Read anuak 1 Körin 14 Bible Online

1 Körin 14 - anuak bible

1 Körin 14

¹Këëllu wïthu køør mëër, ni manynyu muuce mo Jwïëc Jwøk døc, ni kadha man tïmu nou køpa dwør Jwøk røk.

²Kiper ŋat wø cäänö ki dhøk mør, ba cään jiy, 'ba cäänna Jwøk, kiper na bäŋe dhaanhø mo wïny mare, 'ba eni cara luup mo tietge okanø ki ri Jwïëc Jwøk.

³'Ba løøk maya, ŋat wø køp dwør Jwøk, cäänna jiy ni wëëga ge tëënnö, ni cøma cwïnyge, ni cøga geni.

⁴'Ba ŋat wø cäänö ki dhøk mør, wø wëëga dëëre tëënnö e keere. 'Ba ŋat wø køp dwør Jwøk wø wëëga acooŋ Jwøk tëënnö.

⁵A doo naa manynya man cäänu ki dhøgi møøk, u bëët, 'ba mana pere letha eni røk beeye ki man køpu dwør Jwøk. Kiper ŋat wø køp dwør Jwøk, wø dwøŋŋa eni ki ŋat wø cäänö ki dhøk mør, 'ba ŋat mo cäänö ki dhøk mør beer ki kany wø näk da dhaanhø mo dwøga luupe, kiper nee acooŋ Jwøk tëënne.

⁶?'Ba kawaane nyïïmera, ni näk maa ööa baŋu naa cäänö ka dhøgi møøk, naa ba muuny uuni ki gïn mo onyoodhø, wala gïn mo dou ŋääö, naa ba køp dwør Jwøk jïïu, wala pwöc, agïnaŋø noo kwanynyu baŋa?

⁷'Ba këëlla jap tuuk ni bäŋ jwïëy dëëtge en, teeŋ kaa opelø ki thoom, ni näk mo jwöŋi ni bäŋ dwøl mo met mo wïnyi, ?teeŋ duudöca a di ŋäc dhaanhe nidïï, wala ena duuda ŋø?

⁸?'Ba ni näk tuuŋ di koodhø ni dwøre ba ŋec, aŋa noo jek dëëre kiper leny?

⁹'Ba maru poot na enøgønø; ?ni näk mou cäänö ka dhøk mør mo ba wïnynyi, gïna caan oŋäyi ya dhaanhe nidïï? Kiper u tïmö nou cäänö yi jamø jaak.

¹⁰Yaa caarø ni da dhøgi ma teeŋi mo thööth dï piny man, ni bäŋe ya aciel mo bäŋ tiere.

¹¹'Ba ni näk dhøøca kuua, a tïmö ni aana jur jï ŋata cäänö, ni tïm ŋatøca na jur ki jïra.

¹²'Ba maru poot na enøgønø. 'Ba kiper mana tïmu ni cwïnynyu päl kiper nyuuthe mo Jwïëc Jwøk, putu cwïnynyu cïp ra acooŋ Jwøk nee tëënne.

¹³Kiper manøgø nø, ŋat wäro cäänö ki dhøk mør doo lämö kiper nee jïte ki teek ki man nyooth tier gø.

¹⁴Kiper ni näk maa lämö ki dhøk mør, beeye jwïëya wø lämö, 'ba bäŋ gïn jooda ki wïïa.

¹⁵?Agïnaŋø noo tïïa? Aano lämö ki jwïëya, ni läma ki wïïa thuwø. Ni wära duut ki jwïëya, ni wära ki wïïa thuwø.

¹⁶?Ni näk paa enøgønø, ni näk miï pwøya Jwøk ki jwïëyï, ŋat mo path okööe nidïï, ni «Enøgønø» ki køør met iï na dwøgï, ni gïïa carï kuue?

¹⁷Kiper kanymør met yiï iï dwøgø na wøp døøc, 'ba dhaanhø maya bäŋ gïn joode mo tëënne ki gø.

¹⁸'Ba Jwøk apwøa kiper na cääna ki dhøgi møøk naa kaala u bëët.

¹⁹'Ba këël na näk enøgønø, doo beerra eni jïra ki man cääna ki luup abïïc mo ŋääa ki wïïa ya acooŋ Jwøk kiper nee jø møga pwönynya, ki mana daa caan luup ma kume apaar ki dhøk mør.

²⁰'Ba, nyïïmera, kär acaara maru tïmö na acaac obwöre. Bëëdu ni uuno obwöre mo mar ki kur raay, ni tïmu nou døøŋŋø ki kur acaara.

²¹Kiper ogöörö yi Wëël Jwøk, ni Wuuö Jwøk aköö, ni «Beeye ki dhøk jiy mo path ki dhøk juurre noo cäänna jøøi ki gø. 'Ba këël ni näk ma enøgønø, mara ba wïnyge.»

²²Kiper manøgø nø, dhøgi møøk paa nyuudhi mo cïp kaper jøøa näk ojïëy, 'ba cïp kaper jøøa näk kär jïëy. Ni køp dwør Jwøk, paa kiper jøøa näk kär jïëy, 'ba beeye kiper jøøa näk ojïëy.

²³Kiper manøgø nø, ni näk ma acooŋ Jwøk bäre odwät kanya ciel, ni ö jø acooŋa bëët ni cäänge ki dhøgi møøk, ni ö jøøa pathi wala jiy mo patha ojïëy ni dunyge, ?aŋø, ge ba köö ni uuna bøøre?

²⁴'Ba ni näk mou køpa dwør Jwøk bëët, ni ö ŋat mo kär jïëy wala ŋat mo path ni dunynye, eni cwïnye opädhi ki raaye kiper mana caange bëët, ni ö gïna en cwïnye ni pëënynyi jøw bëëti,

²⁵ni ö gïïa en cwïnye ni ŋääi. 'Ba køøre nø, Jwøk owøøre ni täärnyïme ee këël piny, ni put gø caan, na «Adïëri møn, Jwøk ena dïïu.»

²⁶?'Ba agïnaŋø noo tïïø nø, nyïïmera? Kany wø dwätu kanya ciel, ni ŋat mør jïre da duut, ni dhaanhø mør jïre da pwöc, ni dhaanhø mør da gïn mo onyoodhø jïre, ni maya cäänö ka dhøk mør, wala da luubö mo di dwøgø, wär japøgø bëët tïïc nou wëëga acooŋ Jwøk tëënnö.

²⁷'Ba ni näk da ŋat mo cäänö ki dhøk mør, wär tïme na jiy ariiø keerge, wala adäk, ni bäŋe mør këët. Ni ŋati man nø dïge da kare mo cäänne yie. 'Ba wär dhaanhø aciel dwöge.

²⁸'Ba ni näk bäŋ ŋat mo dwögi, wär lïŋge bëët ya acooŋ Jwøk, ni tïm ŋati man nø ni cäänna dëëre keere ki Jwøk.

²⁹Wär nyïïkuk Jwøk ariiø wala adägö køpge dwør Jwøk, ni ö jiyi møga ni cekge ïthge ki gïïo caan.

³⁰'Ba ni näk da gïn mo onyoodhø jï dhaanhø mør mo opï piny, ŋata cäänö wär lïŋe.

³¹Kiper køp dwør Jwøk løny jïïu bëët no oceele oceele, kiper nee jiy bëët kwänyge ni cøm cwïnyge.

³²Kiper jwïëc nyïïkuk Jwøk leŋa dööt nyïïkuk Jwøk.

³³Kiper Jwøk paa Jwø wø kier wïc, 'ba beeye Jwø bëët-mëër.

³⁴'Ba mään doo bëëdö ni ge lïŋö yïth acook Jwøk bëët keda man wø tïïc yïth acooŋe bëët mo jø Jwøk. Kiper ge paa owëëk cäänö, 'ba ge doo bëëdö ni bäŋ dööti jïge, kaawat mana caani ya ciik Jwøki thuwø.

³⁵'Ba ni näk da gïn mo manyge nee ŋäcge, wär cwøwge pëënyge mïëri. Kiper beeye gïr laac wïc ki man cään dhaage ya acooŋ Jwøk.

³⁶?Uuna kööu nidïï? ?Aŋø, beeye uuni na täk luum Jwøki dïïu na bëëde, wala beeye uuni keeru na pïïc luummögø baŋu?

³⁷'Ba ni näk da ŋat mo dëëre ee caarø ni ena nyikuŋ Jwøk, wala jïre da muuy mar Jwïëc Jwøk, beerra man jïëc gïn ni gööra jïïu en, na gïn mo cema Wuue.

³⁸'Ba ni näk da ŋat mo gïnögø ba jïëe, eni kär jïëc thuwø.

³⁹Kiper manøgø nø, nyïïmera, manynyu man køpu dwør Jwøk ki cwïnynyu bäre, ni ba mänu cäänö ki dhøgi møøk.

⁴⁰'Ba jammi bëët doo tïïö ni mïërö na karge.