Read anuak 1 Körin 10 Bible Online

1 Körin 10 - anuak bible

1 Körin 10

¹Nyïïmera, a manynya uuni man ŋäyu gø, ni kwäyø akwøŋ en tier pöölö, ni ŋølge naama dwøŋ bëët,

²ni lwøk geni bëët na nyuudhi ri Modhe ni ge ena yi pöölö ki yi naam.

³Ni camge cam mar Jwøk bëët,

⁴ni maathge maath mar Jwøk bëët. Kiper ge mätha ri Kïn Jwøk na cäädhö køørge. Ni kïnnögø beeye Krictø.

⁵'Ba këël na näk enøgønø, thööthge yi Jwøk kär mïnnö ki ge; ni ö geni ni dïïr wïthge dï paap.

⁶'Ba kawaane gïïögø beege nyuuthe kiperø, ni köömma øøni nøø ba manynyø raay kaawat mana tïïcge.

⁷Käru tïmö nou lämö ki gïï wø lam kaawat mana tïïc jø møøki dïge. Kaawat mana gööri, ni «Jøøgø gena pï piny ni cämge ni mäthge, ni öge maal baŋ meeŋ.»

⁸'Ba øøni, ø ba doo tïmö ni øøna jø luuy kaawat mana tïïc jø møøki dïge, na ö jiyi ma kume ma pïërariiø kurdäk ni thøwge ki dïcäŋ aciel.

⁹Øøni Wuuö Jwøk ba døø päänynyö, keda mana tïïc jø møøki dïge, na nääŋŋi ya thwöre.

¹⁰Ni ba dwaallø, keda mana tïïc jø møøki dïge, na raanynyi ya dïräänyi.

¹¹'Ba gïïögø atägö dëëtge na nyuuthe mo köömma geni, ni gööri piny kiper nee ø pwönyge, ø ni bëëdö ni karø cään en ki kanyo cuŋ pinynyi yie.

¹²Kiper manøgønø, ŋat mo ee caarø ni eni cuŋŋa kare wär ree gwøe, kiper ni näk mo ree ba gwøe, kanymør pädhö.

¹³'Ba bäŋ päänynyö mo tägi dëëtu mo patha man wø tägi dëër dhaanhø. 'Ba Jwøk dwøre ba dak, nou ba wëëk päänynyö ki päänynyö mo kaala teek maru. 'Ba kanyo pääny uuni, uuno mooe ki jöö man bøthu ki gø thuwø, kiper nee maar lønyø jïïu ki man jïënynyu gø.

¹⁴Kiper manøgønø, u no omëëya, bëëdu ni karu bäär ki wøør gïï wø lam.

¹⁵A cäänö ka uuni ni uuna jiy mo wïthu leer. Uuni ki dëëtu, ŋølu luumma caana piny.

¹⁶?Aŋø, athöönh gwïëth man wø dwøgø pwøc kipere, paa dwätö eni ri rem Krictø? ?A møø man wø pøtø, paa dwätö eni dëër Krictø?

¹⁷'Ba kiper na näk beeye møø aciel, ø na thööth, øøna tïmö na dëël aciel, kiper øøni bëët, ø wø nywaaga møgøgø na aciel enø.

¹⁸Neennu tïï jø Icriel mø. ?Aŋø, jø wø cam olämme mo wø cïp, ge ba jïëc gïn wø cïp olämme bääte manøgø thuwø?

¹⁹?Agïnaŋø ni caana? ?Kööa no olämme mo wø ŋaal mo wø cïp jï gïï wø lam, a gïrpiny? ?Wala gïn wø lam a gïrpiny?

²⁰Patha eni. Man køba beeye en, olämme mo wø cïp jø wø kuc Jwøk, ge mooya anäge ni patha Jwøk. Aani, a ba many uuni nou nywääu ka anäge.

²¹Ba doo løny jïïu ki man mäthu ya athöönh Kwäärö, ki man mäthu ya athöönh anäge. Ni ba løny jïïu ki man cammu cam mar Kwäärö ki cam mar anäge.

²²?Kwäärö døø wëëga këëyö? ?Aŋø, teeka øøni ki eni?

²³Jammi bëët doo maara tïïc, 'ba jammi bëët bäŋ wø kunyö. Jammi bëët doo maara tïïc, 'ba paa jammi bëët ni wø wëëk ø tëënnö.

²⁴Kär dee ŋat ŋäc dëëre keere, 'ba watge wär ŋääe thuwø.

²⁵Cammu gïn mo oŋeeø kar ŋïëw rïŋö nou ba pëëö kiper gïno en cwïnynyu,

²⁶kiper «Piny bäre ki jammi bëët moa en yie beeye mo Wuuö Jwøk.»

²⁷'Ba ni näk mou cwøl ŋat mo kär jïëy cwølø baŋ cam ni yïthu met ki man cou, gïno cïp nyïmmu, wär cammu ni bäŋ pïëc kiper gïno en cwïnynyu.

²⁸'Ba ni näk da ŋat mo köö ki uuni, ni «Gïn en acïp no olämi,» kanyøgø nø kär nou cama gø kiper mana caani ya ŋatøgø jïïu, wala kiper mana en cwïny.

²⁹Naa ba wäŋ cwïnynyu, 'ba beeye gïno en cwïnye. ?Aperŋø na ö ŋat mørri na dee cään aani ki mana daa tïïö ki mana daa ba tïïö kiper mana en cwïnye?

³⁰?'Ba ni näk maa cämö ni dwøga met ec baŋ Jwøk, aŋø na di nyeŋŋa waa kiper gïna dwøga met ec kipere?

³¹Kiper manøgønø, ni näk mou cämö wala u mädhö, wala gïn wäro tïïyu jaak, wäru tïïyu bëët nou jiema Jwøk.

³²Kär cwïny jø Juuth, ki cwïny jø mo patha jø Juuth, wala cwïny jø acooŋ Jwøk, wëëgu ränynyö,

³³keda mara ni manynya man døøya yïth jiy mo met ki yïth jammi bëët mo wø tïïa, naa ba caar mara a keera. 'Ba a caara gïr jiy mo thööth, nee ge piem.