Read anuak 1 Körin 12 Bible Online

1 Körin 12 - anuak bible

1 Körin 12

¹'Ba ennø, nyïïmera, a ba many man bëëdu ni muuce mo Jwïëc Jwøk kuyu.

²Kiper ŋäyu ni kanya bëëdu ni luum Jwøk kuyu, wïthu amaaŋŋi ki uutjïëthe møøk ma teeŋi, ni wøørru gïï wø lam ni wø ba cäänö.

³Kiper manøgønø, a manynya man ŋäyu gø, ni bäŋ dhaanhø mo cäänö ki ri Jwïëc Jwøk mo köö, ni «Jecu cien.» Ni bäŋ dhaanhø mo maara köö, ni «Jecu beeye Kwäärö,» ni näk ba caan ka ri Jwïëc Jwøk.

⁴'Ba kawaane da muuce ma teeŋi, 'ba poot na Jwïëy aciel ni wø cïp geni.

⁵Ni da jïëth køny ma teeŋi, 'ba poot na Wuuö aciel.

⁶Ni da jïëth tïïe ma teeŋi, 'ba poot na Jwøk aciel, ŋat wø cïp ge bëët jï ŋati man nø.

⁷Ni ŋati man nø onyuunh Jwïëc Jwøki ki muuy, kiper jiy bëët nee bëënyge.

⁸Ŋat mør wø wëëga cäänö mar leec wïc ki køør Jwïëc Jwøk. 'Ba ŋat mør wø wëëga ŋäc jammi ni poot na køør Jwïëyögø.

⁹'Ba ŋat mør wø wëëk Jwïëyögø ŋäädhe. Ni ö ŋat mørri ni wëëgi muuy mar riem täwe, ni poot na Jwïëyögø na aciel enø.

¹⁰'Ba ŋat mør wø wëëga tïïc tïïe mo rëëma ec. Ni ö ŋat mørri ni wëëgi køp dwør Jwøk. 'Ba ŋat mør wø wëëga teek ki man ŋec juu. Ni ö ŋat mørri ni wëëgi caan teeŋ dhøgi møøk. 'Ba ŋat mør wø wëëga teek ki man dwøk tiet luup dhøgi ma teeŋi.

¹¹'Ba moøgø bëët ööi ka køør Jwïëyögø na aciel enø, ŋat wø pääŋ japøgø jï ŋati man nø, kaawat man wø manynye.

¹²'Ba kaawat man bëët dëëlli na aciel en ni dëëre da thäŋi mo thööth; ni poot na dëël aciel, këël na bëët thäŋi moe ni thööth, Krictø thuwø poot na enøgønø.

¹³Kiper øøna lwøk bëët na nyuudhi ki ri Jwïëy aciel nøø tïmø na dëël aciel, nee jø Juuth wala jø mo patha jø Juuth, ki laaŋe wala jøøa bëëdö ki wïthge. Ni wëëk ø maath bëët ki ri Jwïëy aciel.

¹⁴Kiper dëël paa ocwääö na thääŋö aciel, 'ba ree da thäŋi mo thööth.

¹⁵'Ba ni näk mo tielø köö, na «A ba en ri dëël kiper na näk maa patha cenø,» ba doo tïïc gïnögø ni ba en ri dëël man thiinh en.

¹⁶'Ba ni näk mo ïth köö, na «A ba en ri dëël, kiper na näk maa patha waŋ,» ba doo tïïc gïnögø ni ba en ri dëël man thiinh en.

¹⁷?Onää dëël ki kare bäre beeye waŋ, luup a dee gø wïnynyö ki kaa? ?'Ba onää dëël ki kare bäre beeye ïth, a dee ŋwääö ki kaa?

¹⁸'Ba kaawat man bëëde en, Jwøk thäŋi bëët ee kïthö na kwörge ri dëël. Ni thääŋö man nø ee kïth kanya manynye.

¹⁹?Onää dëël a thääŋö aciel bäre, dëël a dee en kaa?

²⁰'Ba kaawat man bëëde en, da thäŋi mo thööth, 'ba poot na dëël aciel.

²¹Kiper waŋ ba doo maara köö jï cenø, ni «Bäŋ gïn mo manynya baŋï.» Wala wïc thuwø ba doo köö jï tiel, ni «Bäŋ gïn mo manynya baŋu.»

²²'Ba atïmö ni thäŋi mo dëël moa nëënö ni keda jägö, atïmö ni letha perge.

²³Ni ö thäŋi mo dëël mo wø tagi, ni tïmge ni ø wøøra ge døc. Ni tïm thäk dëëtø moa ba mïërö ki neen, ni ø gwøga ge døc.

²⁴Ni bäŋe gïn mo tïïø kiper thäk dëëtø moa mïërö ki neen. 'Ba Jwøk dëël atïïe ni cïpa ajiem mana dwøŋŋa eni jï thääŋ dëël mana näk otaaø,

²⁵kiper nee bäŋe apääk ri dëël bäre, ni tïm thäŋi bëët ni käära rege ki dwøl aciel.

²⁶'Ba ni näk thääŋö aciel da gïn mo ee jwørø, wø jwøra ge bëët na aciel. 'Ba ni näk thääŋö aciel owøørø, wø mïnna yïthge bëët na aciel.

²⁷'Ba kawaane, uuna dëër Krictø, ni ŋati man nø ena thääŋö dëër gø.

²⁸'Ba Jwøk aröönyö ki jiy ya acooŋ Jwøk. Dïkwøŋ beege nyïïatwieli, rietge beege nyïïkuk Jwøk, dääge beege dïpööye, køøre beege jø wø tïïc gïï mo rëëma ec, køøre ki muuy mar riem täwe, ki dïkunynye, ki dïnyuuthe, ki jøøa wëëk teek ki man cäänge ki teeŋ dhøgi møøk.

²⁹?Aŋø, gena nyïïatwieli bëët? ?Gena nyïïkuk Jwøk bëët? ?Gena dïpööye bëët? ?Ge wø tïïya tïï gïï mo rëëma ec bëët?

³⁰?Muuy mar riem täwe ena jïge bëët? ?Ge wø cäänö ki teeŋ dhøgi møøk bëët? ?Ge wø dwögö ki teeŋ dhøgi møøk bëët? Jïre bäär.

³¹'Ba uuni, beerra man manynyu muuce moa døøŋŋø geni ki cwïnynyu bäre. 'Ba u poot nyuunhnha nyuunhnhö ki jöö mør mo beerra eni.