Read anuak 1 Körin 2 Bible Online

1 Körin 2 - anuak bible

1 Körin 2

¹'Ba nyïïmera, kanya ööa baŋu kuna køba luum Jwøk jïïu, a kär cäänö ki luup mo yaa døønnø, ni waŋa riek.

²Kiper yaa cooŋø ki cwïnya ni bäŋ gïn mo ŋääa dïïu, 'ba beeye Jecu Krictø keere, eni na 'näk bäät jaadha no odëëdö.

³'Ba na bëëda dïïu, a jääk naa lwäär døc, ni dëëra kwanynyi.

⁴Ni dwøra na cääna ki gø, ki dwøl mana køba, kära caanø naa møøtha uuni ki luup mo riek waŋ, 'ba Jwïëc Jwøk ki teek ee nyoodhø,

⁵kiper nee ŋäädhe maru ba tïme no ogöök ri leec wïth jiy, 'ba nee tïme no ogöök ri teek Jwøk.

⁶'Ba da leec wïc mo wø caanwa caanø dï jøøa wïthge leer. 'Ba paa leec wïc mar pinyi en, wala man wø car jø bëën pinyi en, jøø ni teekge ojøøl yøø.

⁷'Ba wa wø caana leec wï Jwøk mana kuc na näk okanø, na näk ocooŋ Jwøki ki cwïnye ni piny poot kär cwääö kiper nee ø mooc ka ajiem.

⁸'Ba bäŋ dhaanhø dï jøøa bëënni bäät pinyi en mo ŋäc gïnögø. Onää ŋäcge, kwääy ajiem ba dege nääö bäät jaadha no odëëdö.

⁹'Ba, kaawat man ii göörö en, ni «Gïï mo poot bäŋ waŋ mo oneen ge, wala ïth mo owïny ge, ni bäŋ cwïny ŋat mo odïët ge, beege gïïa jiiŋ Jwøki kiper jø wø mëër ki eni.»

¹⁰'Ba gïïögø anyooth Jwøki jïïø ki køør Jwïëye. Kiper beeye Jwïëye ni wø many tiet jammi bëët, këël moa näk mo Jwøk na kwörge ba dïët.

¹¹?Kiper aŋa ni wø ŋäc mo wø en cwïny ŋat mør, ni näk patha jwïëy na en dëër ŋatøca keere? Kaawat manøgø thuwø, bäŋ dhaanhø aciel mo ŋäc jammi bëët mo wø en cwïny Jwøk, 'ba beeye Jwïëc Jwøk keere.

¹²'Ba kawaane ø kär wëëk jwïëc piny, 'ba ø wëëga Jwïëy mana öö ki baŋ Jwøk, kiper nee tiet muuce moa wëëk Jwøki øøni nee kwanyø.

¹³'Ba luupögø caanwa na luup mo ba pöö ka leec wïc mar dhaanhø, 'ba pöö Jwïëc Jwøk, ni wø nyooth moa näk adïëri na näk mo Jwøk jï jø wø en Jwïëc Jwøki cwïnyge.

¹⁴'Ba ki jï ŋat mo cwïnye ba en køør Jwøk, muuce mo Jwïëc Jwøk ba jïëe, kiper nëëni keda jap bøøl jïre, ni ba maar lønyø jïre ki man kwany geni, kiper wø joot ka cwïny mo ena køør Jwøk.

¹⁵'Ba ŋat mo cwïnye ena køør Jwøk, tiet jammi bëët wø joode joodø, 'ba eni ki dëëre doo bäŋ ŋat mo tiir eni.

¹⁶?Kiper «Aŋa ni wø ŋäc moa en cwïny Wuuö Jwøk nee eni nyuunhnhe?» 'Ba beeye øøni na wëëk moa en cwïny Krictø.