Read anuak 1 Körin 9 Bible Online

1 Körin 9 - anuak bible

1 Körin 9

¹?Aŋø, a ba bëën dëëra? ?Aŋø, a patha nyïïatwiel? ?A Jecu na näk Kwääyø kära joodø? ?A uuni, u patha gïïa tïïa ki ri Wuuö?

²'Ba ni näk maa patha nyïïatwiel ki jï jø møga, aana nyïïatwiel ki jïïu. Kiper uuna nyuudhi na näk onyoodhø ni aana nyïïatwiel møn ki ri Wuuö.

³'Ba man beeye luum odwøga jï jøw opëëny aani.

⁴?Aŋø, ba beer jïwa ki man cämwa ni mäthwa?

⁵?A ba beer jïwa ki mana dewa cäädhö ki määrwa kaawat man wø tïïc nyïïatwieli møga, këël Ciipa, ki nyïïmëëe mo Kwäärö ma Jecu?

⁶?Aŋø, beeye aani ki Barnaba keerwa na doo tïïö ki tïï cam marwa?

⁷?Aŋa ni wø tïïö ki tïï koor paac ni jape joode baŋe keere? ?Na aŋa ni wø pïïdhö ki pwöth omøki ni ba cämö ki nyïëdi mo gø? ?Na aŋa ni wø kwaac dïëk ni ba mädhö ki caak?

⁸?Aŋø, luummögø caana kaawat man wø caan dhaanhe jaak ki teege? ?Luummögø bäŋ wø caan Ciik Jwøki thuwø?

⁹Kiper ogöörö yi wëël Ciik Modhe, ni «Kär dee ŋat mo twöc dhi rwaath kany wø dïne ki beel.» ?Aŋø, luummögø caan Jwøki kaper rwädhe?

¹⁰?Luummögø ba caane kaperø kiree? Ogöörö kiperø møn, ni ŋat wø purö, doo purö ni ee ŋäädhö, ni ö ŋat wø dïn beel, ni dïne ni ee ŋäädhö ni eni jïtö ki kure.

¹¹?Ni näk luup Jwøk na beyø ewa piith cwïnynyu, doo tïmö na gïn mo dwøŋ ni näk wa jïtö ri japu moa tïïyu ki ceŋŋu?

¹²?'Ba nee jø møga da kurge mo beer jïge ki man lwørge gø baŋu, ba kadha marwa? 'Ba këël na näk enønø, kurwa na doo beer jïwa ki man lwørwa gø baŋu awecwa, ni tïmwa ni wa jwøra gïïa leth, kiper nee bäŋe dïdëët mo kïthwa jöör luumma nyään na met mar Krictø.

¹³?Aŋø, kuyu ni jø wø tïïö yi Øt Jwøk, wø cama caap Øt Jwøk, ni jø wø tïïö kar gïn wø cïp olämme bääte wø jïta ro olämme mo wø cïp bääte?

¹⁴Kaawat manøgø thuwø, ocaan Kwäärö ni jø wø køp luumma nyään na met, cam marge dege joodø ki køør luumma nyään na met.

¹⁵'Ba aani bäŋ gïrpiny aciel mo yaa lwørø ri gïïögø, naa ba göönni kaper nee teeŋ gïïögø mëëk aani. Kiper doo beerra mana daa thøw ki man ö ŋat mørri ni raany par mana di a parø ki gø.

¹⁶'Ba ni näk maa køpa luumma nyään na met, doo bäŋ gïn maa doo töödö kipere. Kiper køp luummögø ba maara wec. Ni doo tïmö ni raac jïra ni näk maa ba køp luumma nyään na met.

¹⁷'Ba ni näk gïnögø tïïa ki met ec mara, a doo jïtö ki gïn mo mëëk aani. 'Ba ni näk mo ba tïïa ki met ec mara, beeye tïïc mo wëëga aani.

¹⁸?Mana beer nø na mëëk aani agïnaŋø? Mana beer na mëëk aani beeye ni kany wø køba luumma nyään na met, bäŋ jammi mo cwøla, ni ba pëënynya kura na doo beer jïra ki pëënynyö ri luumma nyään na met.

¹⁹'Ba këël ni bëëda ni bäŋ dhaanhø mo bëënna, dëëra atïïa na laŋŋø jï jiy bëët, kiper naa känna kura ki jiy mo thööth.

²⁰Ki jï jø Juuth dëëra atïïa keda aana ŋat Juuth, kiper naa känna kura ki jø Juuth. 'Ba ki jï jøøa bëën ciik Jwøk, dëëra atïïa keda aana dhaanhø mo bëënna ciik Jwøk.

²¹'Ba ki jï jøøa kuc ciik Jwøk, dëëra atïïa keda aana dhaanhø mo ciik Jwøk kuua. Naa ba kuc ciik Jwøk, 'ba a bëënna ciik Krictø, kiper naa känna kura ki jøøa kuc ciik Jwøk.

²²'Ba ki jï jøøa näk ŋäädhe marge thiinh, dëëra atïïa keda aana dhaanhø mo ŋäädhe mare thiinh, kiper naa känna kura ki jøøa ŋäädhe marge thiinh. Aani, dëëra atïïa na enøgønø ki yïth jammi bëët jï jiy bëët, kiper naa jïta ki jöö ki yïth japøgø bëët nee jø møøk piema.

²³Ni moøgø bëët tïïa kaper luumma nyään na met, kiper naa tïma ni da kara ri bëënynye.

²⁴?Aŋø, kuyu ni jø wø reŋi, wø läätö bëët, 'ba beeye dhaanhø aciel keere ni wø jïti ki gïn wø mëëk eni? 'Ba reŋu nø ki ŋwïëögø nee ci jïïu.

²⁵Kiper jø wø tuuk bëët, dëëtge ege mänö ki yïth jammi bëët. Ni gïnögø tïïcge ni ge jïtö ka adun ajiem mo wø laar ränynyö, 'ba øøni, ø tïïö kaper nøø jïtö ki gïn mo ba maar ränynyö.

²⁶'Ba aani, a ba rïïŋi jaak ki ŋwïëy mo bäŋ tiere, naa bäŋ wø dhööŋi keda dhaanhø mo pööta jamø jaak.

²⁷'Ba a pööta dëëra, ni dïïma gø, kiper naa ba tïma naa patha orømø, a na kwøŋ jø møga pwönynyö.