Read anuak Röm 7 Bible Online

Röm 7 - anuak bible

Röm 7

¹?Nyïïmera, kuyu ni ciik Jwøk wø ena bäät dhaanhø kany wø poot dhaanhe ni kwøw keere? Kiper a cäänö ka jøø ni ŋäc ciik Jwøk enø.

²Kiper dhaagø mo onywømø wø bëënna cwøre kany wø poot cwøre ni kwøw ki køør mana caan ciiki. 'Ba ni näk cwøre othøw, eno pädö ri ciik manøgø.

³Kiper manøgønø, ni näk mo eni cøø ni bëëde ki dïcwøø mør ni cwøre poot kwøw, eni di cwølø ni kääbi. 'Ba ni näk mo cwøre othøw, eno pädö ri gïna caan ciiki. Køøre ni näk mo eni nywøm dïcwøø mørri nywømø, mare patha käp.

⁴Kaawat manøgø thuwø, nyïïmera, uuna nø thøw ni ciik Jwøk jïre bäŋ teek bäätu këët ki køør dëër Krictø, nou tïmu ni uuna moe, eni na tïŋ maal ki yi thøø, kiper nøø tïïø ki gïï mo beyø jï Jwøk.

⁵Kanya poodø ni ø bëënna moa wara cac dëëlli, gïïa reyø na wara nieŋø køørge, gena jiec ciik Jwøki, ni tïïge thäk dëëtø ni känge ki gïï mo duua thøø.

⁶'Ba kawaane øøna dööŋ wøk ri ciik Jwøk, ni thøø jï gïna kwøŋ øøni mak ki teek, ni tïme ni ø ba tïny luubö mana kwøŋ göör na näk oruuö, 'ba ø tïnynya kwøw mana nyään na en ri Jwïëc Jwøk.

⁷?'Ba agïnaŋø noo caanø nø? ?Ø doo köö, ni ciik Jwøk beeye raay? Ba doo løny. Onää bäŋ ciik Jwøk, raay ba daa ŋääö. Ni rääc par gïr ŋat mør ba daa ŋääö, onää kär caan ciik Jwøki, ni «Kärï pädö.»

⁸'Ba raay ajïtö ki jöö ri mana cem Jwøki, ni kïth cwïnya ki teeŋ par gïï mo thööth døc. Kiper kanya bäŋe ya ciik Jwøk, raay bëëdö no othøw.

⁹Kiper dïkwøŋ kanya bëëda ni bäŋ ciik Jwøk mo ŋääa, a bëëdö naa kwøw. 'Ba kanya ö mana cem Jwøki, raay acär, ni thøøa.

¹⁰Ni ö cemøgø kiree na doo cïpö ki kwøw ni tïme ni käla thøø dëëra.

¹¹Kiper raay ajïtö ki jöö ri mana cem Jwøki ni cøøkge aani ni 'näkge aani ki gø.

¹²Kiper manøgønø, ciik Jwøk ena kur keere na mar Jwøk, ni mana cem Jwøki ena kur keere ni beer na wøp.

¹³?Aŋø, beeye gïna beer nø, na käl thøø dëëra? Ba doo løny. Beege raay na tïïc thøø dëëra ki køør gïna beer, kiper nee raay nyooth ni beeye raay møn, nee rääcge joot ni reyø døc ki køør mana cem.

¹⁴'Ba ŋääø ni ciik Jwøk beeye mar Jwøk. 'Ba aani a ena kur piny, ni aano ŋeeø na laŋŋø jï raay.

¹⁵Ni gïna tïïa gïï kipere kuua. Kiper a bäŋ wø tïïc gïna daa tïïö, 'ba beeye gïna mäna ki gø kiree ni wø tïïa.

¹⁶'Ba ni näk maa tïïya gïna ba daa tïïö, aano jïëy ni ciik Jwøk beer.

¹⁷Kiper manøgønø, patha aani këët ni wø tïïc gø, 'ba beeye raay ni wø bëëdö cwïnya.

¹⁸Kiper ŋääa ni bäŋ gïn mo beer jïra mo en dëëra. Løny jïra ki man caya gïn mo beer, 'ba ba løny jïra ki man tïïa gø.

¹⁹Kiper a bäŋ wø tïïc gïna beer na daa manynyø. 'Ba beeye raay na ba daa manynyø ni wø tïïa.

²⁰'Ba ni näk maa tïïya gïna ba daa manynyø, patha aani këët ni wø tïïc gø, 'ba beeye raay ni wø bëëdö cwïnya.

²¹'Ba kawaane nø, a jooda møn, ni kany wø manynya man tïïa ki gïn mo beer, raay karge cään.

²²Kiper yia met ki ciik Jwøk ki yi cwïnya kiree,

²³'ba da gïn mør mo wø jooda joodø thäk dëëra mo këëdö ki luubö mana en wïïa, ni tïïya aani ni aana laŋ raay mo otwöö, ni bëëdö thäk dëëra.

²⁴Wui, a na dhaanhø mo oränynyö en! ?Aŋa noo piem aani cer dëëri ni bëën thøø en?

²⁵'Ba pwøc en jï Jwøk ki køør Jecu Krictø na näk Kwääyø. 'Ba kawaane nø, a tïnynya ciik Jwøk ki luumma en wïïa, 'ba ki rïŋ dëëra a tïnynya mo raay.