri met ec man ni cuŋŋø ree en, ni kanynyø kiper mana ŋäädhø noo nywaaø ajiem mar Jwøk.

³'Ba paa manøgø keere, 'ba ø kanynyø thuwø yïth gïï ni leth ni jwørø en, kiper mana ŋääø gø ni gïï wø leth wø jwør dhaanhe wø käla tëënnö,

⁴ni ö tëënnö ni käl bëëtö mo beer, ni ö bëëtö mo beer ni käl ŋäädhe.

⁵'Ba ŋäädhe cwïnynyø bäŋ wø wëëk pädhö. Kiper mëëc Jwøk okïth cwïnynyø ni päl ki køør Jwïëc Jwøk na en kur keere na cïp jïïø.

⁶Kanya poodø ni røgø ba maarø køny, Krictø athuunh jø raay ki kanya wäŋŋi ni kare.

⁷Kiper teek døc jï dhaanhø ki man thøøe kiper ŋat mør mo bëëte beer, 'ba ŋääø ni kanymør dhaanhø cwïnye dee maaø kiper ŋat mør ma wøp døc këël doo cööpa ri thøø.

⁸'Ba Jwøk mëëye ee nyoodhø jïïø, kiper kanya poodø ni øøna jø raay beeye kanya thøw Krictø kiperø.

⁹?'Ba kawaane na tïme ni øøno jïëö ni marø beer ki køør remme, a teeŋ pïëm mo nyïëdi noo piem øøni ki wëëc Jwøk?

¹⁰Kiper ni näk kanya poodø ni øøna jø män, øøno cäŋ dwøk kanya ciel ki Jwøk ki køør thøw Wääde, ?a kawaane nø, na cäŋø døø kanya ciel, a teeŋ pïëm mo nyïëdi noo piem øøni ki gø ki køør kwøwe?

¹¹'Ba patha manøgø keere, 'ba ø kanynyø thuwø ki nyeŋ Jwøk ki køør Kwääyø ma Jecu Krictø, ŋata joodø døøn kanya ciel ki køøre.

¹²'Ba raay atägö bäät piny ki køør dhaanhø aciel, ni ö thøøe ni ööe ki køør raay, ni tïm thøøe ni nyaa bäät jiy bëët, kiper mana näk jiy obääyö bëët.

¹³Kiper raay nut møn piny cøøn kanya poode ni ciik Jwøk poot kär cïbö, 'ba raay ba cwøl ni bääyö ki kany mo bäŋ ciik yie.

¹⁴'Ba thøø adïmö ra Adam këël mana këët ri Modhe, këël bäät jøøa näk bääyö marge ba caal dhal luubö mana dhal Adammi, eni na caal ŋata doo öö.

¹⁵'Ba muuy mana cïp ba caal luumma dhal. Kiper ni näk jiy mo thööth othøw ki køør luubö mana dhal dhaanhe acielli, a teeŋ met yi Jwøk mo nyïëdi ki muuy mano cïp ki met ec noo pälli jï jiy mo thööth ki ri met yi ŋata näk aciel enøgø na näk Jecu Krictø!

¹⁶Ni muuy mana cïp ba caal gïna duu luumma baac dhaanhe acielli. Kiper mana ŋøl piny na öö ki køør luubö mana näk aciel na dhal, akännö ka ajäl thøø. 'Ba muuy mana cïp na öö ki køør luup moa thööth na dhal, akännö ki jöö man ŋun jiy ki gø.

¹⁷'Ba ni näk thøø odïmö ki køør luumma näk aciel na dhal dhaanhe acielli, a teeŋ kwøw mo nyïëdi noo kwøw jø wø ci met yi Jwøki mana päl jïge ki bëënynyö mana cïp ki køør ŋatøgø na aciel enø, na näk Jecu Krictø!

¹⁸Kiper beeye gïna beer na tïïc dhaanhe acielli na käl ŋunnö ki kwøw kiper jiy bëët, kaawat mana ö luumma näk aciel na dhal dhaanhe acielli na käl ajäla bäät jiy bëët.

¹⁹Ni beeye leŋ luubö mar dhaanhø aciel noo tïïc jiy mo thööth ni marge beer, kaawat mana ö bäŋ leŋ luubö mar dhaanhø aciel na tïïc jiy mo thööth na jø raay.

²⁰'Ba ciik Jwøk aci yie thuwø kiper nee rääc luumma dhal nyoodhe ni päl. 'Ba kanya ö raayi na pälle, met ec opällö ni kadha eni,

²¹kiper nee met yi Jwøk tïme ni dwøŋŋa eni ki køør bëënynyö mano cööp ri kwøw mana näk adïëri mo bäŋ cuŋŋe ki køør Jecu Krictø na näk Kwääyø, kaawat mana ö raayi na dïïm jiy dïkwøŋ na känne ki thøø.