Read anuak 1 Körin 16 Bible Online

1 Körin 16 - anuak bible

1 Körin 16

¹'Ba kawaane kiper luum muuce moo cïp kiper jø Jwøk, uuni thuwø, u doo tïïö kaawat mana køba gø jï acook Jwøk moa en Galeecia.

²Kany wø tïme na cäŋ Jwøk ki yïth juu bëët, ŋati man nø dïïu wäro lwöte ki gïrpiny ni kan gø, kaawat mano en jïre, kiper nee bäŋe jammi mo poot di cooŋø këët dïcäŋo ööa.

³'Ba cäŋo pïïa, jøw omanynyu geno jääŋŋa Jerucalem ni käära muuce mou, ki wëëlö mo yaa cïp ceŋge.

⁴'Ba ni näk moo joodø ni gïn mo beer ki man cøøa thuwø, ge doo lööbö ki aani.

⁵'Ba uuno lïïma køør mano pöödha ki dï Macedönia, kiper yaa caarø naa doo cøra yi Macedönia,

⁶ni kanymør aano bëëdö buutu, wala kanymør arïïa kiree othööra ki uuni, kiper nee tïme ni beeye uuni noo jieth aani ki wääth mara kanyo cøøa yie.

⁷Kiper kawaane a ba many man neena uuni naa puta pöödhö jaak, kiper yaa ŋäädhö naa doo ruu buutu dïciel, ni näk köö Wuuö.

⁸'Ba aano bëëdö yi Epeca këël mano tïme na cäŋ Pentikø,

⁹kiper aano jämmö ki jöö mo päl, ni beeye jöör tïïc ma wøp døc, 'ba da nyïïmän mo thööth døc.

¹⁰'Ba kanyo ö Timöthi, wär ŋäyu ki man ba wëëgu cwïnye lwär. Kiper eni tïïya tïï Wuuö kaamar aani.

¹¹'Ba kär dee ŋat mo taak gïr gø. 'Ba wär wëëgu wääth ki bëët-mëër, nee duu baŋa. Kiper a ŋäätha eni, ni eni öö ki nyïïmëëe møga.

¹²'Ba mar cöögø ma Apøla, ena cøga døc ki man lïïm uuni ki nyïïmëëe møga, 'ba atïmö ni paa mana many Jwøki kipere ki man ö baŋu kawaane. 'Ba eno ööi kanyo jïte ki jöö mo ööe ki gø.

¹³Kuru, ni cuŋŋu nou teek ri ŋäädhe maru. Magu cwïnynyu nou teek.

¹⁴Ni ö jammi bëët mo wø tïïyu, ni tïïi ki mëër.

¹⁵'Ba kawaane nyïïmera, ŋäyu ni tuuŋ Ectipana beege na kwøŋ jïëy ya Akeea, ni cïpge cwïnyge køør tïny jø Jwøk.

¹⁶'Ba a köömma uuni ni beerra man leŋŋu teeŋ dööt jiy ma yøøgønø, këël jiy bëët mo wø kunyö na ööl ki tïïc man.

¹⁷'Ba yia amïnnö døc ki ööny Ectipana, ki Pörcunata, ka Akeeyika, kiper gena läw karu.

¹⁸Kiper cwïnya awëëkge mïnnö døc, kaawat mana wëëkge cwïnynyu mïnnö. Wøørru teeŋ jiy ma yøøgønø.

¹⁹'Ba uuna määth acook Jwøki mo Eecia. 'Ba Akwila ki Paricka,[2] ka acooŋ Jwøk man wø cooŋ yi øtø marge, uuna määthge døøc ki nyeŋ Wuuö.

²⁰Uuni, uuna määth nyïïmëëe bëët. 'Ba määthu ŋati man nø ki nuum dhøk mana en kur keere na näk mar Jwøk.

²¹'Ba man beeye aani na Pøøl ni göör määdhe moi ii ki cera kiree.

²²'Ba nee da dhaanhø mo ba mëër ki Kwäärö, ŋatøca, acïëni oen bääte. Wui, Kwääcwa, laar öö!

²³Met ec mar Kwäärö ma Jecu bëëde bäätu.

²⁴'Ba mëëya bëëde bäätu bëët ki ri Krictø Jecu. Enøgønø.