Read anuak 1 Körin 15 Bible Online

1 Körin 15 - anuak bible

1 Körin 15

¹'Ba kawaane, nyïïmera, a para wïthu ki luumma nyään na met na køba jïïu, na jïëyu, ni cuŋŋu ree,

²ni beeye mana piem uuni ki køøre, ni näk mo you maa ni teek. 'Ba ni näk ba magu ni teek, ŋäädhe maru tïmö ni bäŋ tiere.

³'Ba mana pere letha eni beeye na cïba jïïu, ni beeye mana wëëk aani thuwø, ni Krictø athuunh raayø, kaawat mana no ogöörö yïth Weet Jwøk,

⁴ni koonyi, ni tïŋi maal ri dää nïne, kaawat mana no ogöörö yïth Weet Jwøk,

⁵ni nyooth ree jï Ciipa.[1] Køøre dëëre anyuth bääŋi na näk apaar kurriiø.

⁶Køør manøgø, dëëre anyuth nyïïmëëe mo kaala dïpe abïïyö ni ge ena kanya ciel, jøø ni thööthge poot kwøw en, këël na thøø møøki dïge.

⁷'Ba køøre dëëre anyuth Jeemeth. Køør manøgø, dëëre anyuth nyïïatwieli bëët.

⁸'Ba køør moøgø bëët nø, dëëre anyuth aani thuwø, a na näk caala dhaanhø mo obwön wøk.

⁹Kiper thiinhnha kara døc dï nyïïatwieli, naa patha orømø ki man cwøl aani ni nyïïatwiel, kiper aana gëëmö ka acooŋ Jwøk.

¹⁰'Ba beeye met ec mar Jwøk na tïïc aani ni aana dhaanhø en. 'Ba met yie na nyuth aani paa oballe jaak. 'Ba atïmö ni tïïö aani døc naa kaala geni. 'Ba paa aani, 'ba beeye met yi Jwøk ni wø tïïö dëëra.

¹¹Kiper manøgønø, nee aani wala geni, wa wø pöö, ni ö uuni ni jïëyu.

¹²?'Ba kawaane ni näk Krictø okøbø jïïu no otïŋ maal ki yi thøø, jø møøk dïïu a dege köö nidïï ni bäŋ duun wøk ki yi thøø?

¹³'Ba ni näk bäŋ duun wøk ki yi thøø nø, Krictø kär tïŋ maal.

¹⁴'Ba ni näk Krictø kär tïŋ maal nø, luupa køpwa beeye oballe jaak, ni ŋäädhe maru oballe thuwø.

¹⁵Ni näk beeye adïëri møn ni jø wø thøw bäŋ wø tïŋ maal, waana tïmö ni wa caana tööt jaak bäät Jwøk, kiper mana caanwa gïr Jwøk, ni eni Krictø atïŋ maal ki yi thøø, ni eni kär tïŋ maal.

¹⁶Kiper ni näk jø wø thøw bäŋ wø tïŋ maal nø, Krictø kär tïŋ maal.

¹⁷'Ba ni näk Krictø kär tïŋ maal, ŋäädhe maru bäŋ tiere, nou poot ena yïth raayu.

¹⁸Ni ö jøøgø thuwø na thøw ni ena kur Krictø ni ränyge.

¹⁹'Ba ni näk øøni ni en dëër Krictø, ø ŋäätha kwøw man en keere, øøna jiy mo cwïny doo pädhö ki gïrø døc, ni bäŋ jiy mo oränynyö kaamarø.

²⁰'Ba ka adïëri møn Krictø atïŋ maal ki yi thøø, ni beeye ŋata bwödhö ki duun wøk ki yi thøø dï jøøa näk othøw.

²¹'Ba kiper mana tïme ni thøø ööi ka køør dhaanhø aciel, kaawat manøgø thuwø duun wøk ki yi thøø aöö ki køør dhaanhø aciel.

²²'Ba keda man wø thøw jiyi bëët ki kur Adam, kaawat manøgø thuwø, jiy bëët owëëk kwøw ki kur Krictø.

²³'Ba tïŋ maal ki yi thøø da kare kiper jiy bëët. Dïkwøŋ beeye Krictø na bwödhö ki tïŋ maal, 'ba kanyo ö Krictø, beeye kar jøøa en dëëre ki man tïŋ ge maal.

²⁴'Ba kanyøgøøni beeye cuŋ piny, kanyo ö Krictø noo dwøk bura jï Jwøk na näk Wuuö, køør mano raany bure bëët, ki kwääri, ni bäŋ teek mør këët.

²⁵Kiper Krictø obëëdö na nyeya këël mano ö Jwøki noo tïïc nyïïmänne bëët ni bëëdö tiete.

²⁶'Ba nyimän mano raanynyi na aŋuudi beeye thøø.

²⁷«Kiper Jwøk jammi bëët adïïme ni wëëk ge bëëtö tiere.» 'Ba kanya caani, ni «Jammi bëët odïïmö ni bëëdö tiere,» ŋäc ni Jwøk na cïp jammi bëët nee bëëtge tier Krictø, eni ki dëëre ba en tier Krictø.

²⁸'Ba kanyo tïm jammi bëët ni ena tiere, yi kar kanyøca, Wäädö ki dëëre thuwø otïmö ni ena tier ŋata cïp jammi bëët tiere, nee Jwøk tïme ni beeye Jwøka eni keere jï jammi bëët.

²⁹?'Ba ni näk patha enøgønø, aperŋø ni wø ö jø møøki wø lwøk dëëtge na nyuudhi ki kur jøøa näk othøw? ?A ni näk jøøa näk othøw ba tïŋ maal na bäre bäre, aŋø ni wø ö jø møøki wø lwøk dëëtge ki kurge?

³⁰?A waani nø, aŋø ni wø enwa dhøk gïï mo leth cooth en?

³¹Aani, a wø ena um thøø cooth, nyïïmera, ni gïnögø caana kiper atöör mara na en cwïnya kiperu ki køør Krictø Jecu, eni na Kwääyø.

³²?Ni näk mo aano këëdö ki lääy yi Epeca kaawat man wø tïïc dhaanhø jaak, a bunna ŋø nø noo jooda? Ni näk jøøa no othøw ba tïŋ maal, «Beerra man cämø ni mädhø jaak, kiper diøø ø thøw.»

³³Kär wïthu maaŋŋi. Dwätö ki nyïïawäädi mo reyø beeye wø raany bëëtö mo beer.

³⁴Cäŋu wïthu caarrø, ni ba bääyu këët. Kiper jø møøk bäŋ gïn mo ŋäcge kiper Jwøk. Ni gïn caana naa lääa wïthu.

³⁵'Ba kanymør da ŋat mo pëëö, ni «?Jøøa näk othøw otïŋi maal nidïï? ?Na a dëël mo nyïëdi noo en dëëtge?»

³⁶Nyie, ï ni bäŋ wïc en! Kunhnhö man wø piithï, ba tuy ni näk mo kär thøw.

³⁷Ni kanyo pïïdhï, ï ba piith dëël mano tuy, 'ba beeye waŋ kunhnhö keere, nee abäy wala teeŋ beel møga.

³⁸'Ba Jwøk wø cïpö ki dëël jï gø, keda mana manynye, ni teeŋ kunhnhö man nø, dëëre ena kur keere.

³⁹Kiper rïŋ dëëlli bëët ba röömi. 'Ba da teeŋ rïŋ dëël aciel jï jiy, ni maya ena jï lääy, ni maya ena jï weny, ni ö maya ni en jï rec.

⁴⁰Ni da dëëlli mo maal, ni dee dëëlli mo piny. 'Ba ajiem mar dëëlli mo maal ena kur keere, na ajiem mar dëëlli mo piny ena kur keere.

⁴¹Teeŋ ajiem aciel ena jï cäŋ, ni teeŋ ajiem maya ena jï dwääy, ni ö teeŋ ajiemmi maya ni en jï ceer. Kiper cëërö man nø, ajieme ena kur keere.

⁴²'Ba duun wøk ki yi thøø poot na enøgø thuwø. Dëël mano koony piny beeye dëël man wø bëën thøø, 'ba otïŋ maal na dëël mo ba bëën thøø këët.

⁴³Eni wø koonya piny na gïn mo otaaø, ni tïŋi maal ka ajiem. Eni wø koonya piny ni jääk, ni tïŋi maal ni eni teek.

⁴⁴Eni wø koonya piny na dëël man wø kwøw ki kwøw mar piny man en, ni tïŋi maal na jwïëy mo da dëël. 'Ba ni näk da dëël man wø kwøw ki kwøw mar piny man en, da jwïëy thuwø mo da dëël.

⁴⁵Beeye na gööri na en nø, ni «Dhaanhø mana dïkwøŋ na näk Adam atïmö ni ree da jwïëy mo kwøw,» 'ba Adam mana en cään atïmö na jwïëy man wø cïp kwøw.

⁴⁶'Ba paa mo jwïëy ni wø kwøŋ nut, 'ba beeye kwøw mar piny man en, noo näk køøre beeye mar jwïëy.

⁴⁷Kiper dhaanhø mana dïkwøŋ käla piny, ni beeye dhaanhø mo käla ri ŋøøm. 'Ba ŋata en cään, käla maal.

⁴⁸'Ba jøøa käl ri ŋøøm, caala eni na käl ri ŋøøm. 'Ba jøøa en dëër Krictø, dëëtge otïmö ni caala dëër Krictø na käl maalø.

⁴⁹Kaawat man bëëdø en ni ø caala ŋata käl ri ŋøøm, øøno tïmö thuwø ni ø caala ŋata käl maal.

⁵⁰'Ba a caana gïn jïïu, nyïïmera, ni dëël man wø thøw en buc Jwøk ba joode. Ni gïn wø ränynyi, gïn wø ba ränynyi ba joode thuwø.

⁵¹Neennu, aani, a caana luubö jïïu mo tiere okwøŋ kan. Ø ba buti bëët. 'Ba dëëtø di wiilø bëët,

⁵²ki kany mo thiinh mo caala mec waŋ, kanyo köök tuuŋŋi mar aŋuudi. Kiper tuuŋ okooth, ni ö jøøa näk othøwi ni tïŋ ge maal ni ge ba ränynyi këët, ni wiil dëëtø bëët.

⁵³Kiper dëël man ni wø ränynyi en, di wiilø ki dëël mo ba ränynyi, ni kwøw man ni bëën thøø en, di wiilø ki kwøw mo ba thøw.

⁵⁴'Ba kanyo wiil dëël man wø ränynyi ki dëël man wø ba ränynyi, ni wiil kwøw man wø thøw ki kwøw man wø ba thøw, kanyøgø nø, luupa caan na näk ogöörö othur kärge: ni «Thøø oraanynyø na bäre bäre.»

⁵⁵«?Wui, ï na thøø, teek marï en kaa? ?Wui, ï na thøø, kac marï age eni?»

⁵⁶Kac mar thøø beeye raay. Ni teek mar raay beeye ciik Jwøk.

⁵⁷'Ba pwøc en jï Jwøk, ŋat wø wëëk ø teek dïïm ki køør Kwääyø ma Jecu Krictø.

⁵⁸Kiper manøgønø, nyïïmera ni nägu omëëya, bëëdu karu nou ba dääŋi, nou tïïya tïï Wuuö cooth, ni ŋäyu ni öölö maru kiper Wuuö ba aay jaak.