Read anuak 2 Körin 11 Bible Online

2 Körin 11 - anuak bible

2 Körin 11

¹A doo naa manynya man cegu ïthu ki luum bøøl mara ki kany mo thiinh. Käru jøøm ki aani.

²Kiper gïru yaa keeø ki keec man wø näk mar Jwøk. Kiper u yaa miiø jï Krictø, nou cïba jïre keda dhaagø thiinh mo dëëre joota cwøre keere.

³'Ba aana lwäyö ni wïthu di maaŋŋø ni weyu mëër mana näk adïëri ni en cwïnynyu kiper Krictø, kaawat mana tïïc thwölli ki riek waŋe na ööe ni cøøk Iip.

⁴Kiper uuni, u wø laara jïëy ni näk da ŋat mør mo öö ni køp Jecu mør ni patha mana køpwa, wala ni näk uuno jïtö ki teeŋ jwïëy mør ni patha mana jootu baŋwa, wala teeŋ luubö mør mo nyään mo met ni patha mana kwøŋu jïëc.

⁵Ki jïra, naa ba thiinh ki nyïïatwietøgø ni døøŋŋø yøø.

⁶'Ba këël ni näk dwøra ba wïnyi ni beer, a paa orëëm ki ŋäc luup. Ni manøgø ewa nyoodhø jïïu ki yïth jammi bëët.

⁷?Aŋø, aana bääyö nø, kiper mana dwøga dëëra cään nou cou nyïm, kanya køba luumma nyään na met mar Jwøk ni bäŋ gïn mo yaa cwølø baŋu?

⁸'Ba acook Jwøk møga atwøa ki køør mana jïëa køny marge, kiper nou tïnynya.

⁹'Ba kanya bëëda ki uuni a can, ni bäŋ ŋat mo yaa öölö kiper køny. 'Ba gïïa manynya acïp nyïïmëëe moa öö ki Macedönia. Kiper manøgønø, u kära öölö nou ba ööla këët na bäre bäre.

¹⁰'Ba kaawat man bëët adïëri mar Krictø cwïnya en, atöör man na mara en ba mäni ki man wïnye yïth mïëc Akeea.

¹¹?Aperŋø nø? ?Ki baŋu naa ba mëër ki uuni? Ŋäya Jwøki.

¹²'Ba gïn wø tïïa nø, aano put bëëtö naa tïïya gø, kiper na acaara mar jø wø cäänö kipera ni wø köö, ni tïïc marge na jääŋ geni ki gø ni töötge kipere enø ni rööma tïïwa, nee raanynya.

¹³Kiper teeŋ jiy ma yøøgønø, ge patha nyïïatwieli ma adïëri. Gena jø tïïc mo tïïö ka cwøk, ni dëëtge døøya ge nyïïatwiet Krictø keerge.

¹⁴'Ba paa gïn mo ec thäŋŋö ki gø, kiper këëlla Ceethan dëëre wø døøye nyïïatwiel maal mar tar.

¹⁵Kiper manøgønø, patha gïn mo nyään ni näk jø wø tïny eni thuwø dëëtge ege døøc jø tïny bëënynyö. 'Ba cuŋ marge orømi ki tïïe moge.

¹⁶A nwøya gø, ni kär dee ŋat caar aani ni aana bøøl. 'Ba këël a dou caarø na enønø, jïëyu aani ni aana bøøl, kiper naa tööda ki mo thiinh thuwø.

¹⁷'Ba man caana en, ba caana ka cuum mana cïp Wuue, 'ba a cäänö kaawat man wø cään bøølli, kany tööda ka atööri ni päl en.

¹⁸'Ba kiper mana tïme ni jiy mo thööth töödö kiper jap piny, aani thuwø, a töödö.

¹⁹Kiper uuni, ïthu wø laaru ka cek jï bøøre, u ni wø ŋäc jammi bëët.

²⁰Kiper u wø laara jïëy ni näk da ŋat mo öö ni døøc u laaŋe, wala eni raanynya japu, wala møta uuni, wala cäädhi ka atöör, wala dhööŋŋa thäŋŋu.

²¹'Ba a doo köö, ni wïïa alääö, kiper mana jääkwa ki man tïïcwa teeŋ gïn ma enøgønø. 'Ba a cäänö kaawat man wø cään bøølli, ni gïn wø tööt dhaanhe kipere ni waŋe teek, aani thuwø løny jïra ki man tööda kipere ni waŋa teek.

²²?Aŋø, gena jø Ibaru? ?A aani? ?Gena jø Icriel? ?A aani? ?Gena nyïïkwaac Eeberam? ?A aani?

²³?Gena jiy mo tïnynya Krictø? Theemma aani. Ŋääa naa cäänö kee aana bøøl. Aani, kadha öölö mara, ni kadha aani ki tööyö uut tööc. Aana pööti ki kwör pöödö mo ba kwaan, ni bødha kwör mo thööth ki thøø.

²⁴Aana pwöt jø Juuthi kwöre abïïc ka alaŋŋe mo doo tïmö na pïëraŋween, 'ba tøørra aciel.

²⁵Ni pwöt aani ka athøre kwöre adäk, ni këër aani ki kïte yie aciel, ni räny jïëth naammi moa cäädha ki geni ki kwöre adäk, ni thäära yi naama dwøŋ ki wäär ki cäŋ.

²⁶Ni jïta ki wäädhi mo thööth, naa ena dhøk gïï mo leth yïth näm, ni ena dhøk gïï mo leth ceŋ dïtwïëte, ni ena dhøk gïï mo leth ceŋ jø powa ki juurre, ni ena dhøk gïï mo leth yïth päänye, ki paap, ki yïth näpa døøŋŋø, ni ena dhøk gïï mo leth ceŋ nyïïmëëe moa näk patha adïëri.

²⁷Naa wø ööl ki tïïe mo teek yïth gïï mo leth, ni bäŋ niine ki wärre mo thööth, naa wø bëëdö ki käc ki riew, naa bäŋ wø jïti ki gïn cama ki kwör mo thööth, naa wø bëëdö yi köö ni bäŋ gïn rïëba bääta.

²⁸'Ba bäät gïïögø thuwø, a wø lääŋŋa acook Jwøk bëët ki yïth nïne bëët.

²⁹?Aŋa ni jääk, ni ba jääa thuwø? ?Na aŋa na wëëk pädhö, ni ba goota?

³⁰'Ba ni näk maa töödö, a töödö ka gïïo nyooth jäk mara.

³¹'Ba Jwøk na näk Wää Kwäärö ma Jecu, ŋata näk opwøø na bäre bäre, ŋääe ki man näk maa ba caan tööt.

³²Kiper kanya ena Damacka, kwääc paac mana bëën nyenynya cwøl ni Areeta, dï pääny Damacka akoore naa mak.

³³'Ba aana gäp wøk ki dhwöŋŋö ki waŋ awëërnyeŋ mo ena dëër kiir, ni bødha cere.